Ebbaluŋa ya
Yuda
Enyanjula
Ebbaluŋa ya Yuda owayiŋandiiha baali bamulanga baati Yuda. Yuda geromaho ati gaali muganda wa Yakobbo muganda ya Yesu. Sihimanyiheene oba ebbaluŋa yino yaali ya hibbubbu hyʼabafugiirira Kurisito. Aye hitegereheha hiiti mu bagayiŋandihira mwalimo Abayudaaya, olwohuba aloma hu biri mu Ndagaano Ekayire. Ne gayiŋandiihira “enywe mwesimwesi abahoda ba Hatonda Seefe era aba galanga era aba ahuuma olwʼohufugiirira Yesu Kurisito” (1). Era hiboneha oti gayiŋandiiha mu mwaha ogwʼenkaaga oluvanyuma lwʼohusaaliwa hwa Kurisito.
Ehigendererwa hyʼohuŋandiiha ebbaluŋa yino, gendire ohulabula abafugiirira Kurisito hu biŋamba hu basomesa abʼobudulingi (Yuda 4). Aloma hu byaliŋo mu Ndagaano Ekayire ngʼehyohuboneraho. Ebbaluŋa yino, efaananaho nʼebbaluŋa ya Peetero eyohubiri (Peet 2:1).
Ebiri mu bbaluŋa yino mu buupi
1. Yuda geyanjula (1-2)
2. Ohwehuuma abasomesa abʼobudulingi (3-4)
3. Ehyʼohuboneraho ohuŋwa mu Ndagaano Ekayire (5-16)
4. Ehyohuhola hu biŋamba hu hulabula (17-23)
5. Agohoba nʼajumirya Hatonda (24-25)
1
Ndiise Yuda omuŋeeresa wa Yesu Kurisito era mulebe ya Yakobbo. Pandiihira enywe abahoda ba Hatonda Seefe era aba galanga era aba ahuuma olwʼohufugiirira Yesu Kurisito.
Ehisasabirisi nʼemiyaaya nʼohwenda ohuŋwa eyiri Hatonda, byeyongere ohuba ni nenywe.
Abasomesa abʼobudulingi
Abaatu ba Hatonda abahoda, wayire naali nendire ohubaŋandiihira hu hunoŋoha ohu hwasuna, mula pulira ti hiraŋi mbaŋandiihire ni mbagobosamo amaani mweyongere ohuŋiriŋania esomesa eyʼobudulingi olwʼohufugiirira ohu Hatonda gaŋambya abaatu babe omulundi mulala gwoŋene nga biŋwa. Hiri hiityo olwohuba eriyo abaatu abatatya Hatonda abaamomoka babengiramo mu hyama nʼesomesa ebbaamya. Abaatu abo basomesa baati mbo ehisasabirisi hya Hatonda hibaŋa ehiyale ohweholera obuhwedi era sibafugiirira baati Yesu Kurisito nje Musengwa era aŋuga. Ebyaŋandihiwa bibalomaho biiti abo baahena hale ohubasalira omusango.
Wayire ebiitu bino mubimanyire, nenda ohubahebulisa ti Musengwa* 1:5 Ebyaŋandihiwa ebindi biroma biiti Yesu Musengwa. gatusa Abayisirayiri e Misiri ne oluvanyuma gasihiirisa abo abatafugiirira bibye.* 1:5 Huŋ 12:51; Hub 14:29-30 Nʼabamalayika abajeema, Hatonda gabadanya mu komera eyo mu hiirema ni babasidihire nʼenjegere eyi bali ohwola hu ludaalo olwʼekomerero olu alisaliraho omusango. Mu ngeri njʼenyene, abaatu bʼe Sodoma nʼe Gomora ko nʼebibuga ebindi ebyʼohumulirano, baahola obuhwedi owa hiisi ngeri. Hatonda gabasihiirisa era ehyo hiriŋo ngʼehyohuboneraho ti abo abajeemu balibadanya mu muliro eyi baligada emirembe nʼemirembe.* 1:7 Tand 19:1-24
