Ebbaluŋa eyohubiri eya
Yowaane
Enyanjula
Ebbaluŋa ya Yowaane yino, Yowaane omuhwenda wa Yesu njʼowayiŋandiiha, ŋagati wʼomwaha ogwʼataanu nʼecikumi oluvanyuma lwʼohusaaliwa hwa Kurisito. Yowaane saalaga ati njʼowaŋandiiha ebbaluŋa yino aye geranga ati gaali mutangirisi. Yowaane gaŋandiiha ebbaluŋa yino nʼali mu hibuga Efeeso.
Mundoma eyʼohubbumbirya, Yowaane aloma ati aŋandiihira omuhasi omutobole ko nʼabaana babe. Hamunga gaali aloma hu hibbubbu hyʼabafugiirira Kurisito. Ehigendererwa hya Yowaane ohuŋandiiha ebbaluŋa yino, hyali hugumya abafugiirira Kurisito nʼohubalabula ohwehuuma abasomesa abʼobudulingi.
Ebiri mu bbaluŋa yino mu buupi
1. Obuheese (1:1-3)
2. Ehiragiro hyʼohwendananga (1:4-6)
3. Ohulabula ohuŋamba hu basomesa abʼobudulingi (1:7-11)
4. Engohoba (1:12-13)
1
Enyanjula
1 Ese omutangirisi, pandiihira ewe omuhasi*1:1 Bangi baŋeega baati hwali hubbumbirya mu hifo hyʼohuloma oti ehibbubbu hyʼabafugiirira. oyu Hatonda gatobola ko nʼabaana babo aba nenda obugali. Sindiise seŋene abenda aye ni naabo abamanyire amazima boosi babenda, 2 olwohuba amazima aga hwafugiirira sihuja hulehera aŋo ohugafugiirira emirembe nʼemirembe.
3 Hatonda Seefe ni Yesu Kurisito Omwana wuwe batuŋambire ehisasabirisi era batuŋenga emiyaaya mu mazima ne mu hwendana.
Amazima nʼohwenda
4 Hyasangaasa ni naŋulira ti balala hu baana babo bafugiirira amazima, ngʼolu Hatonda Bbaabba gaatulagira. 5 Olwʼehyo, ewe omuhasi omuhoda, sikuŋandiihira hiragiro hinyaaha aye ehyo ehi batuŋa hale nʼatulagira hwendanenga.*1:5 Yow 13:34; 15:12,17 6 Ohwendana hitegeesa ohugondera amagambi ga Hatonda. Ngʼolu mwaŋulira ehiragiro ehyo ohuŋwera olu mwafugiirira Yesu, ehiragiro hihye hiri ti mwendanenga.
7 Hiri hiityo olwohuba abasomesa abʼobudulingi bahwene ehyalo hyosihyosi. Basomesa baati Yesu Kurisito sigafuuha muutu era sigasaaliwa. Omuutu asomesa atyo, aba adulinga era aba mulabe wa Kurisito. 8 Olwʼehyo, mwehuume ko mutafiirwa ehi mwafululuhanira†1:8 Oba ehi hwafululuhanira. ni muŋeeresa Hatonda, aye musune omugabo mu wiijufu ogu gabasuubisa. 9 Hiisi muutu alehaŋo ohufugiirira ebiŋamba hu Kurisito ngʼolu bamusomesa, oyo saaba nʼahiiri bulala ni Hatonda. 10 Omuutu yesiyesi asomesa ebyʼobudulingi, simumusangaliranga nomu mago genywe. 11 Oyo amusangalira aba ali bulala ni naye mu bikolwa bibye ebibi.
12 Ndi nʼebingi ebyʼohuhuŋandiihira aye olwohuba suubira ohuuja eyo kuboneho era huŋaye hwahasangaalira ŋalala.
13 Abaana ba mugandaawo aba Hatonda gaatobola, boosi bahuhehiseeho.