2
Nongan iya kili sios para Epesus
1 “Hu nongan iya kili angelou para sios para kol ngawan *Jesus told John to write to the angel but the message was for the believers in Ephesus. The angel was the messenger to the believers in Ephesus.
TP: Yesu iwong iya kili Yohanis para kiratuluwi nongan kiya kili angelou, hapeko nongan ara, ara ata hu ndramat hupwotisingi lohongahu, hutora kol ngawan Epesus. Pe angelou ara, ara yiy ndramat para sapiya nongan iya kili hu ndramat mepo hu pwotisingi lohongahu hurora kol ngawan Epesus.Epesus ara ratuluwiy toro:
TP: Yesu iwong iya kili Yohanis para kiratuluwi nongan kiya kili angelou, hapeko nongan ara, ara ata hu ndramat hupwotisingi lohongahu, hutora kol ngawan Epesus. Pe angelou ara, ara yiy ndramat para sapiya nongan iya kili hu ndramat mepo hu pwotisingi lohongahu hurora kol ngawan Epesus.Epesus ara ratuluwiy toro:
Nongan iye iyau kili yiy mepo piriy manandrtoyoh hu tora niman mot, yiy mepo hira rikai mwalinga mwan ma kakahu mbusiy iyau pat kolt manandrtoyoh, pe ipa toro:
2 Yo upahasani kultuwayi wawu, pe mbulen pwokeyan wawu mbusiy, pe upahasaniy tehe wawu ngara karahatini wawu pwokeyan. Upahasaniy tehe wawu kanlahiy para kasusuye kiyapolo hu mepo ngara kambusi kultuw pwassin pwi. Hupa yihu ara aposel, hapeko wawu nohonou hu pe wawu yirowei tehe yihu ara ndramat para pwasoyou opu. 3 Wou apwotisingi ngolo, pwen pe aya nondriya nopwaran paraliy pe arahatini wou, pe upahasaniy tehe ndrina merem ara kinho mat pwi.
4 Hapeko lohongai sahin kunpwes kinsa atam iya aliy pwi, ara toro: Ndriyam imbuluhi yo para mamu, ara antaliy. 5 Alohongani kultuwayim para mamu ngara aro mbusiy, kultuw ara, ara antaliy pe anyos. Pwen pe arapaiwani ndriyam pe ambusi hu kultuw tehe mamu aro mbusiy. Pe kapa antapaiwani ndriyam pwi, ara andre kusa kili wou pe kuwiri mwan tam ma kakahu kisa mawen ndrohonokun. 6 Hapeko melit handra unamiliy ita kili wou, ara toro: Wou amwisnani kultuwayi hu yowe Nikolas, pe yo ara umwisnanihu yi.
7 Pwen yiy mepo mandraingan, ara kihilingi nongan Mwoiwan Haiyan iripo wong iya kili hu sios. Pe hiyeh kiramwaitini pahun, ara andre kupa hiyan kiyatan para kiyan kiyau kei para taleh, mepo ita kol nonowan ta Ngindrai.”
Nongan iya sios para Smirna
8 “Hu nongan iya kili angelou para sios para kol ngawan Smirna ara ratuluwiy toro:
Nongan iye iyau kili yiy mepo Imu, pe yiy mepo Mulan, hiyeh imat, pe isatine paiwe.
9 Upahasani hu nopwaran tam pe tesah androisiy—hapeko menmenam ara soyon. Pe upahasani hu mepo hurasusut nongan mwomwan isa kili wou, ara hupa hu para Yutah, hapeko yihu para Yutah pwi. Pe yihu ara para yumwa mbultere ata Sinai. 10 Pe wou mbuna anoh nopwaran naya nondriyan. Upwai isa kili wawu, Sinai andre kiyki hayah tawawu kaya kou para kinohonou wawu, pe andre akaya nondriya nopwaran kiho nondriya lang masongui. Pe apwotisingi lohongam kipoo ayamat, pwen yo andre kuhang wou taleh tehe kenem.
11 Yiy mepo mandraingan, ara kihilingi tesah Mwoiwan Haiyan iripo wong iya kili hu sios. Pwen yiy mepo kiramwaitini pahun, ara andre kinwiri ngandran kiho nondriya kimat lusap pwi.”
Nongan iya kili sios para Perkamum
12 “Hu nongan iya kili angelou para sios para kol ngawan Perkamum, ara ratuluwiy toro:
Nongan iye iyau kili yiy mepo masemela pahun niwen maran maltoh, pe maran iya.
13 Upahasani ndrohonokum ata aliy—mepo ndrohonoku pwanpwan ta Sinai. Hapeko wou apwahatini ngolo pwokeyan, pe anpa pwi kinna lohongai ndrisiyon tam pwi iro hu lang ta Antipas, yiy mepo ipwokeyani lohongan ndrisiyon pe ipwainganiy, pe itingundrun iro kol namandran tam—mepo ndrohonoku Sinai.
