Sam Kranzpnu-esz'-nrade-rtqmz (18)
Yawe Nide Temz Ngr Lomr Kc Tqyrputrngr Nipna
Nabz ne Devet, ncblo ne Yawe, kx yrbzle mz kxrmailz ngr dzbe kxnzngrng,
mzli kc Yawe tqarlapx-ngrbzle nide mz zmatq ngr enqmi rdeng x King Sol.
Nqmq Kr Yawe
1 Yawe, mrlztix nim
Murde axplrq ninge.
2 Nim Gct rnge, x butqbr kx rlakitrx.
Nim lrpalvc nyznge peto,
X Mevalu rnge kx arlapxle ninge.
Nim nou zmatq rnge apule temz ngr lomrnge kc tqyrputrngr nipna.
3 Kqle-zvzx nim kc tqtakitrde nzrglqlzngr,
X vzme arlapxq ninge mz mq enqmi rngeng.
Nzkrka'-krnge
4-6 Yawe, mzli ka tqkxpu-ngrne kqlex nim mz nzokatr-krm ninge.
Murde ycpe pipz nzbz-krnge.
Opxm kx zmatq ngr nzbzngr sa na-aovxiole ninge,
Mz nzpe-amqngi-krde ninge.
A' krlzx kx sa naxlrme ninge mz Mangr-nzangiongr nim,
Mz nzayzlu-krme natqnge.
Zmatq Ngr Yawe
7 Mzli kc Yawe nakaputr-ngrmle, zmatq ngrde myalz apule nengq.
Nrlc ycngrlr-atwrnrngr x wai-kzle nou newzng.
Murde Gct ngyati zlwz drtwrde enqmi rngeng.
8 X natqde apu-kzle trmami kc tqyrpupx.
X ncte vzpx-ngrm zsikapu. X naode rlxpx-ngrm nyr x rplz kxpq.
9 Lvxpxle bongavz,
X vzom tuom mz dcbz kx botapz'.
10 X kzdq enjrl lvcmio-animle nide.
Mz nzrtwz-krdr nenq.
11 Nzlo ngr zbo ngr tewa
Apule lrpz kx mnc-kapqpx-ngrmle.
12 X aelwapx-ngrde zmatq ngrde mz zyzlr kxluli.
Mz nabz zbo lc bzlrpc tqpctipx x muli-aes tqrlxtiom vzmi rplz kxngc.
13 Yawe myatxlz-esz'ngr, ngi-batrpzle nzyrpupxkr bzlrmei.
X natqde nzxlr mz nrlc tulvzo.
14 Rpna-ngrbzle nipna x aodalitile enqmi rngeng.
Vz-nqblqbz bzlrpc x nzvo-alo-ngrdr.
15 Mzli kc Yawe tqpnanati-ngrde enqmi rngeng,
Natqde apzlzmle me boo-ngrng,
X atu-lxlr-ngrde nou nrlc.
Nzarlapxkr Yawe Ninge
16 Yawe rtrngztiomle ninge mz nzokatr-krde ninge
Apule kx veclzmle ninge me boongr prla.
17 Kxmule-esz' yangrngatrpo mz nzxplrkr enqmi rngeng,
A' sc tqvz zvz nzarlapx-krde ninge.
18 Nzvzmqng mz nzota-krgr badr mzli kc tqprtilz-ngrde ninge nzkxpu-ngrng.
A' Yawe sc tqtum mz nibrnge.
19 Mailzle ninge me nzmnc-zpwx-ngrne,
X arlapxle ninge, murde abrtzlvzle ninge.
Nzvz-nqblq-krnge Yawe
20 Yawe rka-zvzm bange da kxmrlzting mz nzvz-nqblq-krde nztubq-krnge.
X ayzlu-ngrmle da bange murde nabznge lqngi.
21 Vz-nqblq-zvzx nqmq kr Gct rnge,
X tresablqtiwxu nide.
22 Yrlq-angidrx Lou kxtr scdeng,
X aoti zvz drtwrnge natqdeng.
23 Trvz-rbrwxu mz nzmnc-krnge,
A' yrlqpx-lzbqnge mz nzalengr alwx.
24 Yawe ayzlu-ngrmle da bange mz nztubq-krnge,
Murde nabznge lqngi mz nzobq-krde.
