Ebbaluŋa eyohudatu eya
Yowaane
Enyanjula
Ebbaluŋa ya Yowaane yino Yowaane owaali omuhwenda wa Yesu njʼogayiŋandiiha ŋagati wʼomwaha ogwʼataanu nʼecikumi oluvanyuma lwʼohusaaliwa hwa Kurisito. Yowaane saalaga ati njʼowaŋandiiha ebbaluŋa yino aye geranga ati gaali mutangirisi. Yowaane gaŋandiiha ebbaluŋa yino nʼali mu hibuga Efeeso.
Ebbaluŋa yino gayiŋandiihira omusinde oyu baali ni balanga baati Gaayo. Yowaane aloma ati Gaayo gaali meriiwe era gaali nʼomwoyo mulaŋi ni ganirisanga abageni.
Ebiri mu bbaluŋa yino mu buupi
1. Ohwanjula (1:1)
2. Ahubbirisa Gaayo era amusunga ohweyongera ohwanirisanga abageni (1:2-8)
3. Yowaane aloma hu Diyotireefe ni Demetiriyo (1:9-12)
4. Engohoba (1:13-14).
1
Enyanjula
1 Ese omutangirisi, kuŋandihira ewe Gaayo oyu nenda nʼomwoyo gwange gwosigwosi.
2 Meeri yange, kulombera ekabi ebiitu bihutiinire bulaŋi era weyongere ohuba bulala ni Hatonda mu bulamu bubwo. 3 Nasangaala bugali abalebe mu Yesu ni baaja batuŋayira ngʼolu ohigumiiye hu mazima agaŋamba hu Yesu. 4 Eŋuma ehisangaasa hyʼohuŋulira ti abaana bange bahigendera mu mazima.
Ebiraŋi bya Gaayo
5 Wahyange, oholire bingi nʼoyeeda aboluganda wayire abandi baba bageni nʼotabamanyire. Ebikolwa bibyo biraga biiti oli mwesigwa. 6 Abalebe aba waŋa obuyeedi baatuŋayira engeri eyi wendamo abafugiirira Kurisito bahyo. Era neyongera ohuhusunga ti weyongere ohuyeeda abaatu hyʼabo ohweyongera mu lugendo lwawe. 7 Abalebe abo bagenda ni baŋeeresa Yesu Kurisito era sibasuna buyeedi ohuŋwa mu batafugiirira Kurisito. 8 Olwʼehyo hiraŋi ohuhuuma abaatu hyʼabo mu mago geefe olwohuba huba hutambira ŋalala ni nabo mu hubuulira Amaŋuliro Amalaŋi.
Diyotireefe ni Demetiriyo
9 Naŋandiihira ehibbubbu hyʼabafugiirira Kurisito hu hiitu cʼehyene aye Diyotireefe olwʼohwenda ohuba omutangirisi waawe sigaŋulirisa byange. 10 Era atiinire nʼatulomaho bubi. Olwʼehyo, keesi ni nahaaje eyo nahalome mu lwijuuye hu ebi ahola. Saahoma hu hyʼohutuŋaha esiro hyoŋene cooka era sigenda nʼohusangaalira abageni ababahyalira. Nindi abo ababasangaalira ahena gababbinga baŋwe mu hibbubbu hyʼabafugiirira.
11 Wahyange omuhoda, otebisyanga hya niye aye weyongere ohuhola ebiraŋi. Oyo ahola ebiraŋi, ebikolwa bibye biraga biiti mwana wa Hatonda. Aye ahola ebibi, ebikolwa bibye biraga biiti saamanyire Hatonda. 12 Abaatu bosibosi baloma biraŋi byereere hu Demetiriyo era ebi baloma byʼamazima olwohuba ebyene byeraga. Hwesi humulomaho biraŋi, era ngʼolu omanyire efe ebi huloma biba byʼamazima.
Engohoba
13 Ndi nʼebingi ebyʼohuhuŋandiihira aye ebbaluŋa siyihena. 14 Suubira ohuuja eyo mangu kuboneho, huŋaye moni hu moni.
15 Hatonda ahuŋe emiyaaya. Abameeri babo bahuheehiise. Keheeseho hiisi mulala hu bameeri beefe.