1 Pe iromwonen Noru Sipsip irapele mbura kunan manandrtoyoh, kol paingan yang imanun ipoo iya paramwandrai sahin.

2 Pwen unime hu angelou manandrtimou mepo ngara hu koro tine mbulmara Ngindrai, ara Ngindrai iyki ndrah manandrtoyoh iya kili hu.

3 Pe angelou hamou i, ara imbultuwe kohoi kolt para melit ngonohon layin iro aliy, ara isa pe iro tine pere tuntun. Pe lohulohu melit ngonohon layin, ara soyon huroikiy iya kili yiy para kiwiriy pe kiykiy tehe yukyuk. Pe iyapolo hu ndramira Ngindrai ngara katotohun, ara iykiy iya ndrita pere tuntun mbusiy iyau kolt mepo iro pohomara ndrohonoku pwanpwan ta king. 4 Pe kosumwono melit ngonohon layin, iyapolo hu ndramira Ngindrai ngara katohun, ara iro yau nima angelou pe itunam iya paingan mbulmara Ngindrai. 5 Pwen angelou iwiri kohoi kolt pe iyki mwan iro pere tuntun iya aliy. Pwen ihindrikiraniy iya kol pwan, pe kamit iro kamiriy, pe palan iro talon, pe nunuwa kol iya.

6 Pwen pe hu angelou manandrtimou mepo humbultuwe hu ndrah manandrtoyoh, ara hu mwaniyani hu para hu kara ndrah.

7 Angelou hamou imu tahu ira ndrah tan. Pwen mbulou indrut tehe pat iyapolo mwan pe ndrai, ara huhulan huya pwan kol pwan. Pe hasai nondriya matisai para kol pwan masih kene, ara isongut; pe hasai nondriya matisai para hu kei masih kene hu songut; pe ndromndriu salau masih kene hu songut topwei.

8 Angelou lumou tahu manandrtimou ara ira ndrah tan. Pe hapesah tehe ngondron namandran sih mepo mwan iro yat aliy, ara Ngindrai ipiyaniy iya ndras, pe ndras hasai nondriya matisai, ara irapaiwaniy irayah ndrai. 9 Pe hasai nondriya matisai tahu melit masih makunuwehu para ndras ara hu mat, pe hasai nondriya matisai tahu ndroi para ndras ara ipwalngani hu.

10 Pwen angelou timou tahu manandrtimou ara ira ndrah tan. Pe piriy sih namandran iyos yang isa pwan; iro yat tehe sui sahin ngannganan iya, pe iyos iyau yang iya nrita ndran handrang nondriya ndran matindrang ta hu ndran pe hu ndramwiying. 11 Pe ngala piriy ara, ara Tunguyan. Pe ndran handrang nondriya ndran matindrang ta hu ndran pe ndramwiying ara hurayah tunguyan. Pe hu ndramat soyon huyin ndran ara, pe hu mat iya hu ndran ara, paratesah, ndran ara ngahan.

12 Pwen angelou haamou tahu manandrtimou, ara ira ndrah tan, pe hasai nondriya matisai para mwandrai, ara iya yohun. Pe hasai para matisai para ngana walah, pe hasai para matisai tahu piriy, ara masih hulokuh. Pe hasai nondriya matisai para lang ara kinileu pwi, pe ping tehen aliy yi.

13 Iro mwonen uro nimnim ndron, pe uhilingi manuwai hamou iro woh ndrokolo yang, iwayeh namandran iya ipa, “Toimwahu! Toimwahu! Toimwahu ndramat masih para kol pwan, paratesah, angelou matimou hora ndron hu nakara ndrah tahu!”