Ⅰ ꞌBho ɛ-bɛ -nɔɔ ꞌmnɛ ti, *Faliziɛɛnyɔ gbɩ -ke *-Lagɔꞌɔ gbayibomʋtɔlʋ ꞌwlʋ-o Zelizalɛɛmʋ, ʋn ꞌye *Zezii -bodɩ yi ꞌle ʋn ꞌye ɔ tidede, Ⅱ ʋn na: *-Aꞌa -namʋ ꞌcɛ-ɛ -aꞌba ꞌꞌna ꞌꞌweꞌa gba ꞌmʋ. ꞌɩnnɛ ꞌmo-o, -ka nyɔ-ɔ lreꞌa kwa ꞌle -a ꞌsaaꞌa li ꞌbho -Lagɔꞌɔ ꞌꞌyigbeyi, ꞌwa nʋ -kaa ꞌle ʋn-ʋ liꞌo. Leedɩ ʋn-ʋ nʋꞌo ꞌnaꞌa? Ⅲ Ɔ na: ꞌLe aꞌba ꞌꞌbhi ꞌle, a -see -Lagɔꞌɔ gba ꞌmʋcɛꞌɛ? ꞌMna na, aꞌba ꞌꞌbhiꞌa gba a-a kpʋnꞌo ꞌꞌyi tenyɩ. Ⅳ -Lagɔ na: ꞌꞌDu ꞌbho -aꞌa -tɩta -ke -aꞌa ꞌlotʋꞌa wlu. -Kaa ɔ ꞌlɛꞌɛ -kaa -lrɛɛ: -Yɔ nʋꞌa ꞌɔ -tɩta -ke ꞌɔ ꞌlotʋ ꞌꞌweꞌa -lue ꞌꞌnyinynidɩ ꞌꞌlruli, ɔbɔ ꞌke ꞌlbhɛ-ɛ ɔ ꞌke ꞌmɛ moꞌo. Ⅴ-Ⅵ -Lagɔ ꞌlɛ-ɛ -kaa see, ꞌɛ dɩ, a-bʋ -yʋʋ, a-a tbhɛꞌɛ ɩ-bɩ -Lagɔꞌɔ gba ꞌmnɩ ꞌꞌkpi ꞌle a-a tɔꞌɔ -kaa nyʋ. -Bho dɩ kpʋn -aꞌa -tɩta -ke -aꞌa ꞌlotʋ ꞌle ʋn ꞌke -ɩnmʋ -bodɩ yi, -ɩn ꞌke ʋ -kpa ꞌle -ɩn ꞌke na: ꞌƖn ꞌwɩn -ɩ ꞌbɔ, lɩ ꞌɩn ꞌke ꞌka amʋ ꞌꞌnyɩ, ꞌɩn ꞌꞌnyɩ -ɩ -Lagɔ -bonyaa ꞌmʋ, -bho -ɩn ꞌlɛ -kaa, -aꞌa nyɔtu se ꞌtɔ ꞌbhɛɛ -ɩn ꞌke ʋ -kpa. ꞌKa-a aꞌba ꞌꞌsɛ-ɛ tʋtɔꞌo ꞌꞌkɔmʋkɔmʋ. -Bho a -ka -kaa-a nʋ, a ꞌpo-o -Lagɔꞌɔ wlu ꞌplʋ ꞌmʋ ti. Ⅶ A-a ꞌmo-o -mɩɛ ꞌsɔnꞌɔ ꞌbhlemʋ. -Aaan! Dɩ -Lagɔꞌɔ wluꞌa ꞌmʋtizayi *Ezayii ꞌcnɩꞌa ꞌle -Lagɔꞌɔ ꞌꞌbɔgʋ ꞌli see, aꞌba ꞌꞌkpidɩ -ke damʋ ɔ -zaꞌa -ziadɩ ꞌmʋ, ɔ ꞌbhle-e ꞌgɩꞌa? -Kagbɛ ꞌka-a ɔ ꞌcnɩ ɛꞌo:

