1 Ŋaahani ebiŋamba hu husoloosa obuyeedi ohuŋirira abaatu ba Hatonda abali e Yerusaalemu, muhole ngʼolu naloma ebibbubbu byʼabafugiirira Kurisito ebyʼe Galatiya. 2 Hu ludaalo oludaayi mu wiiki, hiisi muutu hu enywe abeho nʼehyatanga hutulo ni geema hu suna yiye, ko ŋaŋume husoloosa ebbeesa ni niijire. 3 Ni nahaaje, nja huŋa abaatu abamunahangale ebbaluŋa ni mbanjulayo baŋirire abafugiirira Kurisito mu Yerusaalemu obuyeedi obwo. 4 Ni hinahabe ni hinetaagisa ohutiiniraho, hulitiina.

5 Oluvanyuma lwʼohubitira mu twale lyʼe Makedoniya, nja huuja mbaboneho. Hiri hiityo olwohuba nja hubitira e Makedoniya. 6 Soomanya panga ohubaaho ni nenywe ohwola olu biseera byʼobuŋololohi obubitiirifu biriŋwaho mwahapaho obuyeedi ko neyongerayo nʼolugendo lwange. 7 Sinenda huuja eyo ohubabonaho ŋadiidiri ehiseera ehyo ni mbita hubita. Suubira ohuhena ni nenywe ahamanga ahaŋeraho, Musengwa nʼaliba ni gendire. 8 Aye nja huba mu Efeeso ohwola hu ludaalo lwa Petekoote,*16:8 Petekoote Endaalo amahumi etaanu oluvanyuma lwa pasika. 9 olwohuba Hatonda ganjiguliraŋo olwigi mu Efeeso ohubuulira Amaŋuliro Amalaŋi wayire nga bangi bapahania.

10 Temuseewo nʼaliija, mufubeho ohubona muuti siŋabaŋo hiitu hyosihyosi ehimuleetera ohutya nʼali ni nenywe olwohuba yeesi aŋeeresa Musengwa, hyʼese. 11 Olwʼehyo ŋatabaŋo muutu yesiyesi amutalirisa aye mumuyeede mu lugendo lulwe ohugobola eno era musuubira ohugobola nʼaboluganda abandi.

12 Ebiŋamba hu muganda yeefe Apolo, namuhubbirisa bugali ohuuja eyo nʼaboluganda. Gaali sigenda, ne anahaaje nafunire ehiseera.

13 Mwegenderesenga era mwegumye ohwema nʼamagulu abiri mu hufugiirira hwenywe, mube basira era abʼamaani. 14 Hiisi hiitu muhiholenga muhwendana.

15 Aboluganda, muhimanyire muuti abaatu bomu mago ga Sitefanaasi njʼabeheerera ohufugiirira Kurisito mu twale lyʼAkaya, era beeŋayo ohuŋeeresanga abagwalaafu ba Hatonda. Kale mbahubbirisa 16 mugonderenga abaatu hyʼabo era ni naabo abaholera ŋalala ni nabo. 17 Naali musangaafu olwʼohuuja hwa Sitefanaasi ni Forutunaato nʼAkayiko. Hiri hiityo olwohuba babaaye baapa obuyeedi obu enywe mwahapaaye ni muliŋo. 18 Era bangobohisemo amaani ngʼolu babagobosamo mwesi ni babalomera ebifa eno. Muŋenga abaatu hyʼabo eŋono.

19 Ebibbubbu byʼabafugiirira Kurisito ebyomu twale lyʼAsiya, bibahehiise. Akwila nʼomuhasi wuwe Pulisikira, ŋalala nʼabafugiirira Kurisito abahumbaanira mu mago gaawe, babahehiise bugali mu siina lya Musengwa. 20 Aboluganda bosibosi eno, babahehiiseho. Hiisi muutu aheese owahye mu keesa eyʼabaatu abagwalaafu.

21 Ese Pawulo samwene mbaŋandiihiiye obuheese buno nʼomuhono gwange. 22 Ni ŋaba ni ŋaliŋo omuutu yesiyesi atenda Musengwa, oyo muŋwabe. Musengwa, hola ogobole.

23 Ehisasabirisi hya Yesu Kurisito Musengwa weefe, hibe ni nenywe.

24 Hulwa Yesu Kurisito, mbenda mwesimwesi. Amiina.†16:24 Ebyaŋandihiwa ebindi biŋuma “Amiina.”