8
1-3 Mz nibr nzrnibqngr Stivin, kzdung lr Jiu kx nzangio-zvzlr Yawe, Gct rdr, nzyrtzmqlr nrkrdrtqde. X trmyamiu drtqdr nzryrnimingr. X natqdr betx mz nzyrni-krdr.
X Sol lc abrtzlvzle nzrnibqngr Stivin. X sc tqabzopele nzodati-krde lrmakxtr. Dwatrngr kc ma, dwapxm, x dwatr-mou-ngrde kc ma, mz nzrkilzpx-krmle leplz neng Jiszs, vz-ngrde ncblo x olvz tqadwatrleng mz presin.
X abzo mz zbq lc, nzatrkati-zlwzlr lrmakxtr kcng tzmncng Jerusalem. Zbz kxnzrlxngiting amrlx nzangiliating x nzplckilr me blepx-lxblrng mz provins kcng Judiz x Szmariz. A' aposol kcng, nidr kc txpwz kx trnzplcpx-pnzung Jerusalem.
Filip Ryapwxbz Nrpakxmrlz Mz Lr Szmariz
4 Mz nzmu-krde lcde, krkcng tzlxngitilr Jiszs nzaodalitipeng, x nzvzkilr me yctxp tzyapwxtipxlr Nrpa ngr Jiszs. 5 Kzdq nidr Filip, vzkicle mz kzdq taon kxetu mrkc Szmariz Provins. X pibzle mz lr Szmariz kx Jiszs nide Kxnzmcpx ne Gct. ✡Aposol 6:5 6 Zbo ngr leplz kcng nzlalztq-angidrbzng mz natqdeng. X nzlxngitilr Jiszs murde nzxlrbzlr da kx pile x nzmclr rkx kcng tqalele. 7 Murde leplz kxkqlu kxnzmncpx-ngrmqng drka' nzkabopxng mz nzprszpxkr drka' nidr. X nzkqlung kx drtqdr bzti x kxnzbxplong nzmrlzlz-kzpqng. 8 Mz nzmu-krde lc, nzabrtzngr kxetu yctx mz nabz lr mztea lcng.
9 A' kzdq kc ncblo mz taon lcde drtqde Saemon. Mzli boipe lr Szmariz tzkctitxpxlr da kx alele mz nzrngineti-krde dabo. Rpile nide kzdq ncblo kxetu. *Nzryrngrkxtr rpile kx bzkq kx na-alrti da mz dabo x bzkq kx narlr-ngrbz. [Livae 19:26; Lou Kcpwz 18:10-12; 2 Be Ngrdr 33:6; Esikel 13:18-23; Maekz 5:12]
10 X leplz amrlx, abzo mz kxnztopwzng krlzbzle kxnzetung nzlalztqtr-angidrbzng bade. X nzrpilr kx, “Ncblo lc nide kc tzrpibz ‘Nzxplr-esz'ngrkr Gct.’ ” 11 Nzlalztq-angidrbzng bade murde nzkctipx-krdr nide mzli boipe mz nzalrti-krde da mz dabo. 12 A' ncblo x olvz lcng sc tzwrkxtrpeng mz nzabrtzlvz-krdr natq Filip. Alvztr-ngrde nidr Nrpakxmrlz kx Gct sa tqaesotrpemle leplz bade murde nanginide King rdr, mz nzlxngiti-krdr mrlxde Jiszs. 13 Saemon nide esz'-krde rlxngiti kz, x mz nibr nzwrkxtr-krde, mzli kqlutx nzmnctilr badr Filip. Kx mcpele rkx x da kxmatq kcng tqale Filip, sc tqkctipxpeleng.
14 Kx nzxlrpe aposol kcng Jerusalem kx lr Szmariz kqlupe nzlxngitipelr Nrpa ngr Jiszs, nzatwzlr-ngrbzlr Pita x Jon badr. 15 Kx nzkaputrpzlr mrkc, sc tzkrka'pe-ngrdr lr Szmariz kcng murde natwz-kzlr Mqngrkxtr. ✡Luk 9:51-54 16 X trgalr nidr kx vzo-ngrbz Mqngrkxtr. A' nzwrkxtr-txpwzng mz drtq Kxetu Jiszs. 17 Zbz Pita x Jon nzyrlqobzlr mqdr badr x nztwzlr Mqngrkxtr.
