19
Vutuvutuai Devaoi Dediaka,
'Aleluia!
'Aleluia!
1 Kanania mulinai, 'ulu ka aika itani kau do'utamo vaika vutuvutuai devaoi dediaka,
“'Aleluia! Kavanama'inala.
Vamauli mai nuavi mai siavu
'eva eta Dilava ena.
2 Dilava ena valuva 'eva
umauta mai dekomolo.
Ia eta'u mo'a ateatena namana mekau evakoala,
'olana ena mo'a koakoatai
kanobata evavaia si'asi'a 'ounai.
Dilava ena da'alabi kauta deaku
bata lalata tavata 'ani evamuea.”
3 Inoku devaoi 'udai dediaka,
“'Aleluia! Kavanama'inala.
Vanua namana e'ani vaitabuna
ele'au sia bepupua beda'amo
to'ona asi'i.”
4 Inoku 'aida'aidata kauta luanavui vani mai mauli davata vani dekuidula lovia imia'auna akanai emia'au Dilavana dekukudivo venia. Inoku devaoi dediaka,
“Amen, 'Aleluia!”
Mamoe Nakuna Ena
Kamoane Naduna.
Kamoane Naduna.
5 Inoku ua'i lovia imia'aunai lele ka easi ediaka,
“Dilava ena da'alaabi kaumui
boumuiai mai makauna oi omakau
kaumui kikinai eda'amo namana
boumuiai e,
eta Dilava kavanama'inala.”
6 Inoku 'ulu ka aika, 'uluna 'eva itani kau doutamo vaika 'o ka'uda namata deaku 'au 'o vutuvutu e'uluia 'uluna namana boina devaoi dediaka,
“'Aleluia!
'Olana eta Lovia namana
siavu boutai Dilavana 'eva
ita e'ola vaita.
7 Ekalalonama mai Lalota
benanama, nuavi ekavenia!
'Olana Mamoe nakuna ena
kamoane melalana 'ani ele'au,
mai beadavala ateatena vaka
'ani sibona eva'olua.
8 Tubu'a nama'ina vana linen,
deva'ina mai e'amale'amale
mai sia mai'obuna,
devenia bevadodoa.”
(Tubu'a nama'ina kanaua anina 'eva Dilava ena kabukabu kauta vinaula komolota devavai kauta.)
9 Inoku anelu e'ou'u ediaka, “Luva kanania lelea. Deveauveau venita Mamoe nakuna ena kamoane naduna laloanai deasi kauta kataua 'eva denama'ina.” Maivaka ediaka, “Katania 'eva Dilava nutuna luvata umauta.” 10 Inoku anelu kanaua aena 'olanai akuidula bakukudivo venia ako. Beia ia lau e'ou'u ediaka, “Kanana sia bovavaia! Lau 'eva da'alabi kau'u 'avaea'u oni ita mai bo'akalamu Iesu valina dekakava kauta ita. Dilava sibonamo ekakukudivo venia! 'Olana Iesu i'ou daena 'eva enolea siavunai.”
Osi Deva'ina Akanai
Emia'au Kauna.
Emia'au Kauna.
11 Inoku akailao vutuvutu eluvu aikaia 'eva osi deva'ina ka ua'i elava, akanai emia'au kauna vana 'eva ‘ABIVENI’ mai ‘MOMO'AI’. Ia 'eva komoloai evaluva mai ekuali. 12 Makana ikata 'eva itani 'alova evuvule boina, 'olanai 'eva lovia 'olata davata doutamo, ia kaunai 'eva va ka ilelena beia sia kau ka va kanaua eikabasia, ia sibonamo eikabasia. 13 Ena tubu'a laka'ina evadodoa 'eva lalai iudaukuna, inoku ia vana 'eva ‘DILAVA ENA LUVA’. 14 Vutuvutu ena kuali kauta ia mulinai deda'a, osi deva'itai demia'au, tubu'a nama'ita vata linen devadodota, deva'ita mai siade'obu. 15 Nutunai 'eva kuali lepona 'anona ela'asi, ena vinaula 'eva kanobata edeata edeata boutai beakuta mukamuka, inoku ia 'eva 'auli ikoko'anai be'ola vaita. Siavu boutai Dilavana ena badu si'avana vaika bevamomo'aia 'abuna vine vuavuana ivakali mukamukana 'abunai bevakalita mukamuka. 16 Vabatanai ena tubu'a laka'ina akanai 'eva va kanania eleleia, ‘Lovia 'olata boutai eta Lovia 'olana mai Lovia namata boutai eta Lovia namana.’
17 Inoku anelu ka melala laloanai elava aikaia, kanobata mai vutuvutu viloatai delovo manumanuta boutai e'aeta 'unu'unu ediaka, “Omai, Dilava ena nadu namanai ovaka'onamo. 18 Inoku oi 'eva lovia 'olata kauta, kuali 'olata kauta, mai kula'ila kauta vidiota oi bo'ani, osi mai osiai demia'au kauta vidiota oi bo'ani, mai kau boutai, da'alaabi kauta mai sia da'ala de'abi kauta, kikita mai namata boutai vidiota oi bo'ani.”
19 Inoku aivala sisina kanaua mai kanobata ena lovia 'olata kauta mai eta kuali kauta ita deakubou osi deva'inai emia'au kauna mai ena kuali kauta ita bekuali deko aikata. 20 Beia aivala sisina deakuia de'abia mauli, ena enolea kauna dedena ia vanai vatabulovo koakoata evavai kauna ita. Koakoa kataua'i aivala sisina vana numelana deabia mai koakoana va'ava'ana dekukudivo venia kauta elebata. Ia laluana 'eva maulitai bika'a mai'alovana vana salpa eani keinikeini 'ovu'ovunai deitota dodo. 21 Inoku ia eta kau kalina osi deva'ina akanai emia'au kauna nutunai kuali lepona ela'asi kanaua'i eakubata, inoku manumanu boutai vidiotai deani vunu.