1 Pwen angelou ara ipwaingani ndran para taleh isa kili yo, lewen pe iyih iya tehe kamarai, irah iyau ndrohonoku pwanpwan ta Ngindrai pe ta Noru Sipsip 2 pe isa pwan ndrokolo sai namandran para kol namandran ara. Pe pwaki ndran maltoh kene, ara kei para taleh iro lek aliy, pe ngara hu kappwai maporosongui pe lusap nondriya walah masih. Pe yowi kei ara, ara para sopwoyani hu ndramat masih kene para kol pwan. 3 Pe andre kaniten ana ndramat kiro aliy pwi. Pe ndrohonoku pwanpwan ta Ngindrai pe ta Noru Sipsip, ara andre kiro nondriya kol namandran ara, pe hu ndramat para poya mbulyan, ara andre hu koro totohun kiya atan. 4 Pe andre hu kanime mbulmaran, pe ngalan, ara andre kiro hu kombuye hu. 5 Pe kinlahi ngana sui sih kiyat kiro kili hu pwi, pe ngana mwandrai andre kinlengani hu pwi, pe ping andre kiya pwi, paratesah, Yapan Ngindrai andre nganan kiro lengani hu, pe andre hu koro mu tehe king kinto pe kinto.

6 Pwen angelou ipwai isa kili yo ipa, “Hu nongan iye ara ndrokonan pe haiyan. Pe Yapan, mepo yiy Ngindrai pe ipwokeyani mwoiwahu poropet, ara ipwandrisa hu angelou tan para hu kapwaingani hu melit mepo pakeh andre hu karayah kiya kili ndramiran hu.”

7 “Akahilingiy, pakeh andre kusa! Pwesai iya kili hiyeh ipwotisingi lohongan iya hu nongna poropet iripo nondriya puk iye.”

8 Pwen yo Yohanes, mepo uhilingiy pe unime hu melit aro. Pe iro mwonen kunnimei pe kunhilingiy, pwen utukuruhu iya pwan ndrika angelou, para kutotohun kiya kili yiy. Angelou ara ipwaingani hu melit masih kene aro isa kili yo. 9 Hapeko ipwai isa kili yo ipa, “Mbuna ambusiy tora! Yo ara hamou para poya mbulen tehe wou opu, pe tehe hu poropet pe nalim hu, pe hu masih hu pwotisingi lohongahu iya hu nongan para puk iye. Atotohun kiya kili Ngindrai opu!”

10 Pwen ipwai isa kili yo ipa, “Mbuna amburi hu nongna poropet para puk iye pe akulaniy, paratesah, lang ara kinsa pakeh. 11 Pe yiy mepo imira mbusi mwomwan, ara kiro mbusiy manau, pe yiy mepo imira mbusi kultuw pwassin, ara kiro mbusiy manau, pe yiy mepo imira mbusi hiyan, ara kiro mbusiy manau, pe yiy mepo imira haiyan, ara kiro haiyan.”

12 “Akahilingiy, pakeh andre kusa! Pe andre kusaiki kene hu ndramat masih kiro ndruwa tesah hu kanmbusiy. 13 Yo Alpa pe Omeka, pe Umu pe Mulan, pe yo Ndroiyin pe yo Hipwen.”

14 Pwesai kiya kili hu mepo hurahi hu koiwehu, pwen andre kapa hiyan katahu para hu kayan mbuwa kei para taleh. Pwen andre hu kasong karam namandran kaya nondriya kol namandran. 15 Pe hu mepo ngara hu kambusi pakut pwassin, hu mepo ngara karakau, hu para katingundru ndramat, hu para popilah, hu mepo ngara katotohun kiya kili hu nombungong, pe hu masih mepo ngara kanamiliy para kapwandrandraman, hu masih ara, ara andre hu koro ngawan tehe mwiy.

16 “Pe Yo Yesu, ara upwandrisa angelou to para kisaiki titiye iye kisa kili wawu. Yo ara tumbu pe ndraye Tepit, pe yo ara Piriya Lang ngannganan.”

17 Pe Mwoiwan Haiyan pe pihin nakiyesou, ara hilu pa, “Asa!” Pe yiy mepo mandraingan, ara kipa, “Asa!” Pe sehe ndramat koyun kisapak, ara kisa. Pe sehe ndramat kinamiliy, ara kiwiri ndran para taleh mepo kenen pwi.

18 Pe upwatisingi nongan iya kili hu ndramat masih mepo huhilingi hu nongna poropet para puk iye: Kapa ndramat hamou kiposura hu nongan iye, ara Ngindrai andre kiposura hu nopwaran mwomwan mepo kanratiyaniy iripo puk iye kiya kili yiy. 19 Pe kapa ndramat hamou kirapiyani hu nongan kiya mawen nongna poropet iripo puk iye, ara Ngindrai andre kiwiri sohoyan hira kei para taleh kiya mawen pe ita Kol Namandran Haiyan i, mepo kantiyaniy iripo puk maiye iye.

20 Yiy mepo itiyani hu nongan iye, ara ipa, “Ehe, Yo pakeh andre kusa.” Ndrokonan. Asa, Yapan Yesu.

21 Pe pahas ta Yapan Yesu kiro kili hu ndramira Ngindrai. Ndrokonan.