18 Kx mcpebz Saemon kx nzkapebz Mqngrkxtr mz nzyrlqo-ngrbz kc mq, suti drtwrde nzrka-krbzle trau mz Pita x Jon mz nzxpe-krde zmatq lc. 19 X rpibzle kx, “Ka-kzp bange zmatq lc, murde mzli kx yrlqo-ngrbo mqnge mz leplz natwz-kzlr Mqngrkxtr.” 20 A' rpibz Pita bade kx, “Takitrde nimu badr trau scmqng nzodating, murde rpi-ngrn kx naxpeq Mqngrkxtr kx ka-nrbalqbz Gct badr kxnzrlxngiting! 21 Trpnzngr scm da kx yctrp bagr, murde nzao-krm drtwrm vz-rbr mz nzobqkr Gct! 22 Mz nzmu-krde lc, nqmq nr drtwrm la tqtrka natekqtrq x krka'bz mz Kxetu. Mwx elx sa naipqle nim. 23 Murde mctrpebo kx nzdobu-krme bagr trka-atwrnrngr x mnclzbzme mz zmatq ngr alwx.” 24 Zbz rpibz Saemon kx, “Krka'-ngrbzmu ninge mz Gct, murde da kcng tqpiamu ma tzprtilzlr ninge!” 25 Mz nibr nzyapwxtipx-angidr-krbz Pita ncdr Jon Nrpa ngr Kxetu Jiszs mz lr mztea lcng, sc tzyzlupe-mopwzng Jerusalem. X mz nzyzlu-krdr lcde, nzyapwxtipx-kzlr Nrpakxmrlz mz mztea kxkqlu ngr Szmariz Provins.
Filip Awrkxtrle Kzdq Kxetu Ngr Nubia
26 Kzdung mzli mz nibrde, kzdq enjrl ne Gct rpibzle mz Filip kx, “Vz mz lrpzki kc tzvzkipxm Jerusalem, tqvzkitrle lzke x sc tqvzkitrpeq mz taon kxetu Gasa.” 27 Zbz sc tqvzpe. Mz nzvz-krde kc, mcle dq ncblo kx vzpxm mz drtc' ngr Nubia mrkc Afrika. Nide kxetu kxmyapxbz, wztrpz mz Kandes, kwin kc Nubia. Nide ncblo kx nzvzpx x aclvele trau sc Kwin. Vz Jerusalem mz nzangio-krde Gct, x mzli lc nayzlupe mrnyzde. †Mzli lc Nubia kzdq kz drtqde Kus x kzdq kz Itiopia. A' Itiopia lc blepxbz mz Itiopia kc mzli ka. Mzli lc, ncblo kc tqwz zvz mz ma kxetu nyz King, navzpxpwz murde ma tqmwimile olvz rde o inyxdeng. Lou scdr lr Jiu trnzrlrpx-ngrdru kx ncblo kxmule lc naprtr-angidrbz mz lr Jiu. [Lou Kcpwz 23:1] Kxmule-esz', a' nzrlr-ngrbz nzangio-krde Gct murde mwx Gct na-arlapx-kzle nide. [Asaea 56:3-8]
28 X mz nzyzlu-krde mrnyzde, wxbuom mz sariot scde kx kilzne hcsi nede. X sc tqrlwxle buk sc profet Asaea, natqde etu. 29 Mzli lc rpibz Mqngrkxtr mz Filip kx, “Vzbz mz sariot la.” 30 Zbz Filip votxbz mz sariot kc x xlrbzle ncblo kc nzrlwx-krde buk kc, x sc tqveapebz bade. Rpibzle kx, “?Yrplatitr kz narm drtwr ngr natq la tqrlwxq?” 