4
Ko te ouau lotu 'i te langí
1 Pea hili 'ení, ne au vakai, pea tā ko te matapā kua fakaava 'i hēvani, pea ko te 'uluaki le'o ne'e ongo mai kiā au hangē ko te talupité, ne'e lea mai 'o pehē, “Ha'u ki lunga nei, pea 'e Au faka'ali'ali kiā koe 'ia te 'ū me'a kua pau ke hoko 'āmuli.” 2 Pea u Laumālie'ina leva, pea tā ko te taloni ne'e tu'u 'i langi, pea ne'e 'afio he Toko Taha 'i te taloní.*4:2-3 'Isi 1:26-28; 10:1 3 Pea ko Ia ne'e 'afio 'i aí, ne Ina hā hangē ko te maka ko te siasipa, mo te sātio, pea ne'e takatakai ki te taloní 'e te 'umata, 'o hā ia hangē ko te 'emalata. 4 Pea takatakai ki te taloní ne'e 'i ai he 'ū taloni 'e uangofulu mā fā, pea ne'e nofo 'i te taloni 'e uangofulu mā fā ko iá he kau mātu'a, kua notou 'ai kofu hinahina, pea kua 'ai ki te notou fofongá he kalauni koula. 5 Pea ne'e 'alu atu ma'u pē mei te taloní he 'ū 'uhila, mo te 'ū le'o, mo te 'ū mana; pea ne'e ulo 'i te mu'a taloní he 'ū maama afi 'e fitu, 'a ia ko te Laumālie 'e fitu 'o te 'Atuá.*4:5 'Eki 19:16; Fkhā 8:5; 11:19; 16:18; 'Isi 1:13; Fkhā 1:4; Sāk 4:2 6 Pea ko te 'ao 'o te taloní ne'e hā hangē ko te tai sio'ata ia, 'o tatau mo te kilisitala.
Pea 'i te loto taloní, ne'e 'i ai he me'a ma'uli 'e toko fā, kua fonu 'i te 'ū fe'i mata te notou sinó 'i 'ao mo tu'a.*4:6-7 'Isi 1:22; 1:5-10; 10:14 7 Pea ko te fu'aki me'a ma'ulí ne'e hangē ko te laione, pea ko tono ua 'o te me'a ma'ulí ne'e hangē ko te pulu, pea ko tono tolu 'o te me'a ma'ulí ko tono fōtungá ne'e hangē ko te tangata, pea ko tono fā 'o te me'a ma'ulí ne'e hangē ko te 'īkale 'oku puna. 8 Pea ko te 'ū me'a ma'uli 'e fā ko iá tāutaha ne'e notou taki ono te kapakau; takatakai ki te 'ū kapakau ko iá, pea 'i te 'aofi kapakaú mo te notou sinó kotoa, ne'e fe'i mata 'ata'atā. Pea 'oku kala he notou mālōlō, 'i te notou lea 'i te 'aho mo te pō, 'o pehē,
“'Ei Mā'oni'oni! 'Ei Mā'oni'oni! 'Ei Mā'oni'oni!
'Ia te 'Afioná ko te 'Atua, ko te 'Aliki Aoniu!
'Ia te 'Afioná ne'e 'i ai, pea 'oku 'i ai, pea 'oku ha'u!”*4:8 'Isi 1:18; 10:12; 'Ais 6:2-3
9 Pea kā fai 'e te 'ū me'a ma'ulí te notou tuku kolōlia mo te faka'apa'apa mo te fakafeta'i kiā Ia 'oku 'afio 'i te taloní, 'a ia 'oku ma'uli 'o lauikuonga pea ta'engatá, 10 pea toki tō ki lalo 'e te mātu'a 'e toko uangofulu mā faá 'i te 'ao 'o Ia 'oku 'afio 'i te taloní, pea notou fai te notou hū kiā Ia 'oku ma'uli 'o lauikuonga pea ta'engatá, pea notou laku te notou 'ū kalauní ki te 'ao 'o te taloní 'i te notou pehē,
11 “Taau pē Koe, 'ia te motou 'Aliki mo te motou 'Atuá,
ke Ke ma'u 'ia te kolōliá, mo te faka'apa'apá, mo te mafaí.
Hē ko Koe ia ne'e ngaahi 'ia te me'a kotoa pē,
pea ne'e notou 'i ai, pea ne'e ngaahi 'ia nātoú,
kote'uhí pē ko Tou finangaló ia.”