1 Yiz nzpnu-esz'-nrade-pwx (14) vztx, mz nibr nzoklatingr ayrnrngr lc, vz-moux Jerusalem. X mzli lc vzkr badr Banabas x Taetus. 2 Vz-ngrgr Jerusalem murde opx angidr nzrpi-krm Gct bange navzx. X kx kaputrpebo kc, yrlwr-lxblrkrng badr aposol kc-kzng, x kxnzaclvelr dzbe lrmakxtr kc-kzng Jerusalem. X yokaetipx-angidrbo badr Nrpakxmrlz kc tqyapwxtipxbo mz kxtrngiulrJiu. Murde sutitx drtwrnge kx drtwrgr naesz'ti badr mz nzalvztr-krngeng. X murde ma tzatrkatilr leplz nzwz-krnge kalr, mz nzpi-krdr kx drtwr kxnzaclve kcng Jerusalem tresz'tiu mz nzalvztr-krngeng. 3-6 Murde kzdung ncblo kcng tzrpilr kx nzlxngitilr Jiszs, a' nzpokia-ngrdr da lc, nzalvztr-rbr-ngrdr kx ncblo napakrng mz nzvz-nqblq-krde Lou sc Mosis, murde narlapxng. Ncblo lcng nzkrlzlr kx drtqgr opx mz Mevalu Jiszs. A' suti drtwrdr kx namnclz-mopwzku mz Lou sc Mosis. X nzaprtr-lzbqbzng mz kxnzrlxngiting, murde natekqtrlr nzalvztrngr angidr. A' plzpxkr Nrpa angidr ngr Kraes, murde ma tzatrkatilrle. Tu-amqngikr mz nzalvztr-krgr lcng, murde nakrlzamu lrpzki angidr ngr nzrlapxngr, x narmu ma tqngqngutrpz mz nzalvztr-rbrngr. Aelwa-ngrbzkr mz ncblo kcng amrlx tzaclvelr leplz neng Kraes, kx nzalvztr-krgr ngi da angidr. X kxmule-esz' mz drtwr leplz kxnzkqlung, kxnzaclve lcng nzmyaszpxlr ninge, a' trkxu mz drtqnge nike aotingr drtwr leplz nidr. Murde Gct trkx-kzu mz drtqde nike aotingr drtwr leplz nidr. A' da kx myapx-zlwzbz kx nzalvztr-krdr ngi da angidr o trtingr. Aelwa-ngrbzkr badr kx nzalvztr-krgrng ngi da angidr, x nzaolvzlr nzalvztrngr lcng amrlx, x trpnzngr da kx natekqtrx elr. Murde kxmule-esz' Taetus tqngi lr Grik x trngiulrJiu, a' kxnzaclve kcng Jerusalem, trnzrtulrtr-ngrdru nzrpakrngr nide mz nzaxvctr-krbzle mz Kraes, murde narlapx. 7-9 Krlzamu kx leplz ne Kraes kcng Jerusalem, nzrpilr kx Jemes, Pita x Jon nzaclvelr nidr. X mzli kc ncblo lcng nztqng tzxlr-ngrdr nzwz-krnge, nzmclr kx Gct aelwapx-ngrde zmrlz ngrde x nzxplr-krde mz nzryapwxpx-krbo mz leplz kxtrngiulrJiu. X nzkrlzlr kx krlc nqmq kcpwz tqaelwapx-ngrde mz nzryapwxpx-krbz Pita mz lr Jiu. Mz nzmu-krde lcde, opx-angidrbz badr kx Gct mcpxle ninge mz nzyapwxtipx-krbo Nrpakxmrlz mz leplz kcng trngiulrJiu, da kc tqwai mz nzmcpx-krbzle Pita nzryapwxpx-krbzle Nrpakxmrlz mz lr Jiu. Zbz aposol lcng nztqng malekr mqgr badr x Banabas, nangi rkx kx nigr kzte-lzbqgr mz nzwzkr Kraes. X drtwrgr esz'ti kx nigr ncdr Banabas nawzkr mz mzlir krkcng trngiulrJiu, x nawztrpzng mz lr Jiu. 10 Da kx nzrlxtitxplr bagr kx na-alekr, nzrkangr trau murde naxpengr dakxnzng nanginan leplz ne Kraes kx trnzrngiscung, da kc tqwai nzpnzkr drtwrnge le mzli kc.

