Sam Kranzpnu-rlimz-nrade-esz' (71)
Nzkrka'kr Kzdq Lrtzlvz
Brti Drtwrnge Nim
1 Yawe, mnc-xglex nim nztu-krme mz nibrnge.
X bzkq rlrpx-ngrn nzaovxiokr enqmi rngeng ninge.
2 Lalztqm bange mz nzokatr-krm ninge.
X arlapx ninge murde tubq-esz'ngrn.
3 Nangini-kzp me rlakitrx mz nzmnc-kapqtr-krbo bam.
Murde nim butqbr x lrpalvc nyznge.
4 Gct rnge, arlapx ninge mz mq leplz kxdrka'-ngrng,
Kcng tzrpilr naodatilr ninge.
5 Murde nim, Kxetu Yawe, kx brti drtwrnge, yzutr pnz mzli kc tqngi-oblabe-ngrne.
X sc tqvzbe nzabrtr-krbo drtwrnge bam.
6 Abzo mzli kc tzmcngr mzke', krlzmle mzli ka, mnc-xgletxpwo nim,
Mz nzaclve-zvz-krm ninge. Delc naglqlz-zvz-ngrne nim.
Okatr-mop Ninge
7 Nzrpi leplz kx ninge rkx ngr da kxtrka,
A' nim lrpalvc kxmqngi kx rlakitrx.
8 X glqlz-zvzx nim mz zbq kang kqlu,
Mz nzyapwxtipx-krnge nzmyalz-esz'ngr-krm.
9 Delc kxmule-esz' nipenge lrtzlvz, a' bzkq drtqm satrp bange,
X bzkq rlaszq ninge mzli ka tqyangrngape-ngrne.
10 Murde enqmi rngeng nzycmnetr-ngrdr ninge
X nzryrlqpeng drtwr,
11 Mz nzrpi-krdr kx, “Gct sc tqrlaszpele nide.
Vzmamu, nalolvzpeku murde trpengr kx na-arlapxle nide.”
Arlapx Ninge
12 Gct rnge, bzkq mnc-rlrume bange,
A' vz-anim mz nzarlapx-krm ninge.
13 Aovxio x odati krkcng tzrpilr natzlr x na-atrkatilr ninge,
Mz nzamyati-krbzme drtqdr x nzbatr-krbzme nzobqszokr leplz nidr.
14 Sa na-abrtr-zvzbo drtwrnge bam,
X naglqlz-ebir-ngrne nim.
15 Kxmule-esz' da kcng tqaleq nzkqlu-zlwzng,
A' mz zbq kang kqlu sa nayapwxtipxx nztubq-krm, x zmatq ngrm mz nzarlapx-krm leplz.
16 X sa navzbo bam mz nzglqlz-krnge zmatq ngrm,
Murde nim txpwz kx tubq-esz'ngr.
Vz Zvz Nzpipx-krnge Nzmyalz-krm
17 Gct, alvztrq ninge, abzo mzli kc tqngi-oblabe-ngrne.
X sc tqyapwxtipxbex da kx nzkctitxpx kcng tqwz-ngrn.
18 Mzli ka nipenge lrtzlvz x nqnginarnge prkipe, bzkq rlaszq ninge.
A' mncm bange mz nzyapwxtipx-krbo zmatq ngrm mz nrpr ngr leplz amrlx.
19 Gct, nzetukr nztubq-krm krlzlzle bongavz. ✡Sam 36:5; 57:10; 103:11; 108:4
X trpnz-moungr kx apule nim kc tqaleti da kxetuting.
20 X kxmule-esz' batrpe' nzetukr nzkxpu-krngeng, a' krlzx kx sa na-amrna-mowq nzlu-krnge,
Mz nzarlapx-krm ninge mz gq.
21 Sa na-aetunepxbzme nzamatqkr leplz ninge,
Mz nzaelalz-mou-krme drtwrnge.
Nabz Ngr Nzawingr
22 Gct rnge, nim Gct rgr, nigr lr Israel, x sa nangrbo bam mz nzayrni-krbo gita x ukzlele.
Tr-esz'ngrn x sa naglqlzx nim murde ngida angidrme bagr.
23 Sa namalq-katox mz nzabrtz-krnge,
X mz nabznge atwrnrngr sa nangrbo bam murde arlapxpeq ninge.
24 Mz zbq kang kqlu sa napipxbo nztubq-krm mz nzokatr-krm ninge.
Murde krlcng tzrpilr na-atrkatilr ninge aovxiopeqng x drtqdr myape.