Abaatu abo abatatya Hatonda, mu ngeri njʼenyene eyo boosi bahola obuhwedi olwohuba mbo baasuna ohwolesewa Hatonda gaabafugiirira ohuhola ebiitu hyʼebyo. Abaatu abo bajeemera Hatonda era baloma ebibono ebibi hu bitonde ebyomwigulu. Cooka ni Mikayiri omuhulu wʼabamalayika ni gaali nʼahaabira ni Sitaani omulambo gwa Musa, malayika oyo sigamusalira musango aye gamuloma ti, “Hatonda ahugudye!”* 1:9 Mag 34:6; Dan 10:13,21; 12:1; Zak 3:2; Hub 21:7 10 Aye abaatu abo, bafodogola ebyo ebi batamanyire era bali hyʼesolo ejiŋuma hutegeera. Bahola ebiitu ebi baleetera ohusihiiriha olwohuba hiisi ehi epeega yaawe yibaloma ohuhola njʼehi bahola. 11 Jibageene, olwohuba baŋambire esambo ja Kayini oweeta Abbiri mulebewe. Baluluhanira ebbeesa hya Bbalamu era hya Koola owasihiriha olwʼobujeemu wuwe, mu ngeri njʼenyene boosi balibasihiirisa.* 1:11 Tand 4:3-8; Hub 22:1-35; 16:1-35
12 Abaatu abo bali hyʼehiitu ehyʼembiho hu hiiŋulo hyenywe ehyʼohuhebuliriraho Yesu Musengwa, baŋuma hweŋomeha mu bulamu waawe. Era baŋuma nʼesoni, bali hyʼabaayi abafa hu bida byabwe mu hifo hyʼebisolo ebibaaya. Bali hyʼebireri ebidumbadumbana aye sibitonyesa fula. Bali hyʼemisaala ejitaama bibala mu biseera byajo era jooma ohuŋwera erala ŋaasi hu biholo. 13 Abaatu abo bali hyʼebimoto byʼamaaji hu nyanja era hyʼamaaji amadumbuuhi nʼesambo jaawe jiŋambya esoni. Bali hyʼemunyeenye eji otaŋanga hwesiga ohuhulagirira eyi oja. Baja hubaŋindiha mu hiirema babe eyo emirembe nʼemirembe.
14 Enoka owaaliŋo mu mulembe ogwomusanvu ohuŋwa hwʼAdamu, galoma hu baatu abo ati, “Musengwa aliija nʼabamalayika babe eduuli,* 1:14 Tand 5:18,21-24 15 ohusalira abaatu bosibosi abatatya Hatonda omusango olwʼebibi ebi bahola mu ngeri eyʼohutatya Hatonda nʼolwebibono byosibyosi ebi bamulomaho.” 16 Abaatu abo, basiiba bemulugunya era ni bendula ebibi hu baatu. Beŋira baati mbo njʼabahihenaho era bahiina abaatu abandi olwʼohwenda ohubasunaho ehi baba ni benda.
Ohulabula nʼohulaabbira
17 Aye balebe bange abahoda, muhebulire ebi bahwenda ba Musengwa weefe Yesu Kurisito baaloma. 18 Babalomera baati, “Mu ndaalo ejʼekomerero, ŋalibaaŋo abaatu abalibanyooma era abaligondera ohwegomba hwawe ohubi ohwʼomubiri.” 19 Era abaatu abo, njʼabali huleetanga ohwesalamo mu nywe olwʼohwegomba hwabwe ohubi era baŋuma Omwoyo Omutukuvu mu bulamu waawe. 20 Aye enywe balebe bange abahoda, mweyongere ohuhula mu hufugiirira hwenywe era mulombenga Hatonda mu maani gʼOmwoyo Omutukuvu.
21 Mugumire hu hugendera mu hwenda hwa Hatonda ni mulindirira Musengwa weefe Yesu Kurisito ohubaŋa obulamu obutaŋwaŋo. 22 Muŋambirenga ehisa abafugiirira Yesu ababa ni bali nʼohubuusabuusa mu bulamu waawe. 23 Abandi mubaŋalulenga ohuŋwa mu muliro; nʼabandi mubaŋambirenga ehisa era ehyo muhiholenga nʼohwegenderesa cooka mucaawenga esambo jaawe embi.
Ohuseebula
24 Ale ŋaahani muŋenga eŋono Hatonda weefe oyo asobola ohubahuuma ndimugwa era gabengisa mu ŋono lirye ni muŋumaho mbalo era ni muli nʼesangaalo. 25 Era abaatu ni babita mu Yesu Kurisito Musengwa weefe baŋenga Hatonda era Omunoŋosi weefe eŋono olwohuba njʼomulala yeŋene. Ye njʼomwene buŋangi, njʼaŋuga, njʼowaaliŋo ohuŋwa ahale nahale, aliŋo hatyane era njʼaja hubaŋo emirembe nʼemirembe. Amiina.

*1:5 1:5 Ebyaŋandihiwa ebindi biroma biiti Yesu Musengwa.

*1:5 1:5 Huŋ 12:51; Hub 14:29-30

*1:7 1:7 Tand 19:1-24

*1:9 1:9 Mag 34:6; Dan 10:13,21; 12:1; Zak 3:2; Hub 21:7

*1:11 1:11 Tand 4:3-8; Hub 22:1-35; 16:1-35

*1:14 1:14 Tand 5:18,21-24