Repelesen
Nongan kokohon ta Yesu Kristus isa yelan ngawan
(ENG: Revelation; TP: Krais i Kamapim Tok Hait)
Nongan imu
Hu ratuluwi nongan iye ara iro mwonen hu ndramat huro mwisnani hu Kristen, paratesah, hu Kristen ara ngara hu kapwotisingi lohongan hu tehe Yesu Kristus ara yiy Namandran tahu. Puk iye ara nakipwokeyani lohongai ndrisiyon tahu Kristen, pe andre hu nopwaran kinpworuwi hu.
Puk iye ara iwong iya hu nongan pwandritiye iya hu melit mepo andre kirayah kamulan. Hu Kristen para lang ara, ara hupahas iya nongan pwandritiye iye, hapeko hu ndramat hukowu ta Ngindrai ara hu kanpahasaniy pwi. Pe ndroiyi nongan pwandritiye ara ipa toro; Yesu Kristus ara yiy Namandran, pe iyau pwoke tan opu, Ngindrai andre kirapiyani hu ndramat hu humwisnani yiy pe andre kipwalngani Sinai i. Pe Yesu imbusi mbuliyan iya hapwen, pe Ngindrai andre kirapasa hu ndramat mepo huro tine pwokeyan pe hu kantali lohongai ndrisiyon tahu pwi. Yihu andre hu koropolo Ngindrai pe andre hukonto nondriya nopwaran pwi, paratesah, Ngindrai andre kimbusi melit masih kirayah howen.
1
Ndroiyi Nongan
1 Nongan iye ara nongan kokohon ta Yesu Kristus, mepo Ngindrai iykiy iya kili Yesu para kipwainganiy kiya kili hu ndramat para poya mbulyan iya tesah mepo andre kindrou pwi kirayah. Pe ipwandrisa angelou tan isa pe imbusi nongan iye isa ngawan kili ndramat para poya mbulyan Yohanes. 2 Pe itiyani melit masih kinnimei, mepo nongna Ngindrai, pe titiye ta Yesu Kristus. 3 Ngindrai andre kiyki lomwes kiya kili yiy mepo kinime hu nongan utiyaniy iya nongna poropet iye. Pe lomwes kiya kili hu mepo hu hilingiy pe huwiriy iya ndriya hu tesah mepo kanratuluwiy ita aliy, paratesah, lang ara kinsa pakeh.
Yohanes iratuluwi nongan iya kili hu ekklesiya andrtoyoh
4 Yo, Yohanes, uratuluwi nongan iye iya kili hu ekklesiya*Eng: church; Greek:<<ekklesia>> TP: <<ara hu ndramat husa rokum>> andrtoyoh ita nondriya kol namandran iya Esiya: Ngindrai para koluw, mahapo, pe andre kisa kamulan, iyasura hu mwoiwan andrtimou mepo hu tora mbulmara ndrohonoku pwanpwan para king tan, ara andre hu kaiki pahas pe ndriya wayis tahu kisa kili wawu.
5 Pe Yesu Kristus mepo malohongan ndrisiyon ara ngara kipwokeyani nongan, yiy ara ndrohan iyau kimat†ndrohan iyau kimat, Yesu itine imu iyata hu ndramat masihEng: firstborn from dead, pe yiy iramwaitini hu pohon tahu king masih para kol pwan.
Pe ndriyan imbulihi worou pe ndreyen, ara isurahi hu pakut mwomwan torou masih iyau.
6 Pe imbusi worou tuho pahandran tehe yiy king, pe imbusi worou turayah hu pris para kambulyani mbulya Taman Ngindrai. Pe andre kahari ngalan pe pwoke ara atan mepo kinto kinto! Ndrokonan.
7 Akanimei! Yiy itapo isa iyasura hu kokom,
pe mara ndramat masih andre kanime yiy,
hu mepo hussi yiy, ara andre hu kanime yiy i,
paratesah, tunan yiy opu, pwen hu ndramat masih para kol pwan, ara andre hu karang malihu.
Pwen andre kirayah tehen aliy! Ndrokonan.
8 Yapan Ngindrai ipa, <<Yo Alpa pe yo Omeka, yo para mahapo, koluw, pe andre kusa. Yo Ngindrai Pwokeyan Masih.>>
Hamou tehe Noru Ndramat
9 Yo, Yohanes, mepo nali wawu, pe tususuye iyawule, pe tunan Yesu ko, tukuni nopwaran, pe tuwayis pe tupwokeyani rou, pe tumbusi mbulen para Kingtom ta Ngindrai. Pe koluw uro mbuson para Patmos, paratesah, iya nongna Ngindrai, pe iya titiye ta Yesu. 10 Iro mwonen ‡Lenge Yapan para kambultere pe katotohunLenge Yapan, pwoke ta Mwoiwan Haiyan ara isa ndrito, pe uhilingi mbulukoyu hamou iwayeh pwokeyan iya, iyau te ndruwo tehe ndrah sih, 11 mepo ipa toro: <<Aratuluwiy tesah animei kiya puk maiye, pe arapayaniy kiya kili hu Kristen mepo hutora ekklesiya manandritoyoh: Kiya Epesus, Smirna, Perkamum, Tayatira, Sartis, Pilatelpiya, pe Layotisiya.>>
12 Pe urapaiwani yo para kunime mbulukoyu yiy iro wong isa kili yo ara, pe iro mwonen urapaiwani yo, unime mwan makakahu andrtoyoh mbusiy iyau pat kolt. 13 Pe mwalinga mwan ma kakahu ara, ara hamou tehe Noru Ndramat, kinsuluye yiy kinna koyau niwen iya toton iya ndrikan, pe kondrei kolt irakaiyani wiyineren. 14 Payan pe kompayan ara pallen tehe§yomwu sipsip ara tehe yomwu yowat pallen yomwu sipsip, pe pallen tehe koh, pe maran, ara ngannganan iya tehe mwan iroholulun. 15 Ndrikan ara pipiryan iya tehe pat prons mwan iro iyat ndroho mwan namandran, pe mbulukoyun ara tehe ngasa ndran huro tah. 16 Pe iro niman mot, ara imbultuwe hu piriy anandrtoyoh huro aliy, pe iyau pohon isa ngawan ara semen hapai maran malsai. Pe mbulmaran, ara ngannganan iya tehe mwandrai ising pwokeyan iya.
17 Pwen iro mwonen unime yiy, ara uyos uya ndrikan tehe ndramat kinmat. Hapeko iyki niman mot isa ndrito pe ipa, <<Mbuna anoh! Yo ara Umu, pe yo ara Mulan para melit masih. 18 Yo kunmat pe kunsatine, hapeko mahapo urupo mwalen kunto pe kunto, pe urupo Mwalen Lang Masih! Pe yo ara umbultuwe hu ki para kimat, pe ta hu ndramat suw.
19 Aratuluwi tesah annimei, melit mepo andre kirayah mahapo, pe melit mepo andre kirayah kamulan. 20 Nongan kokohon para piriy manandrtoyoh annime mepo iro nimo mot, pe mwan makakahu anandrtoyoh, ara iye: Piriy manandrtoyoh, ara hu angelou manandrtimou para hu ekklesiya manandrtoyoh, pe mwan makakahu, ara hu ekklesiya manandrtoyoh.>>