Sam Kranzpnu-rpwxmz-nrade-rlimz (97)
Na-abrtzlvzku Yawe, King Kc Tqmyatxlz-esz'ngr
Zmatq Ngrde
1 Mrlz lr nrlc amrlx nzabrtz-krdr murde Yawe nide King kc tqmyatxlz-esz'ngr.
X lr trmctu naelalz-ngrm drtwrdr kz nide.
2 Zbo kxve x nzlo nzngrlelvzlr nide.
X nzaclve-krde leplz mrlz x tubq.
3 Nyr rtwayznepx kai mz nzvz-krde,
Nyr kx nangcngr enqmi kcng tztulvz-ngrdr nzti rde.
4 Bzlrpc ngrde kx pcpxle pnamilxtile nrlc,
X drtc' ycngrlrlzm.
5 Yawe nide Kxetu r nrlc tulvzo.
X mz nzmc-krdr nide newzng nzwxong nzapulr nzwxokr gq.
6 Lr Heven amrlx nzpipxlr nztubq-esz'ngr-krde,
X lr nrlc amrlx nzmclr nzmyatxlz-zlwz-krde.
Myaszpxle Kxnzmncng Mzlilxlr
7 Krkcng amrlx tzangiolr kx trngiu Yawe Gct angidr, drtqdr la namya zlwz.
X kxnzmncng mzlilxlr amrlx nzmu na-angiolr nide. ✡Hibru 1:6
8 Yawe Gct rgr, nigr lr Jerusalem x lr mztea amrlx ngr nqvi lr Judz abrtz-zlwz-ngrgr nim
Nzayrplapx-krm enqmi rgrng.
9 Murde lr nrlc amrlx nzmnclzbzng mz zmatq ngrm,
X nzmyalz-zlwz-krm myaszpxle kxnzmncng mzlilxlr amrlx.
Namnclzbzku Bade
10 Nigu kcng tzmrlztilr Yawe napxtxpx-ngrgu da kxtrka.
Murde tu-zvzbz mz nibr kxnztubqng mz nzarlapx-krbzle nidr mz mq kxdrka'-ngrng.
11 Yawe amrlzle kxnztubqng, kx nabzdr lqngi.
Murde na-abrtzlvzlr nzngini-krde Gct kxtr.
12 Delc, nigu kcng tztubqng na-abrtzlvzku Yawe,
Mz nzawi-krbzku bade.