Ⅹ A -gblee, ꞌkla ꞌmnɔꞌɔ dɩ, *Zezii ꞌla-a nyʋꞌa -dadudu ꞌle ɔ na: Aꞌba ꞌwee, a po ꞌɩnmʋ -lokui, a ꞌke ꞌan wlu ꞌmʋtiꞌwɔn -ka -zɛgɛka. Ⅺ Ɔ nʋꞌa -kaa, ɔ ꞌpo-o ꞌꞌyi -lue ꞌle ɔ na: Lililɛ nyɔ-ɔ liꞌa, ꞌɛ po nyɔ ꞌꞌnyinyninyɔ ꞌbho -Lagɔꞌɔ ꞌꞌyigbeyi. Lɛ-ɛ ꞌwlʋꞌa ꞌle nyɔꞌɔ -pɔlʋ ꞌzɔ, ꞌɩnnɛ po ꞌɔ ꞌꞌnyinyninyɔ ꞌbho -Lagɔꞌɔ ꞌꞌyigbeyi. Ⅻ Ɔ poꞌa wlu ꞌmnɛ ti a, ꞌle *ꞌɔ -namʋ ꞌye ɔ linyni ꞌle ʋn na: Wlu -ɩn -zaꞌa -laa ꞌmʋ ꞌkpʋn-o *Faliziɛɛn ꞌꞌwe li, -ɩn yibo nɩ ꞌnɩ? ⅩⅢ Ʋn ꞌlɛꞌɛ -kaa, ꞌle ɔ ꞌye ꞌꞌyi -lue po ꞌle ɔ na: -Lololɛ -yɛ ꞌan -tɩta -Lagɔ -nɩꞌa ꞌle yaku ꞌli -seeꞌa -lo, ɛ-ɛ ꞌye-e glu -zɛ -mʋ. ⅩⅣ A ꞌꞌtayi nʋ ꞌꞌyiti! Ʋn kɔɔꞌɔ-ɔ ꞌꞌlɔmʋ -yʋ tɔꞌɔ nyʋ -jolʋ. ꞌLe, -bho ꞌꞌlɔyi ꞌbhlee ꞌɔ -bolɔyi -kɔɔtu wɔnyi a, ʋn -nɩ ꞌsɔn, ʋn-ʋ ꞌgaꞌa ꞌle ꞌꞌbhie ꞌli ti.

ⅩⅤ Ɔ gwɛꞌɛ ꞌꞌyi -nɛɛ ꞌꞌyi a, *ꞌPiɛlɩ ꞌꞌluoꞌo-o wlu ꞌmʋ, ɔ na: ꞌAn -Kɔyi, zɩza ꞌꞌyi ꞌmnɩ gbɔ! ⅩⅥ ꞌLe Zezii na: A-bʋ -yʋʋ ꞌku-o -loku ꞌmʋ -lrɛɛ? ⅩⅦ A -see -bhla tiꞌwɔn ke? Lɛ nyɔ-ɔ liꞌa, ꞌɛ po nyɔ ꞌꞌnyinyninyɔ ꞌbho -Lagɔꞌɔ ꞌꞌyigbeyi, -ɛkedɩmaa, ɛ-ɛ ꞌmu-o ꞌɔ ꞌlimʋ. -Bho ɔ mu ꞌkwla ꞌꞌkpi ꞌle ɛ-ɛ ꞌwlʋ ꞌɔ ꞌmʋ. ⅩⅧ Lɩ nyɔ-ɔ popoꞌa ꞌgwlʋti, ɔ-ɔ nʋꞌa, ɔ-ɔ zaꞌa ꞌmʋ, ꞌɩnnɩ po ꞌɔ ꞌꞌnyinyninyɔ ꞌbho -Lagɔꞌɔ ꞌꞌyigbeyi. ⅩⅨ ꞌLe nyunyɔꞌɔ -pɔlʋ ꞌzɔ, ꞌle-e ꞌꞌnyinyninaagɩ-ɩ ꞌwlʋꞌo, ꞌɩnnɩ ꞌꞌtuuꞌo nyɔ ꞌle ɔ-ɔ nʋꞌo ꞌꞌnyinynidɩ -nɩɩ: ꞌLe nyɔ-ɔ ꞌlbhaꞌa ꞌꞌku, ꞌle ɔ-ɔ ꞌyeꞌe -yranynɔbha, ɔ-ɔ ꞌꞌwɩlɩꞌo, ꞌle ɔ-ɔ ꞌꞌyriꞌo, ɔ-ɔ cɛꞌɛ sɩn, ɔ-ɔ nyniꞌe nyʋꞌa ꞌnynɩ wɔn. ⅩⅩ A -gblee, lɩ-ɩ poꞌa nyɔ ꞌꞌnyinyninyɔ ꞌbho -Lagɔꞌɔ ꞌꞌyigbeyi, ꞌɩnnɩ ꞌka-a! -Bho -ɩn -see kwa -lre ꞌle -ɩn ꞌke li, ꞌɛ po nyɔ ꞌꞌnyinynidɩ ꞌmʋ.

