Sam Kranzpnu-tq-nrade-esz' (31)
Nzbrkr Drtwr X Nztalvzokr Nabz
Nabz ne Devet kx yrbzle mz kxrmailz ngr dzbe kxnzngrng.
Nzbrkr Drtwr
1 Yawe, nim me rlakitrx.
Bzkq rlrpx-ngrn nzaovxiokr enqmi rngeng ninge.
A' arlapx ninge, murde ale-zvzq da kxtubq.
2 Ayzlu-anim nzyrni-krnge mz nzarlapx-krm ninge.
Nanginim butqbr kx namnc-kapqpx-ngrmc.
Nztalvzokr Nabz
3 Mz nzngini-krm lrpalvc ngr nzrlapxngr,
Aclve x mailz ninge mz nzvz-nqblq-krde natqm.
4 Bzkq rlr-ngrme nzprtz-krnge mz trtxki kc tzamwi-kapq enqmi rngeng,
Murde nim me rlakitrx.
Nzbrkr Drtwr
5 Yawe, aprcbo mqngrnge mz mqm. ✡ Luk 23:46
Murde nim Gct kc tqbrti drtwr mz nzxpepx-krm ninge.
6 Kxetu, abrtxtrpo drtwrnge bam,
A' pxtxpx-ngrne krkcng tzangiolr mqngr da txneng kx nzlz.
7 Drtwrnge sa naelalzm x na-abrtzlvzx nzaodu-zvz-krm,
Murde okatr-zvzq ninge mz mzlir nzetqkr drtqnge x nzkxpu-krngeng.
8 X tr-rlr-ngrpwzmeu ninge mz mq enqmi rngeng,
A' amnc-nrwx-ngrbzme nabznge mz nzvzne-krnge.
Nztalvzokr Nabz
9 Yawe, nayc mz drtwrm ninge murde nabznge talvzo.
Mzke' vaotxpe-ngrde nzyrni-zlwz-krnge x nrkrdrtqnge mewetxpengr.
10 Yangrngapex mz nzvzkr drtwrnge x drtqnge satxpe murde bztipenge nzyrningr.
Drtqnge yayrpe-ngrde nzmnc-rbr-krnge x nipenge nrvr-nrbalq.
11 Enqmi rngeng nznelvztilr ninge
X kxnzmnc-aepztrpqng bange nzobqszopelr ninge.
Kxkrlzti-lzbqkr badr nzapusr-ngrdr ninge da kxtrka
X krkcng tzmclr ninge mz lrpzki nzdwa-ngrdr ninge.
12 Leplz amrlx mrbrtinetrpe drtwrdr ninge, opxm kx bzpex.
Apunepebo badr brmrda.
13 Mnc-zvzx mz zmwxlr mz nzxlr-krnge nzlc-awakr enqmi rngeng,
Kcng tzyrlqlr drtwr kx nanibq-ngrdr ninge.
Nzbrkr Drtwr
14 A' Yawe, nim Gct rnge,
X abrtrpo drtwrnge bam.
15 Arlapx ninge mz enqmi rngeng kcng tzayotilr ninge,
Mz nzaclve-angidr-krm ninge.
16 Amrlz ninge, kxnzawz nem,
Mz nzarlapx-krm ninge murde nzaodu-krm tqyc tqyc.
Nztalvzokr Nabz
17 Yawe, bzkq rlrpx-ngrn nzkqle-krnge nim nzamyati-ngrm drtqnge.
A' amyatibz drtq kxdrka'-ngrng murde napwrkilvc-ngrdr nzbz-krdr.
18 X na-aesakile natq kxnzpokiang x kxnzglqpx-lzbqng,
Kcng tzxtrnga-ngrdr kxnztubqng.
Nzbrkr Drtwr
19 Myatxpx zlwz da kxmrlzti kcng tqyrlqq nangi sc krkcng tzamrluelr nim.
Murde aelwapxpe-ngrn kx aclve-zpwxq krkcng tzrlatrpzng bam.
20 Leplz nemqng nzrlapxng mz drtwr kx nzyrlq enqmi rdrng x nznelvztingr nidr,
Murde amnc-aepztrpzme nidr bam.
21 Yawe, glqpx-ngrne nim nzaodu-krm ninge.
Murde mzli kc enqmi rngeng tztu-ngalelvz-ngrdr lrpalvc nyznge, mnc-zpwxx mz nzetukr nivz lrm.
22 Mwxlrx murde opxm kx maszlrpx-ngrn ninge.
A' xlrme nzkqle-krnge nim kx naokatrq ninge.
23 Nigu leplz neng Yawe naka-lzbqbzku bade.
Murde aclvele kxnzvz-nqblq-zpwxlr nide, a' ayrplatipxle kxnzglqpx-lzbqng.
24 Bzkq nabzgu tzprlzm, a' natu-amqngiku
Mz nzbrtikr drtwrgu nide.