6
Ncblo Nzrlimzng Kx Na-aclveng Dalr Makxtr
1 Mz zbq lcng, leplz neng Jiszs nzkqlunepxpeng. X sc tzavzti-zvzbelr nzakingr dztudrng badr kztedrng kcng trnzrngiscung. Mzli lc lr Jiu kxnzrlxngiting kcng tzycmneng mz natq lr Grik, drtwrdr lctrpz mz lr Jiu kxnzrlxngiting kcng tzycmneng mz natq lr Erameik. Nzrpibzlr kx, “Mzli kang kqlu, da kx suti drtwrdr olvz negrng kxnzbzsz ncblo ngrdrng trnzkapwzu badr mz nzakingr dakxnzng!” ✡1 Timoti 5:3-16 2 Zbz aposol kcng nzkqlebzlr kxnzrlxngiting amrlx, x sc tzrpipebzlr badr kx, “Trbrngzpwzu bagr nzesakikr nzryapwxpx-krbzkr Nrpa ngr Jiszs, murde na-akingr dakxnzng. 3 Mzlegrng, mz drtwr lc, mcpxamu ncblo narlimzng mz nimu kx nqmq krdr mrlz mz nzobqkr leplz x Mqngrkxtr prsrle nidr x nzyrplapxng, kx nayrlq-kzng mz nzwzngr mz nzakingr dakxnzng. 4 Zbz na-amnctr-lzbqpwzkr mz nzkrka'ngr x mz nzryapwx-ngrbz Nrpa ngr Jiszs.” 5 X drtwr lc nzabrtzlvztx leplz lcng amrlx. X sc tzmcpxpelr Stivin, ncblo kx nzrlxngiti-krde xplrtrpz mz Gct x mailz Mqngrkxtr. Nzmcpx-kzlr Filip, x Prokorzs x Nikano x Timon x Pamenas x Nikolas kc Adiok. Mzli kc trnginideu lr Jiu. Zbz axvctr-lzbq-kaipz mz nzangiokr lr Jiu Yawe, x sc tqlxngiti-atele Jiszs. *Ncblo kcng amrlx nzrlimzng tzmcpxng nztwzlr drtq ngr Grik. Nidr ncblo kcng ayrnrngr tzaclvelr dalr makxtr. Kzdung nidr mwx nznginidr kxnzaclvelr dzbe lrmakxtr mz nibrde. Filip lc blepxbz mz Filip kc tqngi aposol.
6 Nzvzmibzlr mz aposol kcng. X sc tzkrka'pe-ngrdr nidr x nzyrlqobzlr mqdr badr, mz nzmcpx-krdr nidr mz nzwzngr lc. 7 X natq Gct sc tqvzpx zvz, x leplz neng Jiszs mrkc Jerusalem sc tqkqlunepx zvz kz. X pris r lr Jiu nzkqlu-kzng kxnzrlxngiting.
Lr Jiu Kxnzrmailzng Nzlolvzlr Stivin
8 Stivin ale-zvzle rkx x da kxnzkctipxng, murde zmrlz x zmatq ngr Gct axplrle nide. 9 X kzdung lr Jiu kx nzvzkimlr mz taon kxetung Saerin x Aleksadria mrkc Afrika, kcng tzprtrng mz mangr-nzkrka'ngr kx nzrpibz, ‘kr nyz ncblo kxnzarlapxng’ nzmnc-kzng elr. X kzdu-kzng lr Jiu nzvzkimlr mz Provins kcng Silisia x Esia. Leplz lcng amrlx sc tztalwzpeng badr Stivin mzli kc tqryapwx-ngrde. †Leplz kcng tzprtrng mz ‘Ncblo kx nzarlapxng’ nidr lr Jiu kcng tzyzlu-moung Israel murde nzarlapxng mz nibr nzngini-krdr kxnzawz-nrbalqng.
10 A' Mqngrkxtr rkabz zmatq mz nzyrplapxngr. X mzli kx ycmne-ngrde rblx nzayzlu-ngrbz natqde. 11 Zbz nzxpe-kapqtxdr kzdung ncblo mz nzpokiatitr-krdr Stivin. X ncblo lcng tzrpibzlr mz leplz kx, “Xlrkr Stivin nzpibqti-krde Mosis x Gct!” ✡Livae 24:16; Lou Kcpwz 19:16-21 12 Dekc tzangyati-ngrbzlr drtwrdr leplz, badr lrtzlvzng x kxnzalvztrng mz Lou sc Mosis. Nzyrkrmqng amrlx ngrdr mz Stivin, nzdwatibzlr x nzvzmibzlr mz Kansrl. 13 Zbz nzvzmilzmlr kxnzpokia lcng x nzrpilr kx, “Ncblo lc tresakiu nzrpingr natq ngr nzatrkatingr Mangr-nzangiongr nyzgu x Lou sc Gct kc tqkabzle mz Mosis. 14 Murde xlrbzkr nzrpi-krbzle mz leplz kx Jiszs kc Naszret na-awxlikiole Mangr-nzangiongr nyzgu x natekqtrle nqmq kcng amrlx tqaprcm Mosis bagu.” ✡Jon 2:19 15 Leplz kcng amrlx tzprtrng mz Kansrl kc, mztr tu txpwz mz Stivin x nzmcbzlr kx mzte pnaprtx apule nzobqkr enjrl. ‡Mztq Mosis pnaprtx kz. [Nzrlaszngr 34:29; 2 Korint 3:7]
*6:5 Ncblo kcng amrlx nzrlimzng tzmcpxng nztwzlr drtq ngr Grik. Nidr ncblo kcng ayrnrngr tzaclvelr dalr makxtr. Kzdung nidr mwx nznginidr kxnzaclvelr dzbe lrmakxtr mz nibrde. Filip lc blepxbz mz Filip kc tqngi aposol.
†6:9 Leplz kcng tzprtrng mz ‘Ncblo kx nzarlapxng’ nidr lr Jiu kcng tzyzlu-moung Israel murde nzarlapxng mz nibr nzngini-krdr kxnzawz-nrbalqng.
✡6:11 Livae 24:16; Lou Kcpwz 19:16-21
‡6:15 Mztq Mosis pnaprtx kz. [Nzrlaszngr 34:29; 2 Korint 3:7]