5
Ko te fanga sipi 'a te 'Atuá
1 Ko ia, 'okou tokoni atu ki te kau faifekau 'oku 'iā kōtoú, 'ia au 'oku kaungā faifekau mo kōtou, mo te fakamo'oni ki te 'ū mamahi 'o Kalaisí, mo te 'inasi foki 'i te lāngilangi 'oku ene ke fakae'a maí. 2 'Ē, kotou tauhi te fanga sipi 'a te 'Atuá 'oku 'iā kōtoú, 'o 'aua na'a fai fakakoloto pē tono le'ohí, kā 'i te loto fia fai 'i te funga 'o te finangalo te 'Atuá; 'o kala ko te sio pa'anga 'uli, kā 'i te 'ofa ki te ngāué;*5:2 Sione 21:15-17 3 pea 'aua 'e kotou anga fia pule ki te 'ū potungāué, kae kotou hoko ko te fa'ifa'itaki'anga ki te fanga sipí. 4 Pea 'i te faifai pea fakae'a mai 'ia te Tauhi Lahí, pea 'e kotou ma'u te kalauni 'o te lāngilangi'iná.
5 Pehē foki mo kōtou 'ia te kau talavoú, kotou anganofo ki te kau mātu'á. 'Io, kotou no'o kotoa pē 'aki te fefakavaivai'aki, he
“'Oku taliteke'i 'e te 'Atuá 'ia te 'afungí,
kā 'oku Ina foaki kelesi ki te anga-vaivaí.”*5:5 Pal 3:34
6 Ko ia, kotou fakavaivai'i kōtou 'i te lalo nima māfimafi 'o te 'Atuá, kote'uhí ke Ina hākeaki'i 'ia kōtou 'o kā hoko tono taimí.*5:6 Māt 23:12; Luke 14:11; 18:14 7 Pea kotou sī atu ā tono kotoa 'o te kotou lotoma'uá ki Tana 'Afió; hē 'oku Ina mamahi'i 'ia kōtou.
8 Kotou laka faka'ehi'ehi, kotou 'a'ala; ko te kotou filí ko te tēvoló 'oku ina 'alu fano hangē ko he laione ngungulú, 'i tana kumi he taha ke mātu'aki folo. 9 Kotou taliteke'i 'ona, 'i te tu'u ma'uma'uluta 'i te tuí; mo kotou 'ilo'i 'oku tatau 'aupito mo te 'ū mamahi nā 'ia te 'ū me'a 'oku ma'ua ai te kotou fa'ahingá 'i māmani. 10 Kā ko te 'Atuá, 'a ē 'oku 'a'ana 'ia te kelesi kotoa pē, 'a ia kua Ina ui ange 'ia kōtou 'iā Kalaisi Sīsū ki te lāngilangi ta'engata 'O'oná, 'o kā hili te kotou kātaki mamahí 'o fuanounou, 'e fakakakato 'ia kōtou 'e Tana 'Afió, mo poupou'i, mo fakaivia, mo pulusi ki te tu'ungá. 11 Kē 'o Tana 'Afió 'ia te māfimafí 'o lauikuonga pea ta'engata. 'Ēmeni.
Ko te pōpoaki 'ofá
12 Ko taku ki'i tohi atu 'eni 'iā Silivenusi, ko te kāinga tōnunga 'i taku lau 'a'akú; pea ko taku enginaki mo fakapapau atu ko te kelesi mo'oni 'eni 'a te 'Atuá; kotou tu'u ma'u 'i ai.*5:12 Ngā 15:22, 40
13 'Oku 'ofa atu 'ia te siasi 'i Pāpilone*5:13 Pāpilone 'oku 'uhinga nai 'eni ki Loma, 'o hangē ko tana 'asi 'i te Tohi Fakahaá. ko te kaungā filí, pea mo Ma'ake ko si'aku foha.*5:13 Ngā 12:12, 25; 13:13; 15:37-39; Kol 4:10; Filim 1:24 14 Kotou fefekita'aki 'aki te 'uma 'o te 'ofá.
Ke 'iā kōtou 'ia te melinó, 'ia kōtou kotoa pē 'oku 'iā Kalaisí.†5:14 'I te 'ū hiki fualoa 'ihi 'oku faka'osi 'aki te lea 'Ēmeni.
*5:2 5:2 Sione 21:15-17
*5:5 5:5 Pal 3:34
*5:6 5:6 Māt 23:12; Luke 14:11; 18:14
*5:12 5:12 Ngā 15:22, 40
*5:13 5:13 Pāpilone 'oku 'uhinga nai 'eni ki Loma, 'o hangē ko tana 'asi 'i te Tohi Fakahaá.
*5:13 5:13 Ngā 12:12, 25; 13:13; 15:37-39; Kol 4:10; Filim 1:24
†5:14 5:14 'I te 'ū hiki fualoa 'ihi 'oku faka'osi 'aki te lea 'Ēmeni.