Sam Kratrtqki-esz'-nzpnu-pwx-nrade-tq (143)
Nzadwatrlr Ninge Mz Nzlo
Nabz ne Devet.
Xlrm Nzkrka'-krnge
1 Yawe, xlrm nzkrka'-krnge x ayzlum natqnge,
Murde tubq-esz'ngrn x angidati-zvzq.
2 Bzkq ayrplapxq ninge, kxnzawz nem,
Murde trpnzngr leplz mz nrlc kxtubq mz nzobq-krm.
3 Enqmi rngeng nzmaneutilr ninge x nzrnzbrtiolr ninge mz drtc',
X nzadwatrlr ninge mz nzlo, apux kxbz kx mnclzm mz gq.
4 Nabznge baonepe,
X talvzo zlwz.
5 A' amqtrx drtwrnge mz nzaotikr drtwrnge zbq kcng tqvztxpeng.
X dcpx mz drtwrnge da kxnzkctipxng kcng tqalemeng bagr.
6 Delc tqglalz-ngrbo mqnge bam,
Murde brlxkztitx zlwz drtwrnge nim.
Ayzlum Natqnge
7 Yawe, ayzlu-anim natqnge murde nabznge baonepe.
Bzkq rlaszq ninge, murde ma tqbzx.
8 A' pi-zvzm bange mz rngalx kang kqlu kx aodu-zvzq ninge,
Murde abrtrpo drtwrnge bam.
X mailz ninge mz lrpzki kx nao-zlix,
Murde mnc-xgle-zvzx nim.
9 Yawe, bzkq rlr-ngrbzme mz enqmi rngeng nzlolvz-krdr ninge,
Murde nim me rlakitrx.
10 Gct rnge, alvztrp bange nzale-krnge me pnz drtwrm.
X rtwayzm bange mz zmrlz ngrm, murde namnc-zpwxx.
11 Yawe, arlapx ninge da kc tqwai nzpi-krmle murde ma tqbzx.
X tum mz nibrnge mz nzkxpu-krngeng amrlx, murde tubq-esz'ngrn.
12 Lolvzting enqmi rngeng x milxtxo alo nidr.
Murde aodu-zvzq ninge, kxnzawz nem.