5
Ko te takainga tohí mo te Lamí
1 Pea u vakai, tā 'oku 'i te 'aofi nima to'omata'u 'o Ia ne'e 'afio 'i te taloní he takainga tohi, kua tohi 'i loto mo tu'a, pea sila'i 'aki he sila 'e fitu.*5:1 'Isi 2:9-10; 'Ais 29:11 2 Pea u vakai he 'āngelo mālohi 'oku ina fanongonongo le'o lahi 'o pehē, “Ko ai 'oku taau ke folahi 'ia te tohí, mo vete tono 'ū silá?” 3 Pea ne'e kailoa he taha 'i hēvani, pē 'i māmani, pē 'i lolofanua,*5:3 lolofanua ko te nofo'anga ia 'o te kakai kua maté (vakai ki te 1:18). ne'e mafai ke folahi 'ia te tohí, pē ke sio ki ai. 4 Pea u tangi lahi, kote'uhí ne'e kailoa 'ilo'i he taha 'oku taau ke folahi 'ia te tohí, pe sio ki ai. 5 Pea lea mai he toko taha 'o te kau mātu'á, “'Aua ke tangi, vakai, ko te Laione mei te matakali 'o Siutá, ko te Huli 'o Tēvitá, kua ikuna Ia, ko Ia ia 'e lava ke vete 'ia te tohí mo tono 'ū silá.”*5:5 Sēn 49:9; 'Ais 11:1, 10
6 Pea u vakai, tā 'oku tu'u 'i lotomālie 'i te taloní, mo te me'a ma'uli 'e fā, mo te mātu'a 'e uangofulu mā faá, he Lami, 'oku Ina tu'u pē kae hangē kua tāmate'í, 'oku me'atui 'e fitu mo te mata 'e fitu, 'a ia ko te Laumālie 'e fitu 'o te 'Atuá, 'a ia ne fekau atu ki māmani kotoa pē.*5:6 'Ais 53:7; Sāk 4:10 7 Pea 'alu atu Ia, 'o to'o te tohí mei te nima to'omata'u 'o Ia ne'e 'afio 'i te taloní. 8 Pea 'i Tana to'o 'ia te tohí, pea tō ki lalo 'i te 'ao 'o te Lamí 'ia te me'a ma'uli 'e faá, mo te mātu'a 'e uangofulu mā faá, 'oku notou to'o taki taha he ha'ape, pea mo te 'ū ipu koula kua fonu 'inisēnisi, 'a ia ko te 'ū hū ia 'a te kakai lotú.*5:8 Saame 141:2 9 Pea ne'e notou hiva 'aki he hiva fo'ou, 'o pehē,
“Taau pē 'ia Koe ke to'o 'ia te tohí,
mo vete tono 'ū silá.
He ne'e mate tāmate'i 'ia Koe,
pea ne'e huhu'i kakai 'e Koe mo'o te 'Atuá 'aki Tou ta'ata'á,
mei te matakali mo te lea,
mo te fa'ahinga mo te pule'anga kotoa pē.*5:9 Saame 33:3; 98:1; 'Ais 42:10
10 Pea ne'e ngaahi 'ia nātou†5:10 'ia nātou: 'oku pehē 'i tono 'ū hiki fualoa 'ihi, 'ia tātou. 'e Koe
ko te pule'anga mo te kau taula'aliki,
pea 'e notou‡5:10 'e notou: 'oku pehē 'i tono 'ū hiki fualoa 'ihi, 'e tou. hau 'i māmani.”*5:10 'Eki 19:6; Fkhā 1:6
11 Pea u vakai, pea tā ne'e ongo mai te le'o 'o he kau 'āngelo tokolahi, ne'e takatakai ki te taloní mo te 'ū me'a ma'ulí mo te mātu'á, pea ko te notou laú ko te 'ū mano laui mano, mo te afe laui afe;*5:11 Tān 7:10 12 pea 'oku notou kalanga le'o lahi, 'o pehē,
“'Oku taau pē 'ia te Lami ne mate tāmate'í
ke lau kiā Ia 'ia te mafai, mo te koloa,
mo te poto, mo te mālohi,
mo te faka'apa'apa, mo te kolōlia, mo te fakafeta'i.”
13 Pea ne au fanongo ki te me'a ma'uli kotoa pē ne'e 'i hēvani, mo māmani, mo lolofanua, mo te taí, mo te 'ū me'a kotoa pē 'oku 'i aí, 'oku notou pehē,
“Ko Ia 'oku 'afio 'i te taloní pea mo te Lamí,
ke 'o Nāua 'ia te fakafeta'í, mo te faka'apa'apá,
mo te kolōliá, mo te mālohí,
'o lauikuonga pea ta'engata.”
14 Pea ne'e pehē 'e te me'a ma'uli 'e faá, “'Ēmeni.” Pea ne'e tō ki lalo 'e te kau mātu'á 'o hū.§5:14 Pea ne'e tō … 'o hū: 'oku pehē 'i tono 'ū hiki fualoa 'ihi, Pea ko te kau mātu'a 'e toko uangofulu mā faá ne'e notou tō ki lalo 'o hū kiā Ia 'oku ma'uli 'o lauikuonga pea ta'engatá.
*5:1 5:1 'Isi 2:9-10; 'Ais 29:11
*5:3 5:3 lolofanua ko te nofo'anga ia 'o te kakai kua maté (vakai ki te 1:18).
*5:5 5:5 Sēn 49:9; 'Ais 11:1, 10
*5:6 5:6 'Ais 53:7; Sāk 4:10
*5:8 5:8 Saame 141:2
*5:9 5:9 Saame 33:3; 98:1; 'Ais 42:10
†5:10 5:10 'ia nātou: 'oku pehē 'i tono 'ū hiki fualoa 'ihi, 'ia tātou.
‡5:10 5:10 'e notou: 'oku pehē 'i tono 'ū hiki fualoa 'ihi, 'e tou.
*5:10 5:10 'Eki 19:6; Fkhā 1:6
*5:11 5:11 Tān 7:10
§5:14 5:14 Pea ne'e tō … 'o hū: 'oku pehē 'i tono 'ū hiki fualoa 'ihi, Pea ko te kau mātu'a 'e toko uangofulu mā faá ne'e notou tō ki lalo 'o hū kiā Ia 'oku ma'uli 'o lauikuonga pea ta'engatá.