1 Pe andre tukapa tesah kiyata tumbu worou Apraham mepo yiy ndraye rou? Pe tesah kinmbusiy mepo imbusi yiy imwonen iya kili Ngindrai? 2 Pe kapa ndrokonan tehe Apraham, kultuwayin imwonen, ara iya hu mbulyan, pwen ilahiy para kisomwani yiy kiya aliy—hapeko andre kinsomwe yiy kinto mbulmara Ngindrai pwi. 3 Pe Nongan Haiyan ara ipa tesah? “Apraham ipwotisingi lohongan iya kili Ngindrai, pwen Ngindrai iyki kenen ara kultuw imwonen.”

4 Pe yiy mepo kipo mbulen, ara kennen mepo andre kasowani yiy kiya aliy, ara tehe yukyuk pwi, hapeko ara iya soiwi mbulyan. 5 Hapeko ndramat mepo kinhopo mbulen pwi, pe iyki lohongan iya kili Ngindrai, mepo ngara kirapaiwani kultuwayi hu ndramat kultuwayi hu pwassin, ara lohongai ndrisiyon tahu ko, pwen Ngindrai andre kiyki kene hu ara kultuw imwonen. 6 Pwen tehe Tepit iwong iyawule iro mwonen ipwai iya lomwes ata yiy mepo Ngindrai iyki kenen ara kultuw imwonen, hapeko kinyau mbulyan pwi.

9 Pe pwesai mepo Tepit iwong iya aliy, ara ata hu ndramat mepo hu sosondrih sangi hu ko, ndre, iyata hu ndramat mepo hu kansondriti sangi hu pwi yi? Worou ngara kapa lohongai ndrisiyon ta Apraham, ara imbusiy pwen Ngindrai kiniyki kenen ara kultuway imwonen. 10 Pe Apraham ara iwiri kenen tehen tapeh? Apraham kinsondriti sangin pwen, ndre mapu? Apraham, ara kinsondriti sangin mapu, pe Ngindrai ipohowe yiy ara ndramat imwonen. 11 Pe iyamulan Apraham isondriti sangin, pe irayah tehe kinima melit ipwainganiy tehe iyau lohongai ndrisiyon tan, pwen Ngindrai ipohowe yiy ndramat imwonen ma kansosondrih sangin mapu. Pwen yiy ara tumbuhu ndramat masih mepo hu kansondriti sangi hu pwi, hapeko yihu pwotisingi lohongahu. Pwen Ngindrai andre kiyki kene hu ara kultuw imwonen. 12 Pe yiy yi ara tumbu hu ndramat mepo hu kansondriti sangi hu. Pe hu kansondriti sangihu ko pwi, hapeko yihuho ndruwa kultuwayi tumbu rou Apraham mepo kansondriti sangin mapu, pe lohongan ndrisiyon, ara iro.

13 Pe tapaniu mepo Apraham pe ndrayen hu kanwiri tehe andre hu karayah mbukena kol pwan, ara kinyau nongan para pwahanou pwi, hapeko iyau lohongai ndrisiyon mepo imbusi hu hurayah ndramat imwonen. 14 Paratesah, kapa tapaniu mepo Ngindrai iykiy, ara para kiya kili hu mepo huho ndruwa nongan para pwahanou, pwen lohongai ndrisiyon, ara lohongai mwaihei o. Pe tapaniu ta Ngindrai ara irayah melit mwaihei. 15 Paratesah, nongan para pwahanou, ara ngara kiyki ndrinalokuh ta Ngindrai. Pe kapa nongan para pwahanou pwi, pwen hu ndramat andre hu kandrihisani nongan.

16 Pwen tehen tora ko, tapaniu isa, ara iyau lohongai ndrisiyon ta Apraham, pwen pe hu ndraye Apraham masih, ara andre hu kawiri tapaniu kiyau pahas ta Ngindrai—pe tapaniu ara, ara kinna kili hu mepo huho ndruwa nongan para pwahanou o, ara pwi, hapeko iya kili hu mepo lohongahu ndrisiyon tehe ta Apraham i. Apraham ara irayah tumbu rou masih. 17 Pwen tehe pwayan kinpwai toro: “Yo kunmbusi wou antayah tumbuhu ndraye hu ndramat soyon.” Pwen Apraham ipwotisingi lohongan iya kili Ngindrai, pe yiy ara tumburou—pe Ngindrai mepo ngara kiyki taleh kiya kili hu ndramat kanmat, ara ngara kimbusi hu melit kanto pwi para karayah.

18 Pe konan hu ndramat masih hu kanpwotisingi lohongahu pwi iya melit mepo itapo isa, Apraham ara ipwotisingi lohongan iya melit itapo isa, pwen irayah tumbuhu ndraye hu ndramat soyon. Pwen tehe titiye kinpwai kinna tan, “Pe tumbum hu ara andre hu kahon.” 19 Pe Apraham ara hayou tan ara masangat, pe kinna parangoloh masih, hapeko lohongai ndrisiyon tan, ara ipwokeyaniy—pe mbundropwa Sara, ara kinlahiy para kipo mbunah pwi. 20 Pe lohonga Apraham mepo ipwotisingiy, ara kinmeu kinna tapaniu ta Ngindrai pwi, hapeko lohongai ndrisiyon tan ara iyki pwoke iya kili yiy, pe ihari ngala Ngindrai. 21 Pe ipwotisingi lohongan pwokeyan tehe tapaniu mepo Ngindrai kinmbusiy, ara ilahiy para kimbusiy kirayah. 22 Pwen tehen tora ko, “Lohongai ndrisiyon ta Apraham imbusi Ngindrai iyki kenen ara kultuw imwonen.” 23 Pe hu nongan mepo ipa, “kinwiri kenen” ara kantatuluwiy kinna atan opu, ara pwi, 24 hapeko nongan ara iwong isa kili tou i, tehe Ngindrai andre kiyki kenerou ara kultuw imwonen— paratesah, tupwotisingi lohonga rou iya kili Ngindrai tehe yiy ihingini Yesu Yapan torou itine kimat. 25 Ngindrai iyki yiy para katingundrun kiya hu pakut mwomwan torou, pe ihingini yiy isa mwalen para kimbusi worou tukarayah ndramat imwonen.