Sam Kranzpnu-pwx (40)
Nim Lrpalvc Kx Mncpx-ngrmc
Nabz ne Devet kx yrbzle mz kxrmailz ngr dzbe kxnzngrng.
Xlrme Nzkrka'-krnge
1 Yawe, sc tqaenzli-lrpipebo bam nzokatr-krm ninge.
X mzli kc tqkqle-ngrne nim, xlrme nzkrka'-krnge.
2 Veclzme ninge mz gq ngr nzbzngr x mz nabz mu kxrluo.
Atuome ninge mz rplz kxetu, x trpengr doa x da kx namwxlrtix.
3 Alvztrpe' bange kc nabz kxmrna mz nzrglqlzngr nim.
X mzli kc naxlrngr leplz nzngr-krngele, sa na-angiolr nim x na-abrtrpzlr drtwrdr bam.
Abrtrpo Drtwrnge Bam
4 Namrlzbz mz leplz kcng tzabrtrpzlr drtwrdr bam,
Krkcng trnzprtrpwzung mz leplz kcng tzglqpx-lzbq-ngrdr x tzpokiang.
5 Yawe, nim Gct rgr x trpnzngr kx apule nim.
Aleme bagr da kxkqlu mz nzatutr-krm drtwr kx yrlqq mz nzamrlz-krm nigr.
Drtwrnge yrpz'trpz nzrlwxngr da lcng amrlx,
Murde nzkqlu-zlwzng.
Ka-lzbqbo Bam
6 Trsutiu drtwrm nzrka-ngrbz bam dalr nrlanc ayrnrngr x dalr nzrkatxngr alwx.
X tr-rlx-kzpe'u blz x animol kx na-angcom mz olta nyzm.
A' da kx suti txpwz drtwrm nzxlr-krbo natqm,
Murde narlrpx-ngrbo nrkrdrtqnge bam.
7 Delc tqrpi-ngrbo bam kx, “Ninge kape.
Na-atutrx natq kcng tqyclzm mz Nzryrngrkxtr.
8 Gct rnge, abrtzlvzx nzale-krnge me pnz drtwrm,
Murde nabznge lolvz-amqngipele nzalvztr-krmqng.” ✡Hibru 10:5-7
Nzyapwxtipx-krnge
9-10 Yawe, trnayrlq-kapqpou nzaodu-krm x nzangidati-krm mz leplz nemqng.
A' sa napipx-zvzbo nrpa ngr nzarlapx-krm nigr
Mz nzyrlwrpx-lxblr-krgr.
X krlzq kx vz zvz nzpipx-krngele.
Trmnc-zpwxwxu
11 Yawe, krlzx kx yckqti zvz drtwrm ninge.
X nzaodu-krm x nzangidati-krm nzngini-zvzmlr lrpalvc kx mncpx-ngrmc.
12 A' mzli ka, rblx nzrlwx-krnge nzkxpungr amrlx kx nzprtztimqng bange.
X alwx rngeng nzmrilvzolr ninge x nzayc-kapqmlr bange da kxtubq.
Murde nzkqlu-zlwz-krdr nzmyaszpxlr nqnginarnge.
X nabznge tqtalvzo-zlwz-ngrde.
Krka'-mopwo Bam
13 Yawe, vz-anim mz nzarlapx-krm ninge.
Kxetu, rnekim mz nzokatr-krm ninge.
14 Okatrp ninge nzaovxio-krnge kxnzrpilr naodatilr ninge,
Murde drtqdr namya x naobqszong mzli kc nadwasz-ngrdr ninge.
15 X leplz lcng tzxtrnga-ngrdr ninge nelzdr navzdzm
Mzli kc nametx-ngrmlr bange.
16 A' amrlz krkcng tzbrti drtwrdr nim
Mz rka-krbzme badr nzabrtz-zlwzngr,
Murde na-awi-zvz-ngrbzlr bam nzarlapx-krm nidr
Mz nzrpi-krbzlr kx, “Gct, nim kx myatxlz-esz'ngr.”
17 Kxetu, trxplrwxu x trpnzngr scnge zmatq.
Bzkq mrbrtr mz drtwrm ninge.
Murde nim txpwz Mevalu rnge.
Bzkq asaq nzokatr-krm ninge. ✡Sam 70:1-5