1 Pwen unime kol paingan yang sih howen pe kol pwan sih howen, paratesah, kol paingan yang para mamu pe kol pwan para mamu, ara kanimun, pe ndras ara kinto pwi yi. 2 Pe unime Kol Namandran Haiyan, mepo Yerusalem howen isa pwan iyau kol paingan yang kili Ngindrai, pe Ngindrai kinmwanye yiy tehe pihin hamou kinsuluye yiy kinna nosan lahayan para kiyesou kiya kili nambuyun. 3 Pe uhilingi yoholai sahin iyau ndrohonoku pwanpwan ta king ipa, “Akahilingiy, kiro mahapo kiya, yumwa Ngindrai andre kiro mwalinga hu ndramat, pe andre kikuw kiropolo hu. Pe yihu ndramat andre karayah ndramiran pe Ngindrai mbukenan andre kiropolo hu pe kirayah Ngindrai tahu. 4 Pe andre kikuwe hu ndruimarahu. Pe kimat andre kinto pwi, pe koisirai pe ndriyang pe ngandran, ara andre kinto pwi, paratesah, hu melit para mamu andre hu kahapwen topwei.”

5 Pwen yiy mepo irompwan ndrohonoku pwanpwan ta king, ara ipa, “Akahilingiy. Yo andre kumbusi melit masih kaya howen!” Pwen ipa, “Aratuluwi nongan upwai iye kiya pwan, paratesah, hu nongan iye ara ndrokonan pe imwonen masih.”

6 Pe ipwai isa kili yo ipa, “Kinhipwen. Yo Umu pe yo Mulan. Yo ara Alpa pe Omeka. Kapa hamou koyun kisapak, ara andre kuhang yiy ndran mepo andre kinsou pwi, mepo andre kiyau ndrakoyou para ndran para taleh. 7 Pwen yihu mepo hu karamwaitini pahun, ara andre hu kaya mbukenahu melit masih kene aro, pe andre kurayah Ngindrai tahu, pe yihu andre karayah norun. 8 Hapeko hu ndramat mepo hu ngara kanoh para kakuni nopwaran, iyapolo hu mepo hu kanpwotisingi lohongahu pwi, pe hu mepo ngara kambusi kultuw mwomwan handra-handra, iyapolo hu mepo para tingundru hu ndramat, pe hu para poya pilah, hu mepo ngara karakau, pe hu ndramat ngara katotohun kiya kili kerewek, pe hu ndramat masih para pwandrandraman—ara andre kasoiyau kiya tahu kaya mwan sakai mepo ita yat namandran. Pe iye ara kimat lusap.”

9 Pwen unime angelou hamou tahu manandrtimou mepo hu mbultuwe pwelekei andrtoyoh mepo ipep iya hu melit mwomwan masih iyahapwen, ara isa pe ipwai isa kili yo ipa, “Asa, andre kupwaingani kisa kili wou pihin mepo nakiyesou kiya kili nambuyun mepo Noru Sipsip.” 10 Pwen Mwoiwan Haiyan isa ndrito pe ihiri yo uyau uya ngondron sih namandran iya pe paingan, pe ipwaingani Kol Namandran Haiyan isa kili yo. Kol Namandran Haiyan ara, ara Yerusalem mepo isa pwan ngawan iyau kol paingan yang kili Ngindrai. 11 Pe ngana Ngindrai ilenganiy, pe ngannganan iya, pe kol ara mwensen tehe pat lahayan pe tehe pat yaspar, pe lewen pe iyih iya tehe kamarai. 12 Pe kowa kol namandran ara, ara niwen pe iya paingan iya, pe hu karam namandran para aliy, ara songui pe luwoh, pe hu angelou songui pe lumou huro hu karam sih-sih. Pe iho ndrita hu karam ara, ara kantatuluwi ngala hu kamai hawum-hawum para Yisrayel songui pe luwum. 13 Pe hu karam namandran maroyoh huya pwen te kup, pe maroyoh huya pwen te hai, pe maroyoh huya pwen te rai, pe maroyoh huya pwen te tolau. 14 Pe kowa kol namandran ara, ara hu soyei iro ndrita hu pat namandran songui pe luwoh, pe ndrita hu pat ara, hu aposel songui pe lumou ta Noru Sipsip, ara ngala hu hamou-hamou huro ndrita hu pat ara.

