10
1 Ghau rana taluutuni, inau tu ghanaghana oli ngangata ta nigua na kokoeliulivuti vania God, ge gaia ke vavolara rana vure ni Jew. 2 Inau tu ghilala didira na ghanaghana mava vania God, hauva me mua maemane didira na manaha. 3 Ma gaira tara mua ghanaghana kalea na puku ni halautuna God ge ke talu maemanera na lei tinoni tana matana. Hauva mara tabe ngasilia ge kara lutu maemane itatana God nia na taoniana nina vetena Moses, keri ge ra mua taonia na halautuna God. 4 Christ te taonighi tua na lei vetena udolu. Mi taeni gaia na halautu vaolu ge rahei kara taluutunia, Christ ke va talu maemanera tana matana God.
5 Tana bona Moses te gerea eni te vagha na halautu na lei tinoni te va maemane tana matana God, me bosaa ilokana na Gegere Tabu,
Ke vagha tau liona ge kau holaa na vola kasila,
kau taonighi mughua na lei vetena udolu God te vaheghita. Buka Vetena 18:5
6 Hauva na hava na Gegere Tabu te talutatea na nilabu ge ka maemanea na pukuna ta taluutunia Christ te dutuvighita, te vagha eni,
Kau bei nongia tana ghanaghanamiu, “?Ahei ke dato ikokou?”
(Na pukuna taho siki sakai ke dato ge ke lavi horua mai Christ ge ke va maemaneghita.) 7 Me ghoi ghaghua,
Bei nongia te vagha, “?Ahei ke horu tana komudira na lei tinoni mate?”
(na pukuna taho siki sakai ke ghoi volaolia Christ.) 8 Na halautu vanighita ge ka maemane itatana God nia na taluutuniana Christ ke, te mua vahola ge ka sodoa. Te vagha na Gegere Tabu te ghaghua,
Mana rongorongo te dutuvighita tua,
me ghaha tana ghidumiu mi tana tobamiu. Eruani Vetena 9:4; 30:12-14
Aeni gaia na rongorongo tai tughunitatea. 9 Ma ge ko tughuniladai nia na mangamu gaia Jesus te Lord, mo ko taluutunia tana tobamu ge ke tughuruvaghinia tana mate, ge God ke volagho. 10 Tana bona to taluutuni tana tobamu ke, God ke va talu maemanegho tua tana matana. Mi tana bona ko tughunitatea mughua tana mangamu, ge God ke volagho. 11 Te vagha na Gegere Tabu te bosaa,
Arahei kara taluutunia kara mua nia maa. Isaiah 28:16
12 Na vure ni Jew mana vure tara mua Jew tara sakai na vata vamua ta God. Gaira udolu tara loghoa a sakai na Lord vamua, ma gaia te vautora rahei tara nongia ge ke hangara. 13 Te vagha na Gegere Tabu te bosaa,
Rahei kara holoa na ahana Lord,
God ke volara. Joel 2:32
14 ?Mi vei kara nea na holoana ge ke vavolara ke vagha kara mua taluutunia? ?Mi vei kara nea na taluutuniana ge ta kara mua rongovia mua nina rongorongo? ?Mi vei kara nea na rongoviana ge te ke taho ahei ke tughunitatea vanira? 15 ?Mi vei ke ghaghua siki sakai ge ke tona me ke tughunitatea vanira ke vagha God ke mua nira vetena? Aeni na Gegere Tabu te bosa,
Te uto ngangata ge ka righira rahei tara mai,
tughunitatea na rongorongo uto Isaiah 52:7
16 Ma mua rana Jew udolu tara lavipangotia na rongorongo uto, te vagha Isaiah na prophet te bosa me ghaghua,
?Lord, ahei tua te taluutunia nimami na rongorongo?Isaiah 53:1
17 Vaho ge, na taluutuni ta Christ te mai so tana bona tara varongohia na rongorongo uto, mana lei tinoni tara rongovia na rongorongo uto tana bona siki sakai te ladavaghinia Christ. 18 ?Mi vei kara ghaghua rana Jew? ?Ara rongovi vakodoa so na rongorongo uto? Eo, ra rongovia so, na pukuna na Gegere Tabu te bosaa,
Na rongorongoni nina na lei totobo God te gonighi,
me ladavaghinia tana maramana udolu,
me saravighi na lei komu soko tana maramana.Buka Linge 19:4
19 ?Mi vei tea ara ghilala utoa so na vure ni Israel? Eo, ara ghilala tua, na pukuna tana bongina Moses idania, God te bosa me ghaghua,
“Inau ku volaghau ta nimiu na ghaghana
tana bona ku vautora na balu kema keha.
Inau ku nea na liomiu ge kau rutu
na pukuna ku vautora na lei vure tara mua ghilalau inau.” Eruani Vetena 32:21
20 Ma Isaiah te kokoe ladaa na hava God te bosaa,
“Inau tara topou sakai manaa tara mua kene taotaoniu,
mi nau tu tateu heghegu vanira arahei tara mua huahuatiu.” Isaiah 65:1
21 Ma God te bosa me ghaghua vanira rana Israel,
“Tana lei bongi soko tu pitura ge kara pulohi vaniu mai,
hauvaa, tara mua taoniu mara hughuhughu koluu so.” Isaiah 65:2