Nzryr-krbz Pol Mz Lr Efiszs
Natq Ngr Nzaplxtqngr Mz Nzryr-krbz Pol Mz Lr Efiszs
Aposol Pol yrle letz lc mzli kc tqmnc-ngrde mz presin mrkc Rom. ✡Aposol 28:30-31 Yrle mz mzlir yiz 60—62 AD mz nibr nzrmcngr mz Jiszs. Mzli lc yr-kzpzle letz mz Filimon, lr Kolosia, x lr Filipae. Letz lcng amrlx dzbede esz' kx nzyrng mz presin. Yrbzle letz lc mz kxnzrlxngiting kxtrngiulrJiu kcng tzmncng Provins kc Esia, mz taon kc Efiszs, yc-aepztrpz mz taon kcng Kolosia x Laodisea. Mzli ka mrlcde nzrpipebz kandre kc Trki.
Pol tryrleu letz lc mz nzatubqti-krde drtwr kx vz-rbr, a' mz nzpipx-krbzle da kxmrlzting amrlx kcng tqkam Gct bagu mz nzaxvctr-krbzku mz Mrlxde. Mz nzvz-nqblq-krgu lrpzki rde x nzmnclz-krbzku mz zmatq ngrde, zmatq lc ycpxm bagu, murde na-aovxioku alwx x Setzn badr drka' nedeng.
Mrkcng Mz Letz Lc
Da kxmrlzting kcng tzvzpxmqng mz nzaxvctr-krbzku mz Kraes. [1:1—2:10]
Kxnzrlxngiting amrlx dzbede kxesz' mz nzaxvctr-krbzlr mz Kraes, kxmule-esz' lr Jiu o kxtrngiulrJiu. [2:11—3:21]
Nqmq krdr x nzmnc-krdr natakitrde nzngini-krdr doa neng Gct. [4:1—6:9]
Nayrlqbzku dalr vea amrlx kcng tqkam Gct bagu, murde natu-amqngi-ngrgu, mzli kc tqvecku badr Setzn. [6:10-20]
Pol ayrkrpxle letz lc mz natq ngr nzarlr-lzbqngr. [6:21-24]
Mz letz lc Pol pipx-kzpzle nzycmne-ebzpxngr tq mz nzmnc-krgu badr Kraes:
Nigu lrmakxtr nrkrdrtq Kraes x nide nargu. [1:22-23; 4:15-16]
Apuku ma nyz Gct kc tqtr, tqmncpx-ngrm Mqngrkxtr, x Jiszs nide nou rplz kx myatxpx-zlwzbz mz ma lc. [2:21-22]
Jiszs apule ncblo kxyrlz x nigu lrmakxtr apuku olvz rde kc tqmrlzti-zlwzle. [5:23-32]
1
1 Ninge Pol kc tqmcpx Gct mz nzngini-krnge aposol ne Mevalu Jiszs. Ryrbo bamu leplz kxnztr neng Gct kcng tzmncng Efiszs, x tzvz-nqblq-angidrlr Mevalu Jiszs. 2 Krka'-ngrbo mz Gct, Trtegu badr Kxetu rgu Jiszs Kxnzmcpx, kx nakabzlr bamu zmrlz ngrdr kxmyalz x nzmnc-zpwxngr.
Da Kxmrlzting Kcng Tzvzpxmqng Mz Nzaxvctr-krbzku Mz Kraes
3 Na-awibzku mz Gct, kc tqngi Trte Kxetu rgu Jiszs Kxnzmcpx. Murde mz nzaxvctr-krbzku mz Kraes, Gct kc Heven kapemle bagu da kxmrlzting amrlx elr, mz nzokatr-krde nabzgu mz nzmncngr kxtr. 4 Murde mzli kc nrlc trnzwzka-ngrde, mcpxpele nigu mz nzngini-krgu leplz nedeng x mz nzaxvctr-krbzku mz Kraes, murde nanginigu leplz kxnztrng kxnztubqng mz nzobq-krde. 5 Mz nivz lrde, pnzpe kai drtwr Gct kx naotile nigu mz nzngini-krgu doa angidr nedeng mz Jiszs, murde mrlzbz bade. 6 X naglqlz-ngrgu nide zmrlz ngrde kxmyalz-esz'ngr, kc tqka-nrbalqmle bagu mz nzaxvctr-krbzle nigu mz Mrlxde Kxnzmrlzti. ✡Matiu 3:17 7 Jiszs xpele nigu mz mepyr ngrde mz nzarlapx-krde nigu mz zmatq ngr alwx. X dekc tqipqngr Gct nigu mz alwx rgung, mz nzvz-nqblq-krde zmrlz ngrde myalz-esz'ngr. 8 X pulio-ebir-ngrmle zmrlz ngrde lc bagu, mz nzvz-nqblq-krde nzetukr nzyrplapx-krde x nzrkrlz-krde.