15 Pe angelou mepo kinwong kinsa kili yo, ara imbultuwe kei kolt hamwat para ndrohonge para kirandrohongani kol namandran ara, iyapolo hu karam namandran para aliy, pe hu kou para aliy. 16 Kol namandran ara, ara mbusungon mahaasai, ndrohongan, ara ihisoule ko, pe ma hongan. Pe irandrohongani kol namandran ara, pe niwen para aliy, pe maihan para aliy, pe sohun ara niwen iya, iya paingan, pe ndrohongan, ara pusongui pe lupou*12,000 stadia; tokples: kiro tehe kilomita pusongui pe lupou, 2, 400 kilometres. . 17 Pwen angelou irandrohongani hitun para kowa kol ara, pe ndrohongan, ara mita andrtingui. Pe irandrohongani kowa kol ara, ara pwen tehe hu ndramat ngara kandrohonge. 18 Pe kowan, ara mbusiy iya pat yaspar, pe kol namandran ara, mbusiy iya pat kolt imwonen, leuwen tehe kamarai. 19 Pe hu pat mepo soyei kol namandran ara iro ndritan, ara kowan nosiy iya hu pat masih lahayan handra-handra. Pe soyei iya pat sih imu, ara pat yaspar, pe soyei iya pat luwoh, ara pat sappaya, pe pat toyoh para aliy, ara pat kalsetony, pe pat haahiu para aliy, ara pat hemeral, 20 pe pat yimah para aliy, ara pat onis, pe pat anoh para aliy, ara pat karniliyan, pe pat andrtoyoh para aliy, ara pat krisolayit, pe pat androlwoh para aliy, ara pat peril, pe pat androsih para aliy, ara pat topas, pe pat songui para aliy, ara pat terkose, pe pat songui pe sih para aliy, ara pat yasin, pe pat songui pe luwoh para aliy, ara pat ametayis. 21 Pe hu karam namandran songui pe luwoh para aliy, ara tehe sowiy lahayan iya. Pe karam namandran sih-sih, ara soyei iya sowiy sih-sih namandran iya. Pe sai namandran para kol namandran ara, ara mangsaniy iya pat kolt imwonen, pwen tehe kamarai leuwen.

22 Pe kunnime hawum yumwa totohun namandran iro kol namandran ara pwi, paratesah, Yapan Ngindrai Pwokeyan, pe Noru Sipsip, ara hilu yumwa totohun namandran para aliy. 23 Pe kol namandran ara, ara mwandrai pe walah ngana hilu, ara kinlahi kilenganiy kiro aliy pwi, paratesah, nganngana Ngindrai ara iyki ngana lang, pe Noru Sipsip, ara sui tehe para aliy. 24 Pe hu kol namandran masih andre hu karikai kiya nganan, pe hu king para kol pwan andre kawiri hu melit hiyan lahayan tahu kaya nondriyan. 25 Pe lang, ara konho wari hu karam namandran para aliy pwi, paratesah, ping andre kapwi. 26 Pe pwesai pe haiye para hu kol namandran masih, ara andre hu kawiriy kaya nondriyan. 27 Pe melit kinmwonen pwi, pe hu kultuw mwomwan handra-handra pe hu ndramat para pwandrandraman, ara andre hu kanna nondriyan pwi, hapeko hu ndramat para kaya nondriyan, ara hu mepo ngala hu kantatuluwiy ita nondriya puk para taleh ta Noru Sipsip.