1-2 Mzli kang kqlu drtqnge etq zlwz x drtwrnge vztx-ngrde kxnginingeng, lr Jiu, mz nzpxtxpx-krdr Kraes. Pibo da lc bamu x krlzamu kx ngi da angidr murde nede ninge Kraes. X Mqngrkxtr ncdr nzao-krnge drtwrnge, nzpimlr mz nabznge kx trpokiawxu. 3 Lr Jiu kxkqlu trnzlxngitilru Jiszs nzngini-krde Mevalu Kxnzmcpx. A' suti zlwz drtwrnge nzokatr-krnge nidr mz nztekqtr-krdr nqmq nr drtwrdr, murde nidr kxnginingeng x nqvi kr bangeng. Kxmule-esz' rblx, a' da kx aoti txpwz drtwrnge nide sele—nzayrplapxkr Gct ninge x nalakitxpxmle ninge mz Kraes, nzmu da lc kx tqkrlzle nzokatr-krde lr Jiu lcng mz nzesotr-krbzlr mou mz Gct. A' trtingr. 4 Sc tqmcpx-pnzng Gct lr Israel mz nzngini-krdr doa nedeng. Mrkc lzke nzmclr rkx ngr nzmyalz-krde x yrlqbzle Nzesz'tikr Drtwrdr badr, x kabzle Loukxtr badr mz Newz Saenae. Alvztr-ngrde nidr kxnamu nzangio-angidr-krdr nide x esalz-ngrbzle badr da kcng tqmyapxbz mz nzvz-krm Kxnzmcpx. ✡ Nou 9:8-9; 17:2; Nzrlaszngr 24:8; Josua 8:33; 2 Samwel 23:5 5 Melrmqdrng nidr ncblo kxnzetu neng Gct kcng bqnc, x Kraes nzmika kz apule leplz mz nqvi lr ncblo lcdeng. A' nide kc tqmyaszpxle doa x da amrlx. Naglqlz-zvz-ngrgu Gct! Angida!

6 Bzkq rpiamu kx Gct tratutrleu nzesalz-krbzle badr. Murde trngiu leplz amrlx kcng nzmika mz nqvi lr Israel kcng tqmcpx Gct. 7 X trngiu leplz amrlz mz nqvi lr Ebraam kx nznginidr leplz neng Gct. Murde rpibz Gct mz Ebraam kx, “Nqvi lr ncblo nem angidr nayzuo mz mrlxm Aesak.” ✡ Nou 21:12 8 Drtwr ngrde nznginikr leplz doa neng Gct trvzpxpuu mz nzngini-krdr nqvi lr Ebraam. Murde leplz amrlx kcng tzlxngitilr Gct, da kc tqwai Ebraam, nidr angidr doa ngr nqvi lrde. 9 Natq lcng tqesalz-ngrbz Gct mz Ebraam kx, “Mzli kapwz, mz yiz lc navzm, sa nabatrpo mz Sera nzkrlz-krde nzmika-krde mrlxde.” ✡ Nou 18:10, 14 10 Kxmu-kzle lc mz Rebeka kc mrlxde tzlipxmqng, trtedr esz', krlc melrmqgu Aesak. 11-12 Kxmule-esz' mztr trnzmcka x trnzalekalr da kxmrlz o da kxtrka, a' rpibz Gct mz Rebeka kx, “Mrlxm kxetu sa nawztrpz mz mzlede kxtopwz.” ✡ Nou 25:23 Gct pile da lc mz nzaelwapx-krde kx nzmcpx-krde leplz trtuou mz da kx nzalelr, a' tuo mz drtwr kx yrlq-pnzle. 13 Da kc tqwai nzpikr Gct le mz Nzryrngrkxtr kx, “Mrlztix Jekop, a' pxtxpx-ngrne Isc.” ✡ Malakai 1:2-3

14 ?Nike, napiku kx Gct vz-rbr mz nzale-krde da lc? Bzkqtx pnz! Murde Gct tubq zvz. 15 X rpibzle mz Mosis kx, “Sa naycngr drtwrnge doa kx pnz drtwrnge. X sa naokatrx doa kx pnz drtwrnge.” ✡ Nzrlaszngr 33:19 16 Mz nzmu-krde lcde, Gct sa namcpxle krkcng natwzlr da kx esalz-ngrde. X nzmcpx-krde leplz tryctru mz nzrsutikr drtwrdr o mz nzale-krdr da, a' mz nzryckr drtwrde nidr. 17 Na-aoti kz drtwrgu King r Ijipt. Murde Nzryrngrkxtr alvztr-ngrde kx Gct rpibzle bade kx, “Yrlqx nim mz nzngini-krm king, murde na-aovxiox nim mz zmatq rnge x nrpa rnge natalvzole nrlc.” ✡ Nzrlaszngr 9:16 18 Mz nzmu-krde lcde, opx angidr kx Gct ycngr drtwrde kzdung leplz, mz nzvz-nqblq-krde me pnz drtwrde. X batr-kzpzle nzmqngikr nar kzdu-kzng leplz, vz-nqblq-kzle me pnz drtwrde. * 9:7 Kzdung doa neng Ebraam nzvzpx-kzpqng mz mrlxde Ismael, mrlx Haga. A' doa lcng trnzatutrlru da kc tqesalz-ngrbz Gct mz Ebraam, x trnginidru leplz kcng tqmcpxle. [Nou dckrlzdeng 15—18, 21] 9:13 Isc x Jekop nzlipxmqng, x Isc nide kc nzmika kai. 9:17 Mzli kang kqlu King r Ijipt, narde mqngi. [Nzrlaszngr 7:22; 8:15, 32] Zbz sc tqbatrpebz Gct nzmqngi-zvzkr narde. [Nzrlaszngr 9:12, 35; 10:27; 11:10]

