Nzryr-krbz Pol Mz Lr Galesia Provins
Natq Ngr Nzaplxtqngr Mz Nzryr-krbz Pol Mz Lr Galesia
Aposol Pol yrbzle letz lc mz kxnzrlxngiting kcng tzmncng mz provins kc Galesia, kc tqngi kandre kc Trki mzli ka. Yrle mz mzlir yiz 48—58 AD mz nibr nzrmcngr mz Jiszs.
Pol xlrle kx kzdung lr Jiu kxnzrlxngiting nzalvztr-rbr-ngrdr da mz kxtrngiulrJiu kxnzrlxngiting mrkc. Nzrpilr kx kxtrngiulrJiu napakrng x navz-nqblqlr Lou sc Mosis, murde na-arlapxng. Nzrpi-kzlr kx Pol trngini-angidrleu aposol, x kx tekqtrle Nrpakxmrlz mz nzrkatx-krde kzdung lou kx navz-nqblqlr.
Pol yrle letz lc mz nzaelwapx-krde kx nide aposol angidr, x aposol kztedeng drtwrdr esz'ti badr mz nzalvztr-krdeng mz lrpzki r nzrlapxngr. Pi-kzpzle badr kx nzvz-nqblq-krdr Lou sc Mosis trkrlzleu nzarlapx-krde nidr, a' nabrti drtwrdr Kraes. Murde mz nzrlr-lzbq-krbzku mz nzvz-nqblq-krgu Mqngrkxtr, trmnclzpepwzkuu mz Lou, a' vz-nqblqpeku da kx pim Mqngrkxtr mz nabzgu.
Ngalrdeng kxmyapxbz 2:20-21 x dckrlzde kc 5.
Mrkcng Mz Letz Lc
Nike tqyrngr Pol letz lc. [1:1-10]
Nrpakxmrlz kc tqyapwxtipx Pol ngi da angidr murde vzpxm mz Kraes. [1:11-24]
Aposol kc-kzng drtwrdr esz'ti badr Pol mz nzalvztr-krdeng. [2:1-10]
Bzkq atrkatiamu Nrpakxmrlz mz nzrpi-krmu kx namnclzbzku mz lou murde narlapxku. [2:11-21]
Twzku nzlungr angidr mz nzabrtr-krbzku drtwrgu mz Kraes, trngiu mz Lou Sc Mosis. [3:1-14]
Lou sc Mosis trayrkrpxleu da kc tqesalz-kaingr Gct. [3:15-22]
Kxnzrlxngiting nzapulr doa kxtopwz neng Gct, mz nzaxvctr-krbzlr mz Mrlxde, a' nzmnclz-ngrbz mz lou apule nznginingr kxnzawz-nrbalqng. [3:23—4:31]
Bzkq mnclzbzmu mz leplz kcng tzsuti drtwrdr nzmnclz-krbzmu mz lou mz nzrlapxngr. [5:1-12]
Navz-nqblqku nzycmne-krm Mqngrkxtr mz nabzgu. [5:13-26]
Mz nzvz-nqblq-krgu Mqngrkxtr nawztrpzku mz leplz. [6:1-18]
1
1-2 Ninge Pol, ryrbo bamu, nimu kcng tznginidr leplz neng Gct, tzmncng Galesia Provins. Nigr badr mzlegung kcng tzmncng mrka, rpibzkr bamu kx, “Nimu la.” Ninge aposol murde Jiszs Kxnzmcpx nidr mz Gct Trte kc tqatulzmle nide mz nzbzngr, nzmcpxlr ninge. Delc zmatq rnge mz nzaclve-krnge lrmakxtr trvzpxpuu mz leplz.
3 Krka'-ngrne kx Gct Trtegu x Kxetu rgu Jiszs Kxnzmcpx naokatrlr nimu mz zmrlz ngrdr kxmyalz, murde namnc-zpwxamu badr. 4 Nzmnc-zpwxngr lc vzpxm mz Kraes, murde sc tqvz-nqblqpele me pnz drtwr Gct Trte, mz nzrlrpx-lzbq-krde mz nzbzngr. Alele da lc murde rpile nakapxle alwx rgung, x na-arlapxle nigu mz nzrvz-nqblqngr nqmq kr kxdrka'-ngrng kcng tzvz-rbrng mz da kx nzaoti drtwrdr x mz da kx nzaleting. 5 Delc takitrde nzglqpx-krgu x nzamatq-krgu Gct Trte, tqvzpe tqvzpe. Eu. Angida!
