5
Nei Sip Kc Heven
1 Zbz mcx kc skrol kx apule lrpzu kxboi kxnzbu. X male Kxetu kc tqwxbuom mz tron mz mqde kxrtc. X skrol lc nzyr nrlarde rlilr. A' nzbupe x nzabli-kzo-ngrde nrlc rlimz mz kadol kx apule bq lr nounc. ✡Esikel 2:9-10; Asaea 29:11 2 X mcx kc enjrl kx matq-esz'ngr, x sc tqetumipe nate nzrpi-krde kx, “?Neke takitrde nzrniglcngr kadol lcng rlimz murde nakawxpxle skrol lc?” 3 A' trpnzngr kx nzrmcti Heven, mz nrlc, x mrnyz mqngr kxnzbzpeng kx takitrde. 4 Sc tqyrnitx-zlwzpex. 5 A' kzdq kxnzaclve lcng rpimle bange kx, “Bzkq yrniq! Mcpwz! Laion ngr Neidu lr Judz. Ncblo kxmatq kc tqngi melrmqde King Devet, x aovxiopele nzvecngr. Sa naniglcle kadol lcng rlimz murde narkawxpx skrol lc.” ✡Nou 49:9; Asaea 11:1, 10
6 Zbz mcx kc Nei Sip tutrpz mrkc tqlxlvrkipx tron, x kxnzlung kcng pwx x kxnzaclveng kcng nzpnu-li-nrade-pwx (24) nztu-ngalelvzlr nide. Nei Sip kc opxm kx nznibqpe. X tutrpz bade dxpa' rlimz kx ngi rkx ngr zmatq ngrde. X mzte rlimz kz, rkx ngr Mqngrkxtr ne Gct kc nzwz-krdeng rlimz, kx atwzlrpx-ngrde mz nrlc tulvzo. ✡Asaea 53:7; Sekaraea 3:9; 4:10 7 Nei Sip sc tqvzpebz mz Kxetu kc tqwxbuom mz tron x otibzle skrol kc tqmalele mz mqde kxrtc. 8 X mzli lcpwz, kxnzlung kcng pwx x kxnzaclveng kcng nzpnu-li-nrade-pwx nzrtco-lzbq-ngrbzng mz Nei Sip nzglqpx-krdrle. X nzrtaplxsrng gita x dis kx ngi gol yrbu lxblr mz bqlr nc ninz, krlcng nzkrka'kr leplz neng Gct. ✡Sam 141:2 9-10 Zbz sc tzngr-ngrdr kc nabz kxmrna, mz nzrpi-krdr kx,
“Nipem ncblo kx rtwz skrol la,
X takitrde nim,
Nzrniglcngr kadol ngrdeng
X nzrkawxpx-kzngr.
Nim blz kx nznibqng.
Mepyr ngrm yrleo.
Xpetrle leplz neng Gct.
Leplz lcng nzprpxmqng mz nou, natq, drtc', x
Neidu amrlx mz nrlc. ✡Sam 33:3; 98:1; Asaea 42:10
“Nim kx rvzmimqng leplz lcng amrlx,
Nidr kxnzprpxmqng
Mz nou, natq, x neidu, x drtc' amrlx
Mrka mz nrlc tulvzo,
Murde nangini-ngrdr
Pris neng Gct rgu,
Mz nzwztr-krbzlr bade.
X nidr kx na-aclveng ncdr mz nrlc,
Mz nrlc tulvzo, eu.” ✡Nzrlaszngr 19:6
11 Zbz obq-mopwc' x xlrx nzngrkr siu ngr zbo ngr enjrl kx rblx nzrlwxngr. X enjrl lcng nzyrlwr-ngalelvzlr tron, mrkc nzmnc-kzng kxnzlung kcng pwx x kxnzaclveng kcng. ✡Daniel 7:10 12 X natr kc tqetupe mz nzngrngr kx,
“Nimq Nei Sip kc tznibq,
X takitrde nim
Nzrpipxngr zmatq ngrmq,
Nzkrlz-angidr-krm,
Kx nim angidr bcnyr, x xplr-esz'ngrn.
X takitrde nim kz
Nzrglqlzngr, nzangiongr,
X nzrglqpxngr zvz.”
13 Zbz xlr-moux krkcng lu amrlx, kxmule-esz' Heven, mz nrlc, mrnyz mqngr kxnzbzpeng, prla, x nrlc atwrnrngr, a' nzngrpx-lxblr-ngrdr mz nzrpi-krdr kx,
“Kxetu rgr, kc tqngi Nei Sipq,
X Gct kc tqwxbuom mz tron,
Naglqpxkr nimu, na-amatqkr nimu,
Na-awi-ngrbzkr bamu.
X napipxkr zmatq ngrmu
Kx myalz-esz'ngr.
Me tutr-ngrde lape!
Na-angiokr nimu, naglqlzkr nimu,
Tqvzpe tqvzpe! Eu!”
14 X kxnzlung kcng pwx nzrpibzlr kx, “Eu, angida!” X kxnzacvleng kcng nzrtco-lzbqng mz nzangiongr.