9-10 X mzli ka abrtzlvz Gct nzaelwapx-krmle bagu drtwr kxmyapxbz kc tqyrlq-kaile mzli kc bqnc, tqyc-kapqbz mz kxnzlung amrlx krlzmle mzli ka. Kraes nide nou drtwr lc x atutrle. Murde mz nzkrlz-krbzle mzli kx mcpx Gct, Gct sa na-ayrlwr-lxblrle mz dzbede kxesz' kxnzlung amrlx mrkc Heven x mz nrlc ka, murde namnclzbzng mz Kraes kc nangi nardr. 11 X mcpx Gct nigu x yrlq-pnzle drtwr kx nanginigu doa nedeng mz nzaxvctr-krbzku mz Kraes. X Gct batrpzle da amrlx kx prtzm mz nzvz-nqblq-krde nzyrplapx-krde mz drtwr kc tqyrlqle. 12 Murde nigr lr Jiu, mz nzbrti-kaikr drtwrgr Kraes, nabatrpzkr mz leplz nzglqpx-krdr Gct. 13 X nimu kxtrngiulrJiu nzaxvctrpe-kzpzmu mz Kraes, murde mzli kc tqxlr-ngrnamu natq angidr, sc tqlxngitipe-kzamu Nrpakxmrlz lc. X mz nzbrtikr drtwrmu Kraes nzarlapx-krde nimu, Gct sc tqyrlqtrpebzle bamu rkx ngr nzngini-krmu leplz nedeng. Krlc Mqngrkxtr kc tqpipx-pnzle kx nakabzle mz leplz nedeng. 14 Mqngrkxtr apule trau kx nzka kai mz nzaelwapxngr kx sa naka-kzle da amrlx kcng tqesalz-ngrde. Murde Gct ka-kaipzle Mqngrkxtr mz nzaelwapx-krde kx sa naka-kzpzle da kxmrlzting amrlx kx nzvzpxmqng mz nzngini-krgu leplz nedeng. Murde naglqpxku nide mz nzmrlzkr nqmq krde.
Pol Krka'-ngrde Lr Efiszs Kxnzrlxngiting
15-16 Mz nztwz-krgu da kxmrlzting lcng, sc tqkrka'pe-ngrne nimu, abzo mzli kx xlrx kx brtipe drtwrmu Kxetu rgu, Jiszs Kxnzmcpx, x mrlztiamu leplz kxnztrng ne Gct amrlx. X awi-zvz-ngrbo mz Gct nimu. 17 Gct nide Trte Kxetu rgu, Jiszs Kxnzmcpx, x nqmq krdeng amrlx myapx zlwz. X rlxti-zvzbo mz Gct kx nzyrplapxngr x nzrkrlzngr kx kabz Mqngrkxtr naetunepx-zvzng mz nabzmu, murde nzkrlz-krmu Gct naetunepx kz. 18 X nakrlz-kzamu da kxmrlzting kx nakabzle bamu. Murde sa nakabzle da lcng, tqobqtipxamu, mz nzkqle-krde nimu mz nzngini-krmu leplz nedeng. X krka'-ngrne kx nakrlz-angidramu kx nzngini-krmu leplz nedeng ngi da kxmrlz kxmyapxbz mz nabzde.
19-20 X krka'-ngrne kx naxngi-angidramu zmatq ngrde kxetu-esz'ngr kc tqwz zvz mz nabzgu, mz nzngini-krgu kxnzrlxngiting. Murde mz zmatq kcpwz tqatulz-mou-ngrm Gct Jiszs mz nzbz-krde, x dekcpwz tqawxbuo-ngrmle nide me matq-esz'ngr mz nrlar Gct kxrtc kc Heven. ✡Sam 110:1 21 X mz nzaclve-krde kc Heven, Jiszs myaszlz-zlwzle kxnzetung amrlx kxmule-esz' mz nrlc ka o mzlilxlr. Myaszlzle nidr mz nzxplr-krde, zmatq ngrde, zmrlue ngrde, x drtqde, kxmule-esz' mzli ka o mzli kc navzm. *1:18 Kzdung leplz mz drtwrdr natq lc tqrmnr-ngrbz natekqtr-kzlr mz nzrpi-krde kx, ‘Krka'-ngrne kx nakrlz-angidramu nzetukr da kxmrlzting kx nakabzle bamu.’ 1:21 Mz mzli nyz Pol, leplz nzrpir kx enjrl x drka' nzaclveng badr kxnzetu ngr kandre x mztea amrlx. X nzota-etrng mz nztwz-krdr leplz mz nrlarde nyz Gct o Setzn. krkcng tzaovxiolr mrnyzdr batrpzle da mz nrlc ka. Kzdung Kristin nzlxngiti-kzlr drtwr lc, mz nzrlwx-krdr Daniel 4:25 x 10:13. Mc kz Hibru 2:5.
22 X Gct yrlqlzbzle doa x da amrlx mz zmatq ngr Kraes, ✡Sam 8:6 (kxmule-esz' leplz, enjrl, drka', animol, o da kxtrnzluung), mz nzmetx-krbzlr bade. ✡Sam 110:1 Murde nanginide nar leplz amrlx kcng tzprtrng mz lrmakxtr. 23 X lrmakxtr lcng nzaesz'tilr nide, murde nide nardr x nidr nrkrdrtqde. X nide kc tqesz'-ngrde da amrlx.
*1:21 1:18 Kzdung leplz mz drtwrdr natq lc tqrmnr-ngrbz natekqtr-kzlr mz nzrpi-krde kx, ‘Krka'-ngrne kx nakrlz-angidramu nzetukr da kxmrlzting kx nakabzle bamu.’ 1:21 Mz mzli nyz Pol, leplz nzrpir kx enjrl x drka' nzaclveng badr kxnzetu ngr kandre x mztea amrlx. X nzota-etrng mz nztwz-krdr leplz mz nrlarde nyz Gct o Setzn. krkcng tzaovxiolr mrnyzdr batrpzle da mz nrlc ka. Kzdung Kristin nzlxngiti-kzlr drtwr lc, mz nzrlwx-krdr Daniel 4:25 x 10:13. Mc kz Hibru 2:5.