Sam Kratrtqki-esz'-nzpnu-pwx-nrade-pwx (144)
Sa Namrlzbz Mz Leplz Mrkcng Amrlx Tqamrlz Yawe
Nabz ne Devet.
Mevalu Rnge
1 Yawe, glqpxx nim, murde nim butqbr nyznge.
X alvztrpe' bange nzrpnangr x axplrq ninge mz nzotangr.
2 Brti drtwrnge nzngini-krm lrpalvc nyznge.
Nim Mevalu kx xplr x me rlakitrx.
Nim temz ngr lomrnge kc tqyrputrngr nipna.
X okatr-zvzq ninge mz nzaovxio-krnge lr mrkzbleng.
3 ?A' memule tqmatq-ngrgr mz drtwrm?
?X memule tqmrlzti-ngrn nigr leplz txneng?
4 Nzmrbcnekr nzlukr leplz apule nzyrplaokr nrc kxesz'.
X apu-kzle zmio kc tqmrbr mz milzpq.
5 Yawe, lvxpx bongavz mz nzvzo-krme.
Maletr newz murde nasikapung nzapulr trmami.
6 Atwzlro-ngrm bzlrpc mz nzaodaliti-krm enqmi rngeng.
Pnzting nidr mz nipna scmqng murde navotxng.
7 Yawe, rtrngztiom ninge mz nzokatr-krm ninge,
Na-apule kx veclzme ninge me boongr prla.
X arlapxbz ninge mz mq lr mrkzbleng.
8 Murde nzmrlzti-txpwzlr nigr mz nzycmne-krdr.
A' trnzatutrlru nzesz'tikr drtwrgr badr.
Nzkrka'-krnge
9 Gct, sa nangr-ngrbo bam nabz kxmrna.
X na-angrlvzx nim mz nzayrni-krnge gita.
10 Murde okatr-zvzq king nemqng mz nzaovxio-krdrng.
X sc tqarlapxpebzme ninge mz toki r vea kxmalc, murde ninge kxnzawz nem.
11 Mzli ka arlapx-mopwz ninge mz mq lr mrkzbleng murde nzmrlzti-txpwzlr nigr mz nzycmne-krdr.
A' trnzatutrlru nzesz'tikr drtwrgr badr.
12 Delc mz nzkqlukr enqmi rgrng,
Krka'-ngrgr kx na-amrlzq nigr lr mrnyzm.
Murde obla negrng naxplrnelzm mz nzapu-krdr nounc kx xplr.
X olvi negrng naxplr-kzng x mztr nalqngi mz nzapu-krdr nctrpou ngr ma nyz king.
13 Dalr nrlanc nyzgrng nalvc-angidrng,
Murde bxli scgrng nayrbu zvz mz dakxnzng.
X animol negrng naeloting
Murde neidrng nayrlwrtxne.
14 X kxnzrmailz rgrng na-ale-zpwxlr nzwz-krdr,
Murde leplz ma tztangetrplr drkq ngr mztea nyzgr mz nzvzmi-krdr nigr mrnyzdr,
X lr mztea nyzgrng ma tzodalineng mz nzvzdz-krm nelzdr.
15 Yawe, leplz kcng tqokatrq mz da lcng, sa na-abrtz-ngrdr nzmnc-zpwx-krdr.
Murde leplz amrlx kcng tqnginim Gct rdr sa namnc-zpwx-zvzng.