4
Jon Mcle Nzangiongr Gct Heven
1 Mz nibr nzxlr-krnge letz lcng, obq-rmwible-moux x opx mz mzke' kc naonrx kx obq Heven. X sc tqxlr-moux natq Kraes kc etu tqapule nzyrnikr trpu, tqycmne-kaip ena bange. X rpi-mople kx, “Vzdzm mrka, murde na-aelwa-ngrbo bam da kx naprtilzmqng mzli lc navzm.” 2 X mzli lcpwz, Mqngrkxtr sc tqprsrpe-moule ninge. X mcx kc tron Heven, x wxbuom kc Kxetu elr. ✡Asaea 6:1; Esikel 1:26-28; 10:1 3 X Kxetu kc tqwxbuom mz tron lcde, mzte apule nzyaglqkr rplz kx opx, x nzpnaprkr rplz kxpc. X o-ngalelvzle tron nrpc' kx nilz rde apule rplz kx mqbq. 4 X mc-kzx tron nzpnu-li-nrade-pwx (24) nztu-ngalelvzlr tron nyzde, x kxnzaclveng nzpnu-li-nrade-pwx nzwxbuomqng elr, nzkq-lxblrng lrpz kxprki, x nzabx-lxblrng mz kraon kx ngi gol. 5 X mclz-kzx nzaglqpz'tikr bzlrpc x xlrlzx nzyrputipxkr bzlrmei mz tron. X mrkc tqlxlvrkipx tron woutrpz elr lam rlimz, rkx ngr Mqngrkxtr ne Gct kc nzwz-krdeng rlimz. ✡Nzrlaszngr 19:16; Esikel 1:13; Sekaraea 4:2 6 X yctr-kzpz kc elr da kx apule prla kx ngi dzpq kx otxpx. ✡Esikel 1:5-10, 22; 10:14 X nztu-ngalelvzlr nrlar tron kcng pwx krkcng tzlung kcng pwx. X mztr kqlu kxnzobqpx-kaing x kxnzobqpxng mq. 7 X krkcng tzlung, kx ayrnrngr apule laion, krali apule nei kzu kxncblongr, kratq mzte apule mz ncblo, x krapwx apule lr kc tqlvcpe. 8-10 Kxnzlung lcng pwx nabxdr esz'mz lxblr, x nrkrdrtqdr yrlwr-ngalelvz mztr x wai-kzle nabz nabxdrng. Nzglqlzlr x nzangiolr x nzawibzng mz Kxetu kc tqwxbuom mz tron, tqlu-zvzpe. X mz nrlckxngrlx x mz nrlckxbq tresakiu nzngr-krdr kx,
“Yawe, Gct kc tqrninr,
Drtqmq tr-esz'ngr.
Nimq kc tqmnc mzli ka,
X tqmnc zvz, x sa navzm.” ✡Esikel 1:18; 10:12; Asaea 6:2-3
X mzli lcdepwz, kxnzaclveng kcng nzpnu-li-nrade-pwx nzrweobzng zpr mz Kxetu kc tqwxbuom mz tron, tqlu-zvzpe. Nzkaobzlr kraon ngr nardr mrkc tqlxlvrkipx tron, x sc tzngrpeng. 11 Nzrpibzlr kx,
“Yawe, nipem Gct rgr.
X takitrde nim
Nzrglqlzngr, nzangiongr,
X nzrpipxngr zmatq ngrm.
Murde wz-ngrn doa amrlx,
X da amrlx mz nrlc.
X mz nzwz-krmqleng
Nzmnc-krdr x nzyc-krdr,
Nzvz-nqblqlr me pnz drtwrm.”