Ebbaluŋa eyohubiri eyi Pawulo gaŋandiihira
Abakoriiso
Enyanjula
Pawulo omuhwenda wa Yesu njʼowaŋandiiha ebbaluŋa eya Bakoriiso eyohubiri. Bateberesa baati gayiŋandiiha ŋagati wʼataanu nʼetaanu nʼataanu namukaaga oluvanyuma lwʼohusaaliwa hwa Kurisito. Yino njʼebbaluŋa eyohubiri eyi Pawulo gaŋandiihira Abafugiirira Kurisito abomu hibuga Koriiso. Ŋaŋuma ebbaluŋa eyi alomaho mu 2:3-4. Abahugu mu byʼEbbayibbuli bateberesa baati Pawulo gayiŋandiihira mu twale lyʼe Makedoniya (2:13).
Ebbaluŋa yino yʼenjabulo hu ndaayi olwohuba Pawulo gaali musangaafu olwʼohuŋulira eripoota endaŋi ohuŋwa eyiri Tito ni yiŋamba hu bafugiirira Kurisito abʼe Koriiso. Ebbaluŋa yino, yisomesa hu hugaba ngʼolu hiri mu Ndagaano Epyaha (8–9). Hiboneha oti abasomesa abʼobudulingi baali batambisa abaatu abʼesambo embi mu hibbubbu hyʼabafugiirira Kurisito ehyo olwʼohwenda ohuŋaha Pawulo esiro. Ehyo hyamuleetera ohuloma hu bubonero owʼomuhwenda wa Yesu Kurisito.
Ebiri mu bbaluŋa yino mu buupi
1. Pawulo aheesa abafugiirira Kurisito (1:1-7)
2. Pawulo acuusa etegeha yiye (1:8–7:16)
3. Ohusoloosa obuyeedi owʼabafugiirira Kurisito abʼe Yerusaalemu (8:1–9:15)
4. Pawulo geromereraho ngʼomuhwenda wa Yesu (10:1–13:10)
1
1 Ndiise Pawulo, owafuuha omuhwenda wa Yesu Kurisito, olwʼohusiima hwa Hatonda ni ndi nʼomulebe Temuseewo, hubaŋandiihira enywe ehibbubbu hyʼabafugiirira Kurisito mu hibuga Koriiso, ni naabo bosibosi abali hiisi ŋaatu mu twale lyʼAkaya.
2 Hatonda seefe ni Musengwa Yesu Kurisito, babaŋambire ehisasabirisi era babaŋe emiyaaya.
Pawulo ajumirya Hatonda
3 Hujumirye Hatonda era Semwana ya Musengwa weefe Yesu Kurisito, Seefe oyo owʼehisa era Hatonda agumya abaatu. 4 Oyo njʼatugumya ni huli mu bigosi ebya hiisi ngeri, hwesi ko hwasobola ohugumya abo ababa ni bali mu bigosi. 5 Hiri hiityo olwohuba eyi huhomya ohubonaabona ngʼolu Kurisito gabonaabona, peyi Hatonda ahomya ohutugumya nʼabita mu Kurisito. 6 Ohubonaabona hwefe hwahubaleetera ndinywe ohuba bagumu mu hufugiiirira era ehyo hibaŋweramo ohunoŋoha. Hatonda nʼatugumya, mwesi hibaŋa obugumu mwaŋanga ohugumira ebigosi ngʼolu efe hubigumira. 7 Olwʼehyo, hubalimo esuubi eryʼamaani era humanyire huuti muja hugumira ebigosi hyefe, olwohuba mwesi Hatonda aja hubagumya ngʼolu atugumya efe.
8 Aboluganda, hwahendire mumanye ohubonaabona ohuhwabitamo ni huli mu twale lyʼAsiya. Batugudya ehibitiriiye era hwaŋwamo nʼesuubi eryohuba abalamu. 9 Mu butuufu hyali oti hani batusaliiye ogwʼohufa. Era ehyo hyatusomesa ohutesiga amaani geefe, aye ohwesiga Hatonda yeŋene alamusa abafu. 10 Hatonda owatuŋonia ehigosi hyehyo, husuubira huuti aja hweyongera ohutuŋonianga ebindi. Era esuubi lyʼefe liri mu mwene oyo. 11 Olwʼehyo, hubasunga mutusabire era olwʼesaala jʼabaatu abangi Hatonda alituŋa ekabi hyahena hyaleetera abaatu bangi ohumweyaasa hu lwefe.
Pawulo acuusa mu tegeha yiye
12 Aboluganda, ehituleetera ohwepaaha hiri ti mu myoyo jeefe huŋulira huuti enebisya yeefe mu baatu nʼohuhirira erala mu kolagana yeefe ni nenywe, hubaaye bʼamazima eyi muli olwʼamaani ga Hatonda. 13 Era sihuŋanga hubaŋandiihira ehiitu ehimutaŋanga ohusoma mwategeera. Era suubira ti 14 wayire simututegeera bulaŋi, ehiseera hiryola mwatutegeerera erala bulaŋi, ehyo hibaleetere ohutwenyumirisamo ngʼolu hwesi hulibenyumirihisamo hu ludaalo olu Yesu Musengwa aligobola ohusala emisango.
15 Era olwohuba nahitegeera, nategeha ohusookera eyo ko mwahaganyulwamo habiri. 16 Nategeha ohubahyalira ni tiina e Makedoniya, era mu hugobola nindi mbaboneho mupeho obuyeedi ni tiina e Buyudaaya. 17 Olwo, olwʼohusalamo olugendo olwo, ŋaahani muŋeega muuti sinoheresa ehi mba ni ndomire? Era muŋeega muuti ekola yange yitiinira hu yʼabaatu abatafugiirira Kurisito abaloma baati, “Naahole,” aye ŋabitaŋo ahaseera hatotono nga baloma baati, “Sinaahole?”
18 Aye ngʼolu Hatonda ali wʼamazima, obuhwenda weefe eyi muli bubulamo hwefudula. 19 Hiri hiityo olwohuba Yesu Kurisito, Omwana wa Hatonda oyu ese ni Silaasi ni Temuseewo hwabalomera ebimuŋambaho, sigefudula. Aye niye hiisi ehi aloma, ahiroma nʼomwoyo mulala. 20 Hiisi ehi Hatonda gasuubisa, Kurisito gahyoheresa. Era hwesi mu huŋa Hatonda eŋono nga hutaaho enjihiso huuti, “Amiina,” ni hubita mu Kurisito omwene oyo. 21 Hatonda njʼagima efe ni nenywe hwemerera nʼamagulu abiri mu hufugiirira Kurisito. Era Hatonda gatujuhaho amafuta, 22 gatutaaho ahabonero ohulaga ati huli babe era gatuŋa Omwoyo wuwe ngʼomusingo ohulaga ati alituŋa ehi gasuubisa.
23 Mu moni ja Hatonda ehi mbaloma njʼamazima ti ehyagima ndiniija eyo e Koriiso, hyali hyahubasaasira mutalumwa myoyo ni mbanenya. 24 Sinenda efe hube ndiife ohubalomera engeri eyi muli nʼohufugiiriramo Kurisito aye huholera ŋalala ni nenywe ko mube basangaafu era muŋangale mu hufugiirira hwenywe.