Gct Arlapxle Leplz Mz Hxl Mz Lrpzki Esz'txu
6 Kctitxpxx kx esablqti-anipeamu Gct kc tqaveatile nimu mz nzmnclz-zvz-krbzmu mz zmrlz ngr Kraes kc tqmyalz. A' sc tqvz-nqblqamu nzalvztrngr kzble mz lrpzki r nzrlapxngr. 7 Kxmule-esz' trpnz-moungr lrpzki r nzrlapxngr, a' kzdung leplz sa tzesabrtilr nimu, mz nztekqtr-krdr Nrpakxmrlz angidr kx Kraes esz'-krde arlapxle nigu. 8-9 Pibzkr bamu da lc mzli kc tqmnc-ngrgu. ✡Aposol 13:2; 13:13—14:20 X mzli ka sa tqpipe-mopwc' bamu. Takitrde Gct nzadwatr-krde doa mz Hxl, kxmule-esz' kzdq nigr aposol o kzdq enjrl kxvzom Heven nzmu kx tqalvztr-ngrde lrpzki r nzrlapxngr kx blepxbz mz da kc tqyapwxtipebzkr bamu, tqlxngitipeamu mzli kc.
10 Tryrpou bamu da lc murde suti drtwrnge nzabrtzlvz-krmu ninge, da kc tqwai nzpi-krdr ninge. Murde nzmu leplz nzabrtzlvz-zvzlr ninge mz nike pibo badr, trtakitrdeu nzngini-krnge kxnzawz ne Kraes. A' da kx myapxbz kx Gct na-abrtzlvzle ninge.
Nrpakxmrlz Kc Tqyapwxtipx Pol Ngi Da Angidr Murde Vzpxm Mz Kraes
11 Mzlengeng x inwengeng, Nrpakxmrlz kc tqyapwxtipxbo trvzpxpuu mz leplz. 12 X trxlrtr-kzpwc'u mz leplz. A' Jiszs Kxnzmcpx nide esz'-krde kx rpim bange, mz nzadcpx-lzbq-krmle bange.
13 Krlzpeamu nqmq krnge mzli kc. Murde vz-nqblq-angidrx lou x nqmq krgr amrlx. X lolvz-kzx leplz neng Kraes, mz nzadwatr-krngeleng mz presin, murde ma tzlxngitilr nide. 14 X myaszpxx nrpr kztengeng mz nzpqlz-krmle mz nabznge nzalvztrkr melrmqgrng.
15-16 A' trkrlzwxu kx mcpx pnz Gct ninge mzli kc mzke' trnzmcka-ngrde, mz nzngini-krnge aposol nede murde napipxbo Nrpa ngr Jiszs mz krkcng trngiulrJiu. A' mcpxle ninge mz nzvz-nqblq-krde zmrlz ngrde kxmyalz, kxmule-esz' trtakitrpwc'u nzwzngr lc. Zbz kx krlzpebzle mzli kc tqmcpx pnz Gct, sc tqvz-ngrbo Damaskzs. X sc tqaelwapxpe-ngrmle bange kx Jiszs Kxnzmcpx ngi mrlxde. A' trpnzngr ncblo kx vz-nebax kx na-alvztrle ninge mz nzrkrlzngr Kraes. ✡Aposol 9:1-31 17 X trvz-kzwxu Jerusalem murde krkcng tzngini-kaiplr aposol bange na-alvztrlr ninge. A' mz nibr nzrkqlengr ninge, vzx mz Arabia provins. X mz nibr kzdung mzli, sc tqyzlupe-moux mz taon kc Damaskzs. 18 Zbz yiz tq kaputxpx, mz nibr nzrlxngiti-krnge, sc tqvzpex Jerusalem, mz nzryapwx-krgr mz Pita. Mnctikr bade zbq nzpnu-nrade-nzlvqn. 19 Mzli lcde, oklati-kzx aposol Jemes, mzle Kxetu rgu, kc tqaclvele dzbe lrmakxtr kc mrkc. A' tr-rmctiwxu kzdq kz aposol. 20 Esalzx mz mz Gct, kx da amrlx kx yrbo bamu da angidr. 21 Mz nibrde, sc tqyapwxtipxx Nrpakxmrlz mz provins kcng Siriz x Silisia, mrlcdeng trnzkqlu-ngru lr Jiu. 22 A' leplz neng Kraes kx nzmncng Judiz Provins, trnzkrlzkalr ninge, murde tr-rmcti-lzbqkakr badr. 23 A' nzxlr-ngrdr nrpa, kx ncblo kc tqatrkatile kxnzrlxngiting mzli kc, mzli ka sa tqryapwxpxpe kz Nrpa ngr Jiszs. 24 X nzglqpxlr Gct kc tqtekqtrle ninge.