31 A' rpibz ncblo kc kx, “?Myx kxnamu nzyrplatitrkr narnge le, kx trpnzngr lc kx naryapwx-dalitim bange?” Zbz sc tqyrnititrpebzle mz Filip naprtzbz mz sariot kc, nawxbung ncdr. 32 Natq Gct kc tqrlwx ncblo lc desele, “Ncblo lc nzmailzpx mz nzrnibqngr, da kc tqwai nzmailzpxngr sip kx napz. X mnc-lrpine mzli kc tznibq-ngrde, da kc tqwai nei sip nzmnc-lrpi-krde mz nzyrlxo-krbz ncblo nrpnrde mz nzlube-krde. 33 Ncblo lc nzamyatibzlr drtqde x nzayzlu-krbzlr da bade trtubqu. A' trpengr neidu lrdeng murde nzlu-krde nzayrkrpxpebz mz nrlc ka.” ✡Asaea 53:7-8 34 Lr Nubia kc rpibzle mz Filip kx, “?Kzle, nelc tqycmnetrngr profet lc? ?Tqycmnetr-ngrde nide esz'-krde o kzdq kz ncblo?” 35 Zbz Filip sc tqyokaetipxbzle bade kx dckrlzde lc tutrpz mz Jiszs. X sc tqpipebzle bade nrpa ngrde amrlx. 36 Zbz mz nzvoo-krbzlr kc mz lrpzki, nzvzong mz kzdq lue. X ncblo kc rpibzle mz Filip kx, “Obqbz, kzdq lue kc mrkc! ?Nike nalolvz-moule ninge mz nzwrkxtr-krnge?” 37 Filip rpibzle kx, “Kx tqlxngitiq Jiszs mz nabzm atwrnrngr, krlzq nzwrkxtrngr.” Rpibz ncblo kc kx, “Lxngitix kx Jiszs nide mrlx Gct.” 38 Zbz sc tqrkapebz natq mz nzawxbungr sariot kc, x sc tzpoopeng rlilrdr mz lue kc. X sc tqawrkxtrpe Filip. ‡Kxmule-esz' ncblo nzvzpx o trtingr, a' nzprtr-ngrbz mz Jiszs vzpxm mz nzrlxngitingr.
39 Kx nzvzdzpemlr mz lue kc, Filip katxpxm Mqngr Gct bade, x trmcpeu ncblo kc. A' sc tqvope mz nzabrtz-zlwzngr. 40 Mzli kcpwz Filip mcpele nzmnc-krde mz taon Asotzs mz nrlarde kzprla, Prla ngr Meditrenia. Zbz sc tqvz-zlipele lrpzki kxvzkile nrlarde kzprla, mz nzvz-krde Sisaria. X oklatile mztea kcng amrlx mz lrpzki lc mz nzyapwxtipx-kz-krbzle Nrpakxmrlz badr.
*8:9 Nzryrngrkxtr rpile kx bzkq kx na-alrti da mz dabo x bzkq kx narlr-ngrbz. [Livae 19:26; Lou Kcpwz 18:10-12; 2 Be Ngrdr 33:6; Esikel 13:18-23; Maekz 5:12]
†8:27 Mzli lc Nubia kzdq kz drtqde Kus x kzdq kz Itiopia. A' Itiopia lc blepxbz mz Itiopia kc mzli ka. Mzli lc, ncblo kc tqwz zvz mz ma kxetu nyz King, navzpxpwz murde ma tqmwimile olvz rde o inyxdeng. Lou scdr lr Jiu trnzrlrpx-ngrdru kx ncblo kxmule lc naprtr-angidrbz mz lr Jiu. [Lou Kcpwz 23:1] Kxmule-esz', a' nzrlr-ngrbz nzangio-krde Gct murde mwx Gct na-arlapx-kzle nide. [Asaea 56:3-8]
✡8:33 Asaea 53:7-8
‡8:38 Kxmule-esz' ncblo nzvzpx o trtingr, a' nzprtr-ngrbz mz Jiszs vzpxm mz nzrlxngitingr.