19 Mwx kzdung leplz sa narpimlr bange kx, “Leplz lcng nzale-txpwzlr da kc tqbatrpz Gct badr nzale-krdr le. X rblxbz badr nzvecpx-lzbq-krmlr mz zmatq ngr me pnz drtwrde. ?A' nike Gct tqayrplapx-ngrde leplz kcng trnzlalztqpwzung bade?” 20 A' sa na-ayzlu-ngrbo natqdr kx, “Bzkq kxmu nzvea-krmu lc.” Murde nimu leplz, x trtakitrdeu leplz nzycmnetitr-krdr Kxrpalz kc tqwz-ngrde nidr. Murde ma nyz ncblo tr-rpipwzleu mz ncblo kc tqwz-ngrde nide kx, “?Nike tqmu nzwz-krm ninge lc?” 21 Murde ncblo kx rwzngr ma, takitrde nzvz-nqblq-krde me pnz drtwrde esz'-krde. Krlzle nzwzngr ma kx li, kzdq kxnzmwingr, x kzdq kxnzasungr dakxnzng.

22-23 Kxmu-kzle lc mz Gct. Murde kxmule-esz' takitrde nzayrplapx-krde kxnzaleng alwx mz zngya ngr drtwrde, a' rlr-ngrbzle badr nzmncbengr mz nrlc mzli ka x trayrkrpx-anileu nrlc. Murde na-aelwapx-kai-ngrbzle nzyckr drtwrde x rkx ngr nzmyalz-krde mz leplz kcng mztr trnzmcka, tqmcpx-pnzleng, x sc tqayrplapx-atele kxnzaleng alwx. 24 Alemle da lc bagu, nigu kcng tqkqleleng, kxmule-esz' nigu lr Jiu o kxtrngiulrJiu. 25 Da kc tqwai nzpikr profet Hosia le mz Nzryrngrkxtr kx, “Leplz kcng trngiu leplz nengeng mzli kc, sa narpibo badr mzli ka leplz nengeng. X leplz kcng trnzprtr-pnzung mz nivz lrnge mzli kc, sa narpibo badr mzli ka kx mrlzti-zlwzpexng nidr.” ✡ Hosia 2:23; 1 Pita 2:10 26  “X mrkc tqrpi-ngrbo badr kx, ‘Trnginipwxmuu leplz nengeng,’ mrlcdepwz dekc narpi-ngr-mopwc' badr kx, ‘Nimu doa neng Mevalu Gct.’ ” ✡ Hosia 1:10 27 A' profet Asaea ycmnetr-ngrde Israel, rpile kx, “Kxmule-esz' leplz ngr Israel nzkqlu-krdr apule drta' ngr prla, a' kxpipz txpwz delang narlapxng. 28  Murde ycpwz pipz Yawe sa na-atutrle nzayrplapx-krde leplz amrlx mrka mz nrlc.” ✡ Asaea 10:22-23 29 X Asaea ycmnetr-mou-ngrde da lc, rpile kx, “Nzmu Yawe trnarlrpx-ngrdeu bagu kzdung doa negung kxnzpipzng, e nigu lr Israel milxtxopeleng, da kc tqwaisr-ngrde lr Sodom x lr Gomora.” ✡ Asaea 1:9; Nou 19

30 Drtwr ngr da lcng tqpibo bamu kxmule se. Leplz kcng trngiulrJiu nztubqng mz nzobqkr Gct murde nzbrti drtwrdr Kraes, kxmule-esz' mzli kc trnzabzlru nzvz-nqblq-krdr Loukxtr. 31 A' lr Israel kcng tzabz-zlwzlr nzrvz-nqblqngr Loukxtr murde natubqbzng mz nzobqkr Gct, trnzyatrpwzung mz nzkrlz-krbzlr bz lc. 32 ?Nike trnzyatr-ngrpwzlru? Trnzyatr-ngrpwzlru murde trnzabzlru nzkrlz-krbzlr bz mz nzbrtikr drtwrdr da kc tqesalz-ngrbz Gct badr. A' nzabz-alzulr nzkrlz-krbzlr bz mz nzvz-nqblq-krdr natq amrlx kcng tzyrong mz Loukxtr mz nzxplr-krdr esz'-krdr. X mz nzpxtxpx-krdr lrpzki r nzarlapxngr kc tqyrlq Gct, nztaong mz nou rplz kc tzyrputrngr leplz. † Mz drtwr lr Jiu, rblx nzbzkr Mevalu Kxnzmcpx. Mzli kc tzxlr-ngrdr kx Kraes bz-ngrde nidr, nzpxtxpx-ngrdr drtwr lc. X mz nzmu-krde lcde, nztaong mz nou rplz, kc tqngi Kraes esz'-krde.