1 Nakrlzq kx mzli ka tqaenzli-ngrgu nzyzlu-krm Jiszs sa naprtr-kzku mz nzkxpungr kang kqlu. 2 Murde kxmule-esz' nzrpilr kx nzlxngitilr Jiszs, a' leplz nzkqlung sa navz-rbrng. Sa na-aoti txpwz drtwrdr nidr esz'-krdr, x namrlzbz badr trau. Sa naglqpx-lzbqng x nalcpung. Sa narpibqting leplz x narnzlvzolr natq trtedr x lxedr. Trna-abrtzlvzlru da kxmrlz x trna-amatq-kzlru Gct. 3 Trpnzngr scdr nivz x trnakrlzlru nzipqngr leplz. Trna-aclvetio-lzbqung x sa narpikiti-katong leplz. Trpnzngr nzrycngr mz drtwr badr, x sa natrka badr da kxmrlz amrlx. 4 Trpnzngr nardr x sa na-amwalr kztedrng. Sa namrlzbz badr alwx ngr nrkrdrtqdr namyaszpxle nzvz-nqblq-krdr Gct. 5 Leplz lcng sa naprtrpqng bagu mz nzrpi-krdr kx nidr lrmakxtr. A' trtingr, murde trnzrlrpx-lzbq-ngrpwzung mz zmatq ngr Mqngrkxtr, nztekqtr-krde nabzdr. Delc nayrlqpx-lzbq-ngrbzku badr.

6-7 Kzdung leplz kxnzmulr lcng nzprtrpzng mz ma nyz olvz kcng nzrlxngiti-krdr trxplru, mz nzesabrti-krdrleng mz nzalvztr-rbr-krdr. X olvz lcng nzvz-nqblq-txpwzlr drtwrdr esz'-krdr. X o ani txpwz nzrtwz-krdr nrpa kznike vzne, murde nzrpilr narmcti-ngrdr nrwx. A' rblx nzkrlz-krdr da angidr murde suti drtwrdr alwx ngrdr namyaszpxle nzvz-nqblq-krdr Gct, kc tqngi nou nrwx. 8-9 Ncblo kcng tzvznebzng mz ma lcng, nzpibqtilr Nrpakxmrlz. Murde nzao-krdr drtwrdr kxdrka'-ngrng, x nzvz-rbrng mz nzrlxngiti-krdr. Ncblo lcng nzapulr Janzs x Jabrzs kcng bqnc, tzpibqtilr nzalvztrkr Mosis. A' nzpokia-krdr aelwapx-lzbqpengr. X mz nqmq lcpwz, ncblo kcng tzvzneng mzli ka, nzvz-rbr-krdr sa naopx kalr. *Mzle-lzbq lcng, Janzs x Jabrzs, drtqdr trnzyroung mz Nzryrngrkxtr. A' mz nqmq kr lr Jiu, nzrpilr kx ncblo lcng nidr ncblo neng King r Ijipt kxnzrngineng dabo ngr nzaelwapx-krdr rkx kx vzpxm mz drka'. [Nzrlaszngr 7:11-22; 8:7-19]

10 Timoti, vz-nqblqpeq nzalvztr-krnge, nqmq krnge, me pnz drtwrnge, nzrlxngiti-krnge, trnzngya-ani-kru drtwrnge, nivz lrnge, x nztu-amqngi-krnge. 11 X krlzpeq kxmu nzatrkati-krdr ninge, x nzaetq-krdr drtqnge mzli kc tqmnc-ngrne mztea Adiok, Ikonizm, x Listra. ✡Aposol 13:50; 14:4-6, 19-20 Kxmule-esz' sc tzatrkatilr ninge, a' Kxetu rgu sc tqokatrpele ninge x arlapxle ninge murde ma tqbzx. 12 Murde da zpwxtx kx leplz amrlx kcng tzsuti drtwrdr nzvz-nqblq-krdr me pnz drtwr Gct mz nzlxngiti-krdr Mevalu Jiszs, sa na-atrkati kz leplz nidr. 13 A' leplz kxdrka'-ngrng badr kxnzpokia-ngrdr kxnzlxngitilr Jiszs, nztrka-krdr sa naetunepx zvz. X sa naesabrtilr leplz murde nzesabrti-kaing.

14 Timoti, krlzq kx nzalvztr-krgr ngi da angidr, murde krlz-zpwxq nigr kcng tzalvztrlr nim. Delc, navz zvz mz nzlxngiti-krmle. 15 Abzo mzli kc tqtopwzbe-ngrn, krlz-zpwxq Nzryrngrkxtr. X zmatq ngrde alvztrpele nim kx nabrti drtwrm Mevalu Jiszs mz nzarlapx-krde nim. 16 Gct kaomle natq amrlx mz Nzryrngrkxtr mz zmatq ngr Mqngrkxtr, murde natq lcng naokatrlr leplz mz nzalvztr-krdr nidr, mz nzlc-apqbz-krdr nidr, mz nzatubqti-krdr nidr, x mz nzaelwapx-krbzlr badr nzmncngr kxtubqbz mz nzobqkr Gct. 17 Murde doa nedeng, naoliqting mz nzale-krbzlr da kxmrlz mz leplz.