Yawe Badr Leplz
25 Yawe, yrlq-zvzbz natqm mz krkcng tzyrlqbzlr natqdr bam.
X amrlzq krkcng nqmq krdr tqmrlz.
26 Tubqbzme mz krkcng nabzdr tqtubq.
A' lolvzq mz br scm krkcng tzesabrng.
27 Avzdzq krkcng tzavzo-lzbqng.
X avzoq krkcng tzglqlz-lzbqng.
28 Yawe, nim nou nzlu-krnge, mz nzapu-krm kxrtekatr lam pnrnge.
X ayrkrpxq da kxtrka amrlx mz nzmnc-krnge, mz nzapu-krm zyzlr x nyr kxpq.
29 Gct, rka-zvzme bange zmatq ngr nzota-krgr badr enqmi rngeng.
X axplr-zvzq ninge mz nzdwa-ngaletr-krbo nabxbz ngr lrpalvc nyzdr.
Nzmyapxkr Yawe
30 Nqmq kr Yawe tubq-esz'ngr, x natqde ngi da angidr zvz.
X nginibzle lrpalvc nyzdr krkcng tzrlatrpzng bade.
31 Yawe nide txpwz Gct angidr,
X butqbr nyzgu.
Kxokatr
32 Nide Gct kc tqaxplr-zvzle ninge,
X tzbzle lrpzki rnge kxtubq kx nao-zlix.
33 Axplr-zvzbzle nanycnge
Mz nzvzne-krnge mz nartrkla ngr newz.
34 Alvztrple bange nzrpnangr,
Murde nakrlzx nzrvecngr nalr popz'.
35 Yawe, apume bange temz ngr lomrnge kc tqyrputrngr nipna.
X zmatq ngrm ngi popz' ngr nibrnge. Vzome murde namyalzx.
36 Okatr-zvzq ninge, x rblx enqmi rngeng nzlolvz-krdr ninge.
X trnzta-pulro-ngrdru ninge mz drtc'.
Kxaovxio
37 Maneux enqmi rngeng,
Vz vz x lolvz-zpwxxng mz nzodati-krnge nidr.
38 Tzx nidr, vz vz x nztaong amrlx mz drtc'.
X trpnzngr kx tulzm.
39 Axplrq ninge mz nzotangr.
Delc tqaovxio-ngrne enqmi rngeng.
40 Nim kx rngi-batrp nzdwaszkr enqmi rngeng ninge,
Murde naodatix krkcng tzpxtxpx-ngrdr ninge.
41 Nzbztidr nzyrningr kx naokatrng. Nzkqlelr Yawe.
A' trpnzngr kx arlapxle nidr.
42 Wibrtix nidr, vz vz nzapulr bq kc tqtwz nenq.
X rnzbrtix nidr, vz vz nzapulr dxlrbi ngr lrpzki.
King Kxmcpx Yawe
43 Arlapxbzme ninge mz mq leplz kx nzmwati drtwrdr ninge.
X yrlqq ninge mz nzaclve-krnge drtc' nyzdrng,
Murde lr mrkzbleng namnclzmqng mz zmatq rnge.
44 Nzyrngzomqng bange
X nzvz-nqblqlr natqnge.
45 Nzrnrctitr-lzbqmqng bange.
Nzprpxmqng mz lrpalvc nyzdr. X nzmetxmqng bange.
46 Yawe, nim Gct kx lu. Glqpxx nim murde nim butqbr nyznge.
Glqlz-zvz-ngrne nim murde arlapx-zvzq ninge.
47 Ayrplapx-zvzq enqmi rngeng.
X okatrq ninge nzaovxio-krnge lr mrkzbleng,
48 Mz nzarlapx-krm ninge mz mqdr.
Yawe, ngi-batrpe' nzaovxio-krnge enqmi rngeng.
X tu-zvzme mz nibrnge mzli kc ncblo nzrpilr naota-ngrgr badr.
49 Gct, sa naglqlzx nim mz mzlir lr drtqbrng amrlx,
Mz nzangrlvz-krnge nim. ✡Rom 15:9
50 Yawe, ninge Devet, king nem, x okatr-zvzq ninge mz nzaovxio-krngeng.
Aodu-zvzq ninge kc tqmcpxq x leplz ngr nqvi lrnge, tqyc, tqyc.