Sam Kranzpnu-pwx-nrade-esz' (41)
Yawe, Krka'-ngrne Kx Nayc Mz Drtwrm Ninge
Nabz ne Devet kx yrbzle mz kxrmailz ngr dzbe kxnzngrng.
Kxnzokatrng
1 Namrlzbz mz doa kcng tzmrlztilr leplz kxnzmaneng,
Murde Yawe sa naokatrle nidr mzli kc nakxpu-ngrdr.
2 Sa na-aclvebzle nzlu-krdr.
X trtxpnzngr nzrlr-krbzle nidr mz mq enqmi rdrng.
Delc tzrpi-ngrbz kx Yawe amrlzpele lr mrnyzdr Israel.
3 Sa naokatrng Yawe mz nzamrlz-mou-krde nrkrdrtqdr
Mzli kc nayagox-ngrdr.
Enqmi Rngeng
4 Yawe, krka'-ngrne kx nayc mz drtwrm ninge
X na-amrlz mou ninge.
Zyagox kc tqycpxm mz nabznge
Vzpxm mz alwx rngeng kcng tzatrkatilr nim.
5 Enqmi rngeng nzpibqtilr ninge,
Nzrpilr kx, “?Myx mzli kx nabz-ngrde, murde namrbrtxtr mz drtwr nide?”
6 Kzdung leplz lcng tzoklatimlr ninge, nzpokiatilr kx nzyc mz drtwrdr ninge.
A' nzrpilr nakrlzlr kxmu nzkxpu-krnge, murde nayapwxtinedr mz mztea amrlx.
7 Nztrkati nivz lrdr ninge nzpikiti-lrpi-zvzlr ninge.
X nzaoti txpwz drtwrdr da kxtrka kx nadwatimle ninge.
8 Nzrpi-awalr kx, “Mrlztxpe! Mzli ka prtilz-zlwzpe zyagox kxtrka,
X mzli trnaboiu x sc tqbzpe.”
9 Mzli ka, kztenge kc tqabrtr-zlwzbo drtwrnge bade,
X tqmukr ncdr, nipe-kzde enqmi rnge. ✡Matiu 26:23; Luk 22:21; Jon 13:18
Nzokatrkr Gct
10 Yawe, krka'-ngrne kx nayc mz drtwrm ninge.
Amrlz-mopwz nrkrdrtqnge murde na-ayzlu-mopwc' da kcng tqtrka tzalemlr bange.
11 X mzli kc trna-aovxio-ngrdru ninge,
Sa nakrlz-angidrpex kx abrtzlvzq ninge.
12 Sa naokatrq ninge nzale-krnge da kxtubq,
X namnc-alotrpebo bam.
Nabz Kx Yrkrpxngr Buk Kc Kai
13 Naglqpxku Yawe, Gct r lr Israel.
Mzli ka x tqyc tqyc, naglqpxku Yawe.
Buk Krali
Sam 42—72