2
Nzlungr Vzpxm Mz Nzaxvctr-krbzku Mz Kraes
1 A' mzli lc trlxngitikalamu Kraes, mqngrmu bz, murde vz-rbr-zvzamu mz nzale-krmu alwx. 2 X mzli lcde, apuamu kxnzmnc-mrbrng mz nrlc, mz nzvz-nqblq-krmu Setzn, kc tqngi kxetu r drka' amrlx kcng tzmncng mrnyzdr mzlilxlr. X nide kc tqvz zvz nzbatr-krbzle mz leplz nzxpqbrlr-krdr Gct. 3 Mzli lc tqmnc-nqblq-kzkr nqmq nr drtwr kxtrka kcng tqyclzm mz nabzgr, mz nzrtrngzti-zvz-krbzkr da kznikeng mrlzm bagr. Nigr leplz kxdrka'-ngrng mz nzapu-krgr leplz amrlx, x takitrde Gct nzayrplapx-krde nigr mz zngya ngr drtwrde.
4 Kxmule-esz', a' Gct yc zlwz mz drtwrde nigu leplz amrlx, murde aodu-zlwzle nigu. 5 Mzli lcde mqngrgu bz mz nzale-zvz-krgu alwx, a' Gct sc tqalupemle mqngrgu mz nzaxvctr-krbzle nigu mz Kraes. Arlapxle nigu mz nzvz-nqblq-krde zmrlz ngrde kxmyalz. 6 X mz nzaxvctr-krbzku mz Mevalu Jiszs, Gct atulz-kzple nigu mz nzbzngr, x wxbuo-kzku badr me matq Heven. * Drtwr lc angidatile mqngr kxnzrlxngiting mzli ka x nrkrdrtqdr kx mrna Heven kalr.
7 Alele da lc murde mzli kc navzm na-aelwapx-angidr-ngrbzle nzetukr zmrlz ngrde kxmyalz-esz'ngr, mz da kx mrlzting amrlx kcng nzvzpxmqng mz nzaxvctr-krbzle nigu mz Kraes. 8-9 Murde nzrlapx-krmu vzpxm mz zmrlz ngr Gct kxmyalz, mz nzokatr-krde nimu mz nzabrtr-krbz drtwrmu mz Kraes. A' nzrlapxngr lc trvzpxpuu mz nimu esz'-krmu. A' Gct kx rka-nrbalqbz bamu, murde ma tqglqpx-lzbq-ngrnamu kx wz-ngrnamu da lc mz zmatq ngrmu esz'-krmu. 10 Gct wz-ngrde nigu mz nzmnc-krgu mz nrlc ka mzli ka. X alule mqngrgu mz nzaxvctr-krbzle nigu mz Mevalu Jiszs. X mzli kc pnz, yrlqle drtwr mz da kxmrlzting kx suti drtwrde nzale-krguleng.
Lr Jiu X KxtrngiulrJiu Nzngini-krdr Dzbede Kx Esz' Mz Kraes
11 Nimu kxtrngiulrJiu nadcpx mz drtwrmu kx mzli kc pnz, nzrpi lr Jiu nimu kxtrnzpakrung, a' nidr kxnzpakrng mz nzvz-nqblq-krdr Loukxtr. Nzrpakrngr lc dalr nrkrdrtq, a' tr-rngiscu zmatq ngr nztekqtr-krde nabz leplz. 12 Mzli lcde, nzmnc-krmu trka, murde mnc-rlrubzmu mz Kraes. X ni-kzpu' lr mrkzbleng murde trpnzngr nzprtr-krmu mz nqvi lr Israel, leplz kcng tqmcpx Gct. X trprtr-kzpwamuu mz Nzesz'tikr Drtwrdr badr. X trpnz-kzngr nzkrlz-krmu Gct angidr x drtwrmu kc tqmatxpe nzobqtipxngr da. 13 A' nimu kcng ena nzmnc-rlrubzng mz Gct, mzli ka vec-aepztrpemle nimu bade, mz mepyr ngr Kraes kc tqyrleo mz nzbz-krde nimu. 14-15 X Kraes batrpzle nzmnc-lxblr-krgu mz nrwx, nimu kxtrngiulrJiu x nigr lr Jiu. Kzdung natq x nqmq x nzryr-ngrng mz Lou sc Mosis nzapulr drkq kx akipxle nigu x batrpzle nzngyati-lzbqkr drtwrgu. A' Kraes awxole drkq lc, x sc tqmape lou lcng mz nzrlrpx-krbzle nrkrdrtqde nzbz-krde nigu, murde nanginigu dzbede kxesz' kxmrna mz nzaxvctr-krmle nigu bade. Delc nide nou nrwx ngrgu. 