14 Hapeko lohongai hayah iripo kili yo, mepo kunpwes isatam iya aliy pwi toro: Ndramat hayah hutora kili wou, ara hu pwotisingi hinonou ta Palaam, yiy mepo ihinuwani Palak para isuhuhuri hu ndramira Yisrayel para hu kambusi pakut mwomwan para hu kayan anandrinai mepo kaniykiy tehe yukyuk iya kili hu kerewek, pe hupo pilah. 15 Tehen aliy o yi, hu ndramat hayah hutora kili wou, ara huho ndruwa hinonou ta hu yowe Nikolas. 16 Tehen tora ko akarapaiwani ndriya wawu! Matisan, kusa kili wou kileh, pe kurahatai kiyapolo hu ndramat ara kiya semela pahun iyau poho. 17 Yiy mepo ma ndraingan, ara kihilingi tesah Mwoiwan Haiyan iripo wong iya kili hu para sios. Yiy mepo iramwaitini pahun, ara andre kuhang yiy manna hayah mepo ita kohon. Pe andre kuhang yiy pat sih pallen i, iyapolo ngalan handra howen andre kuratuluwiy kiro aliy, pe yiy mepo iwiriy opu ipahasaniy.”
Nongan iya sios para Tayatira
18 “Hu nongan iya kili angelou para sios para kol ngawan Tayatira ara ratuluwiy toro:
Nongan iye iyau kili Noru Ngindrai Kamai mepo maran ara tehe mwan iroholulun, pe pwelekan ara tehe paras ma ngannganan.
19 Upahasani hu kultuwayim, lohongam ndrisiyon pe namiliwam, pe apwotisingi totohun tam, pe aro tine pwokeyan. Pe kultuwayim para mahapo, ara iramwaitiniy para mamu ngara aro mbusiy.
20 Hapeko lohongo hape mepo kunpwes pwi isatam toro: Wawu pa hiyan iya ata pihin mepo Yesepel, yiy ipohowe yiy poropet hamou. Pe hinonou tan, ara ipakarawani hu ndramat para poya mbulyo iya kultuw para pilah, pe huyan anandrinai mepo kaniykiy pwen tehe yukyuk iya kili hu kerewek. 21 Yo uiki lang iyatan para kirapaiwani ndriyan kiya kultuwayin para pilah, hapeko mbuwalin para kirapaiwani ndriyan. 22 Pwen tehen tora ko, andre kuiki Yesepel kiya nondriya ngandran handra namandran, pe andre kiro matin o, pe andre kumbusi hu mepo hu popilah iya sura yiy, ara andre hu kakuni ngandran pwokeyan iya, kipoo hu karapaiwani ndriyahu kiya hu kultuwayen. 23 Pe andre kutingundru norun hu kamat. Pwen andre hu sios masih kapahasaniy tehe yo, ara yiy mepo upahasani ndriya hu ndramat pe lohonga hu ndramat, pe andre kuiki kona hamou-hamou kiho ndruwa hu kultuw tawawu. 24 Pe nakupwai kisa kili wawu masih tora kol Tayatira mepo akanpwotisingi lohonga wawu kinna hinonou tan pwi, pe akanwiri hinonou para nondriya lohongai kokohe ta Sinai pwi. Ara andre kuniyki nopwaran handra yi kinsa ndrita wawu pwi. 25 Akapwotisingi lohonga wawu pwokeyan kiya tesah ita kili wawu, kipoo kumui kusa.
26 Sehe ndramat kiramwaitini pahun pe kimbusi namiliwo pwokeyan kipoo lang kiyahapwen,
ara andre kuiki pwoke nopwaran kiya kili yiy para kiro mu kiya kili hu kol namandran masih.
27 Yiy andre kiro mu tehe ndramat para pwokereya sipsip iyapolo nes hayen sih, pe andre kiro mu kiyapolo ndrangsai, pe andre kirasumbuwanihu kiya mendremendreheh tehe kohoi mbusiy iya pwan perembun.†Revelesen 2:26-27 ara, ara tehe Psalm 2:3-9.
28 Pwen tehe yo mbukeno ara uwiri pwoke nopwaran iyau kili Tomo, pe andre kuhang yiy pwoke mangananganan tehe piriya lang. 29 Yiy mepo mandraingan, ara kihilingi tesah Mwoiwan Haiyan iripo pwai iya kili hu sios.”
*2:1: Jesus told John to write to the angel but the message was for the believers in Ephesus. The angel was the messenger to the believers in Ephesus. TP: Yesu iwong iya kili Yohanis para kiratuluwi nongan kiya kili angelou, hapeko nongan ara, ara ata hu ndramat hupwotisingi lohongahu, hutora kol ngawan Epesus. Pe angelou ara, ara yiy ndramat para sapiya nongan iya kili hu ndramat mepo hu pwotisingi lohongahu hurora kol ngawan Epesus.
†2:27: Revelesen 2:26-27 ara, ara tehe Psalm 2:3-9.