3
Lohongai ndrisiyon ata Ngindrai
1 Pwen tesah hiyan andre kawiriy kapa karayah tehe Yutah hamou, ndre tesah hiyan andre kawiriy kiyau kultuw para sosondrih sangi ndramat? 2 Pe iyau poho sai soyon masih! Pe Ngindrai ipwotisingi lohongan iya kili hu Yutah imu iya hu nongnan.
3 Pe kapa yihu hayah lohonga hu ara ndrisiyon pwi, pwen lohonga hu ndrisiyon pwi ara andre kimbusi Ngindrai pe lohongai ndrisiyon andre kinto kili yiy pwi, ndre? 4 Pwi masih! Ngindrai ara ngara kiwong ndrokonan, pe hu ndramat masih ara ngara hu kapwasoyou. Tehe pwayan kinpwai pwen ipa,
“Pe kapa awong, ara nongnam andre kipwainganiy tehe wou awong ndrokonan.
Pe andre aramwaitini hu mepo huiki wou aro tine nongan.”
5 Hapeko kapa hu kultuwayi worou kinmwonen pwi ara kimbusi kultuwayi Ngindrai imwonen kisa ngawan masih, pwen andre tukapa tesah? Pwen andre kipwainganiy tehe Ngindrai ara kultuwayin hiyan pwi, pe iyki ndrinalokuh tan isa kiltou? (Yo urupo wong ara iya lohonga ndramat o mwaihei.) 6 Ara pwi yoh! Pe kapa Ngindrai kultuwayin hiyan pwi, pwen andre kiramwanye hu ndramat tapeh? 7 Pe hamou andre kikokou kipa, “Kapa pwasoyou to kipwaingani nongan ndrokonan ta Ngindrai kisa yelan, pwen paratapeh pe hutopo tasusut nongan isa kili yo tehe pakut to ara mwomwan?” 8 Hu ndramat hayah hu rakokowani rou hupa toro, “Tukoro mbusi pakut mwomwan, pwen hiyan andre kipwen aliy.” Pwen hu mepo hu rakokowani rou tora, ara andre hu kakuni kora hu.
Ndramat hamou kultuwayin ngara kiro mwonen o, ara pwi
9 Pwen andre tukapa tapeh ara? Worou hiyan, ndre? Pwi masih! Paratesah, worou kanpwainganiy pwen tehe worou Yutah pe hu Ndramira Lah, ara worou masih tuyawule ko, ngara worou karo pahandra pwoke para pakut mwomwan. 10 Pwen tehe pwayan kinpwai toro:
“Ndramat hamou kultuwayin ngara kiro mwonen o, ara pwi. Hamou pwi.
11 Pe ndramat hamou ngara lohongai ileu kiro kili yiy o, ara pwi.
Pe ndramat hamou ngara kiho ten Ngindrai o, ara pwi.
12 Pe hu ndramat masih lohongahu kintali Ngindrai,
pe hu masih kana pwalngengei,
Pe ndramat hamou ngara kiro mbusi hiyan o, ara pwi,
hamou pwi masih.
13 Pe poho hu ara ita te tehe hu ngat para tona hu ndramat,
pe hu ngara kapwandrandraman kiyau kalamehu.
Pe mbuwangusu hu, ara tehe hu mwat mapairahu.
14 Pe pohohu ara ipep iya hu nongan tunguyan para tenten.
15 Pe ndrikahu ara lahilahin para hu katingundru hu ndramat.
16 Pe nopwaran pe ngandran, ara ita memeranihu,
17 pe hu kowu iya sai para ndriya wayis.
18 Pe nohowai ta Ngindrai, ara kinto kili hu pwi.”
19 Pwen worou pahasani tehe tesah nongan para pwahanou ipwai, ara iwong iyata hu mepo hutora pahandra nongan para pwahanou, pwen hu ndramat masih andre hu kahun o. Pe andre Ngindrai kipwaingani kora mwomwan ta hu ndramat masih. 20 Pe hamou andre kinpa kultuwayin imwonen iya mbulmara Ngindrai iyau lohongai para nongan para pwahanou, ara pwi. Pe iya nongan para pwahanou opu, worou tuyirowe pakut mwomwan torou.
Tuwiri kultuw imwonen kiyau lohongai ndrisiyon
21 Hapeko mahapo, kultuw imwonen ta Ngindrai ara kinsa yelan, pe andre tukonto ndruwa nongan para pwahanou pwi, konan kapa Nongan Para Pwahanou pe hu poropet kanratiyaniy. 22 Pe kultuw imwonen aro, ara Ngindrai kiniykiy iyau kili Yesu Kristus iya kili hu ndramat masih mepo hu pwotisingi lohongahu. Pe kultuwaye Ngindrai iya kili hu Yutah pe hu Ndramira Lah, ara iyaharong o, 23 paratesah, hu ndramat masih ara hu kanmbusiy pakut mwomwan, pe hu topo mawen iya sopwat para nonowa pwoke ta Ngindrai. 24 Pe iyau pahas ta Ngindrai, pwen imbusi worou tutopo mwoimwoi pe turopo mwonen, irakonuhi rou iyau kili Kristus Yesu. 25 Pe Ngindrai kinyingani Kristus kinna ngawan tehe yukyuk sih iyau kimat tan, pe iyau ndreyen mepo imuw—para andre kirapiyani hu pakut mwomwan torou kiyau lohongai ndrisiyon. Yiy imbusiy toro para kiyingani kultuw imwonen, paratesah, koluw, ara iwayis o pe kiniyki kora hu ndramat hu mbusi hu pakut mwomwan pwi— 26 Ngindrai imbusiy toro para kipwaingani kultuw imwonen tan kiro lang mahapo, pwen pe kultuwayen andre kimwonen, pe yiy andre kimbusi hu mepo huiki lohongahu ndrisiyon iya kili Yesu, ara andre hu koro mwonen.
27 Pwen, kiya, andre kasikiye ndramat kiya tesah? Pwi yoh. Paratesah, iyau sehe lohongai para nongan para pwahanou? Nongan para pwahanou mepo ngara kimbusi mbulen? Pwi yoh, hapeko iyau nongan para pwahanou mepo iyki lohongai ndrisiyon. 28 Paratesah, ndramat hamou ara andre kiro mwonen kiya lohongai ndrisiyon tan, pe andre kanmbusiy kinyau tesah nongan para pwahanou ipwai, ara pwi. 29 Ndre Ngindrai, ara Ngindrai ata hu para Yutah ko? Pe yiy Ngindrai ta hu Ndramira Lah i, ndre pwi? Ehe, Yiy Ngindrai ta hu Ndramira Lah i. 30 Pwen Ngindrai torou ara hamou opu, pe imbusi hu hurayah imwonen ara kinyau sosondrih sangi ndramat pwi, pe iyau lohongai ndrisiyon tahu. Pe hu ndramat kansosondrih kinna ta hu pwi, ara lohongai ndrisiyon tahu iyawule ko. 31 Pwen lohongai ndrisiyon iye ara kinrapiyani nongan para pwahanou, ara pwi masih, ndre? Pwi masih! Lohongai ndrisiyon ara, ara ipwokeyani nongan para pwahanou.