18
Babulonia Vanua Namana
Ani E'ekoasi.
Ani E'ekoasi.
1 Katania mulitai anelu edeana ka vutuvutuai e'ovu easi aikaia. Ia ena siavu 'eva nama vaikana mai ena nuaviai kanobata itoina eva'ailalala. 2 Lelena evakula'ilala evaoi 'unu'unu ediaka,
“'Ani e'ekoasi! Babulonia
vanuana namana 'ani e'ekoasi!
Ia 'eva diabolo mai ka'uba si'avata
boutai eta mia 'abunai e'ao,
manumanu si'avata mai
ulata sia de'ula davata
eta mia 'abunai e'ao.
3 'Olana kanobata kauta boutai
ita kulakula koakoata si'avata
vaika devavai
itani ena mulamula pasisinai
deinu ba boina.
Kanobatai lovia 'olata kauta vaka
ia ita deno ka'ona,
mai kanobatai tavatava kauta
'eva ena dava mediata tavata
namatai delovia.”
4 Inoku lele edeana ka vutuvutuai aika ediaka,
“E'u kau e, vanua kanana
laloanai ola'asi omai.
Inoku ia ita si'avana
sia oi bovavai ka'ona.
Mai ena anaana si'avata vaika
sia ka oi boabia.
5 'Olana ena si'avana 'eva
'ani edouia eda'amo vutuvutuai,
mai Dilava 'eva ia ena vavai
si'asi'a boutai elalovai 'ini.
6 Ena veniveni vitaitanaimo
oi bovenia 'udai.
Evavaia davana 'eva
melala lua tavana oi boveveni.
Mulamula pasisina evenimui
davana 'eva melala lua
ena 'ouai oi bolaiauda
bekula'ila inoku beinua.
7 Anaana namavaikana mai
vilalo namavaikana oi bovenia
itani nuavi mai dava tavata
namata sibona evenia boina.
Sibona nuanai eapa ediaka,
‘Lau 'eva lovia 'olana ateate'u
amimia, lau 'eva sia obu,
mai lau 'eva sia bakani kovo.’
8 Kanaua 'ounai melala ka'onamo
laloanai ia bana davata boutai
bedavalita,
ba, kani mai doe.
Ia 'eva 'alova laloanai beani palu.
'Olana Lovia namana Dilava
ia ilavuaina Dilavana 'eva
ekula'ila vaika.
9 “Kanobatai lovia 'olata ia ita deno ka'ona mai ena lavo delalonama vaia ka'ona kauta 'eva 'alova kanaua vaitabuna beikala koanai belaloa mai bekanidiala. 10 Ena anaana bevamakauta, inoku ia 'eva dau'ai vaika belalava bekakani beluluva,
‘Esi'avana vaika!
Kula'ila vanuana namana e,
esi'avana vaika!
Babulonia e,
siavu vanuana namana!
Melala koana ka'onamo laloanai
Dilava evaanaanamu vaika.’
11 “Kanobatai tavatava kauta vaka belaloa mai bekanidiala 'olana eta tavatava davata 'eva sia kau ka 'ani betava 'udai. 12 Tavatava davata kataua 'eva kolo mai siliva, bika'a koevata mai kutukutu 'amale'amaleta, tubu'a koevata vaika, tubu'a pepolota, tubu'a kevekeveta nama'ita, tubu'a a'olata, au bonata nama'itai devavai davata edeata edeata, sisi vana elepant kusivanai devavai davata boutai, au tavata namata auta, kopa, 'auli mai bika'a pasisina medianai devavaita davata, 13 iani bonata ivanama'inata mulamulata vata sinemoni mai spaisi, mulamula bonata nama'ita vata inisenese mai mila, mai mulamula kula'ilana kauani beuku mulamulana, mulamula pasisina mai olive deolona, palaoa nama'ita, witi, bolomakau mai mamoe, osi, mai kaliota, da'alabi kauta, mai kau eta mauli. 14 Dava detavatava vai kauta be'oua bediaka,
‘Babulonia e,
dava nama'ita oula venita davata
mai emu lovia davata mai emu
nuavi davata boutai 'eva
'ani detaule,
inoku sia 'ani bodavalita 'udai.’
15 “Tavatava kauta dava ia kevanai detavatava vaita inoku monitai delovia kauta 'eva dau'ai vaika belalava, 'olana ena anaana bevamakauta. Belaloa mai bekanidiala 16 Bekakani bediaka,
‘Esi'avana vaika!
Esi'avana vaika, Vanua namana e'
Tubu'a koevana vaika vana linen,
pepolona, mai 'aolana ovadodota,
kolo 'amale'amaletai,
bika'a koevata vaika mai
kutukutu nama'itai ovanama.
17 Melala koana ka'onamo
laloanai emu lovia davata
katania boutai 'eva 'ani deole.’
“Aunakoi kapena kauta boutai, mai dele'au dekalima kauta boutai, aunakoiai devinaula kauta boutai, mai 'atuai deda'a to'ato'a eta dava detavatava vai kauta boutai dau'ai belalava. 18 Ia be'ani vaitabuna bele'au beikala koanai, bevaoi bediaka,
‘Vanua davana 'eva vanua namana kanania boina?’
19 Apulolo 'olata akatai bene'e'au mai belaloa mai bekakani 'unu'unu bediaka,
‘Esi'avana vaika!
Esi'avana vaika, Vanua namana e,
maieta aunakoi 'atuai deveau
kauta boutai ena lovia davatai
lavo kautai de'ao,
melala koana ka'onamo laloanai
ia 'eva 'ani eole.
20 Vutuvutu e. Lalonama!
Olalonama,
Dilava ena kabukabu kaumui,
mai veauneke kaumui,
mai enolea kaumui!
Evavaimui si'asi'a 'ounai
Dilava ia mekau evakoala.’ ”
21 Inoku anelu kula'ilana ka eta'u bika'a 'otoina nama vaikana ka eabia isi 'atu laloanai ekapoa uku inoku ediaka,
“Kanania boina vitaitanai
Babulonia vanua namana
'atu laloanai bekapoa uku,
inoku sia bedavalia 'udai.
22 Oni emuai 'eva,
Kita vana 'apa demonevai kauta
mai masi kauta, siau
mai bisi uvani kauta 'uluta
sia 'ani ika 'udai beao.
Vinaula edeata edeata kauta
sia ka 'ani idavali 'udai beao.
Iani ivakali mukamukata
'uluta sia ka vaka
'ani ika 'udai beao.
23 Lamepa 'ailalana sia ka emuai
'ani beani 'udai.
Kamoane makamaka kauna
mai ateatena leleta
emuai sia 'ani beika 'udai.
Dava katania bepupulu
'olana emu tavatava kauta 'eva
kanobatai kau namata deao,
mai emu menai 'eva
kanobata boutai olebata.
24 Babulonia vanua namana
anaana eabia 'olana 'eva
ia laloanai 'eva enolea kauta
mai Dilava ena kabukabu kauta
lalata dedavalita,
mai kanobatai deaku bata kauta
boutai lalata vaka.”