11-13 Nzalvztrngr lc, kx navz-nqblqku Lou sc Mosis mz nzrlapxngr, vzdz-kaip mzli kx Pita oklati-ngrde leplz neng Kraes mz taon Adiok. Murde mzli kx vz-ayrnr-ngrde mrkc, prtrpz mz leplz neng Kraes kxtrngiulrJiu, x nzmung badr, kxmule-esz' mz nzvz-nqblq-krde Lou sc Mosis batrpzle trnztakitr-krdeu nide mz nzprtrngr mz nzangiongr. A' mz nibrde, kzdung lr Jiu nzrlaszmlr Jemes mrkc Jerusalem, x kzdung nidr nzprtrng mz dzbede kc tzrtulrtr-ngrdr nzrpakrngr. Zbz Pita vecpx-lzbqbz mz krkcng trngiulrJiu, murde mwxlrtile nzrpikitikr dzbede lc. Zbz lr Jiu kxnzrlxngiting kcng amrlx tzmncng Adiok nzvz-nqblq-kzlr nqmq kr Pita, x tzvecpx-lzbqpe-kzng mz krkcng trngiulrJiu. Mz nzmu-krde lc, Banabas nzaprctipe-kzlr nzvz-nqblqngr nidr mz nzngini-krdr leplz kx trnzvz-nqblq-angidrlru da kxtubq. *Dzbede kc tzpakrng nzlxngitilr Jiszs nide Kxnzmcpx. A' mz drtwrdr, lrmakxtr amrlx napakr-kzng, x navz-nqblq-kzlr Lou sc Mosis, murde narlapxng.

14 Zbz nzycmne-krnge xplrtxbz mz Pita, mz mz lr Jiu kc-kzng. Murde opx angidr kx nqmq krde vz-rbr, x trvz-nqblqpeleu Nrpa angidr ngr nzrlapxngr. Rpibo bade kx, “Kxmule-esz' nim kzdq lr Jiu, a' trvz-nqblqpewq da amrlx kc tqyclzm mz Lou sc Mosis. ?E memule tqrtulrtr-ngrbzme lrmakxtr lcng trngiulrJiu nzvz-nqblq-krdr Lou kcng? 15 Blepxbzku mz ncblo ngr alwx kcng trnzkrlzlru Loukxtr. Murde mzku nzmc nzngini-krgu lr Jiu, x krlztipeku Lou sc Gct mzli boipe. 16 Kxmule-esz', a' krlz-kzku kx leplz trnztubqung mz nzobqkr Gct mz nzvz-nqblqngr Loukxtr lc, a' mz nzrlxngitingr Mevalu Jiszs. Dekc, nigu lr Jiu tqlxngitipe-kzku Mevalu Jiszs, x drtwrgu br kx atubqtipele nigu mz nzobqkr Gct. A' trvz-nqblqpekuu Lou sc Mosis mz nztubq-ngrbz mz nzobq-krde. Trpengr kx narlapx mz nzrvz-nqblqngr Lou lc, murde tratubqleu leplz mz nzobqkr Gct. A' aelwatx-ngrpwzle kx vz-rbrku. 17 A' kzdung lr Jiu kx suti drtwrdr navz-nqblqku Loukxtr, nzrpilr na-atrkatilr nigu. Mwx narpilr kx nigu kcng tzabrtrpwzlr drtwrdr mz Kraes mz nzatubq-krbzle nigu mz nzobqkr Gct, sa tqalebeku alwx. X opxm kx Kraes mailzle nigu mz da kx vz-rbr. A' trtingr! 18 Murde lxngitipex Kraes mz nztubq-krnge. X nzmu narpix na-atubq-lzbqbo mz nzobqkr Gct mz nzrvz-nqblqngr Lou sc Mosis, vz-nqblq-moux lrpzki kc pnz tqpxtxpxpe-ngrne. X mz nzale-krnge da lc vz-rbr-angidrx. 19-20 Murde mz nzaxvctr-lzbq-krbo mz Kraes, axvctr-lzbq-kzx mz nzbz-krde mz kros. X trmnclzpepwc'u mz Lou, murde trpnzngr da kx na-aletrpz Lou kc mz krkcng tzbzpeng. Trvz-nqblqpewxu Lou sc Gct mz nzrlapxngr. X trvz-nqblqpewxu nqmq ngr alwx. A' vz-nqblqx Kraes kc tqlupxm bange, tqkamle bange nzlungr kxmrna. X mz nzlungr kxmrna lc, sc tqvz zvz nzabrtr-krbo drtwrnge mz Mrlx Gct, kc tqaodule ninge x tqbz-ngrde nzarlapx-krde ninge. 21 Lolvz-amqngix mz nivz lr Gct x zmrlz ngrde kxmyalz mz nike alepem Kraes bange. Murde nzmu nayzlu-mopwc mz nzalvztr-krnge kx navz-nqblqku Lou sc Mosis mz nzrlapxngr, drtwr ngrde kx nzbzkr Kraes ngi brmrda.”