16 Murde yzlumi-kzpzle nigu mz Gct mz dzbede kc esz' mz nzbz-krde nigu mz kros. X mz nzrnibqngr Kraes, awxobzle zngya kx yc mz mzlir nigr lr Jiu x nimu kxtrngiulrJiu, murde namnc-zpwx-ngrgu badr Gct. † 2:14-15 Mwx Pol rpile ‘drkq’ mz nzaotikr drtwrde drkq ngr Mangr-nzangiongr Yawe kx akipxle kxtrngiulrJiu mz nzprtr-krdr mrnyz lr Jiu. KxtrngiulrJiu nzkrlzlr nzprtr-krdr mrnyz lr Jiu mz nztekqtr-krdr nzrlxngitingr x mz nzngini-krdr lr Jiu mz nzrpakrngr. Lou kxnzmulr lcng nzakipxngr leplz. Kzdq rpile kx nzmu lr Jiu nzmncng badr kxtrngiulrJiu, sa nabatrpzle mz lr Jiu trnztakitrdeu nzprtrngr mz nzangiongr. Mzli lc pnz, pris neng lr Jiu na-ale-zvzng blz, murde Gct naipqpxle alwx ngr leplz nedrng. A' mzli ka, sc tqangidatipe Jiszs lou lcng, mz nzngini-krde Nei sip ne Gct, kc tqngi blz kxrmnr-ngrbz.
17 Kraes vzm mz nzryapwxtipx-krde lrpzki r nzmnc-zpwxngr badr Gct. Pibzle bamu, nimu kxnzmnc-rlrubzng mz Gct, x pi-kzple bagr, nigr kxnzmnc-aepztrpzng bade. ✡ Asaea 57:19 18 Murde mzli ka, mz nzwzkr Kraes, nigu amrlx ngrgu nzaxvctrpzng mz Mqngrkxtr kcpwz, kxmule-esz' lr Jiu o kxtrngiulrJiu, x takitrpegu nztutr-krbzku mz mz Gct Trte. 19 Mz nzmu-krde lcde, nimu kxtrngiulrJiu trpengr nzngini-krmu lrnarnrlc x doa lr mrkzble. Murde mzli ka nipemu lr mztea nyz Gct badr leplz kxnztr nedeng amrlx. X nimu neidu lrde x prtrpe-kzpzmu mz lr ma nyzde. 20-22 X wz-ngrde ma nyzde lc tqtr mz nou rplz kx ngi nzalvztrkr aposol x profet. X Mevalu Jiszs nide rplz lc tqetu tqmyatxpx-zlwzbz, murde nide rplz kc tzatuo kai, tqngi nou bute', x atu-amqngile ma kc. X rplz amrlx ngr ma kc nzaxvctrpzng bade. X apuku rplz lcng tqmwitr lxblr, tqngi drkq ngr ma lc tqtr. X Mqngrkxtr mncpxm elr. ✡ Sam 118:22
*2:6 Drtwr lc angidatile mqngr kxnzrlxngiting mzli ka x nrkrdrtqdr kx mrna Heven kalr.
†2:16 2:14-15 Mwx Pol rpile ‘drkq’ mz nzaotikr drtwrde drkq ngr Mangr-nzangiongr Yawe kx akipxle kxtrngiulrJiu mz nzprtr-krdr mrnyz lr Jiu. KxtrngiulrJiu nzkrlzlr nzprtr-krdr mrnyz lr Jiu mz nztekqtr-krdr nzrlxngitingr x mz nzngini-krdr lr Jiu mz nzrpakrngr. Lou kxnzmulr lcng nzakipxngr leplz. Kzdq rpile kx nzmu lr Jiu nzmncng badr kxtrngiulrJiu, sa nabatrpzle mz lr Jiu trnztakitrdeu nzprtrngr mz nzangiongr. Mzli lc pnz, pris neng lr Jiu na-ale-zvzng blz, murde Gct naipqpxle alwx ngr leplz nedrng. A' mzli ka, sc tqangidatipe Jiszs lou lcng, mz nzngini-krde Nei sip ne Gct, kc tqngi blz kxrmnr-ngrbz.
✡2:17 Asaea 57:19