ⅩⅪ *Zezii poꞌa wlu ꞌmnɛ ti a, ɔ ꞌzi-e ꞌbho li, ɔ ꞌye Tiilɩ -ke Sidɔɔbhlʋkpa ꞌꞌkpi mu. ⅩⅫ Ɔ nyniꞌa ꞌle, Kanaanynaakpʋ-ʋ -nɩꞌa ꞌle ꞌbhlʋkpa ꞌmnɛꞌɛ ꞌꞌkpi see ꞌyi -ɔ -bodɩ ꞌle ʋn-ʋ ꞌꞌwɔꞌo: ꞌAn -Kɔyi, ꞌbhlʋkpayowli *Daviidɩꞌa ꞌꞌnayu, ꞌye ꞌan ngaze! ꞌAn ꞌꞌyunynaakpʋ se ꞌkpa ꞌꞌyiꞌbhle, ʋn ꞌbhle-e ꞌꞌnyinynidɩꞌa -zuzu ꞌmʋ. ⅩⅩⅢ Ʋn ꞌlɛꞌɛ -kaa a, ɔ ꞌꞌsuu ꞌnʋ ꞌmʋ-ɛ. ꞌƐ dɩ *ꞌɔ -namʋ nyni ꞌɔ li, ʋn na: Lɛ ʋn ꞌbɔꞌɔ ti, nʋ ɛ ʋ -bodɩ ʋn ꞌke mu, ꞌwa wlu ꞌkpʋn-o wɔn, ʋn ꞌke -amʋ kli ꞌwlʋ. ⅩⅩⅣ Ɔ na: *Izrayɛɛlɩkɔmʋꞌa ꞌꞌsɛꞌɛ dɩ ꞌɩn yiꞌo. Ʋn kɔɔꞌɔ-ɔ *ꞌꞌmamabhlabhlɩ. Ʋn se *ꞌꞌyriliduyi ꞌbhle. ꞌWa -klɩgbɩꞌa -tɔ nʋ -Lagɔꞌɔ -jolʋ.

ⅩⅩⅤ ꞌNynaakpʋ ꞌmnʋ nʋꞌa -kaa, ʋn ꞌnyni -ɔ li, ʋn ꞌpo -ɔ ꞌkolri wɔnyi glu ꞌle ʋn na: ꞌAn -Kɔyi, -kpa ꞌɩnmʋ! ⅩⅩⅥ A -gblee, ɔ na: Ɛ se ꞌꞌyrili-nmɔ -ɩn ꞌke ꞌꞌyreetɩ lililɛ wɔn ꞌꞌyi -za -ɩn ꞌke ɛ gbi ꞌꞌnyɩ. ⅩⅩⅦ (-Ɛ -ke dɩ ɔ ꞌlʋ ꞌʋ -kaa ꞌꞌyi, ꞌɩnnɛ ꞌmo-o ʋn -se *ꞌZuifʋnynaakpʋ -ko.) ꞌLe ʋn na: Kɩn, ꞌan -Kɔyi, -ziadɩ moꞌo. -Bho ɛ -nɩ -kaa a, -bho gbeꞌa -yowli -ka li, lililɩꞌa kɔtɩ ꞌgaꞌa ti, gbe -mnɛɛ-ɛ li-oꞌo o! ⅩⅩⅧ ꞌLe Zezii na: A ꞌde-e ꞌɩnmʋ ꞌꞌgwli -ziaka. -Ka a ꞌybhaꞌa a, ɛ -nɩ -kaa ꞌmʋ! ꞌBho -gbaa -lue ꞌmnɛ ꞌmʋ ꞌꞌnyinynidɩꞌa -zuzu ꞌwlʋꞌo ꞌwa ꞌꞌyu ꞌmʋ-ɛ. Ʋn ꞌpʋn-oꞌo.

ⅩⅩⅨ Ɩ ziꞌa -kaa a, *Zezii ziꞌe ꞌbho-o li, ɔ ꞌye Galileeꞌa -badaklagba wɔnli le mu, ɔ ꞌye -gɔgɔ -lue ꞌꞌkpi ꞌya, ɔ ꞌye ti-de. ⅩⅩⅩ -Ka ɔ -nɩꞌa ꞌbho, nyʋ ꞌwɩn ꞌɩ ꞌbɔ ɔ, ʋn ꞌꞌgbu-o ti, ʋn ꞌbhle-e ꞌwa ꞌꞌgwizimʋ. Topomʋ o, -nɩanɩamʋ o, ꞌꞌlɔlɔmʋ o, -yʋ ꞌma-a bobo -ke ꞌwalɩꞌa -dadudu -lrɩɩ, ꞌɩnnʋ ʋn-ʋ yaꞌa Zezii ꞌle ɔ-ɔ ꞌpʋʋn nʋꞌo. ⅩⅩⅪ Nyʋ-ʋ -nɩꞌa ꞌbho a, ʋn ꞌyeꞌa ꞌɛ lɛtu li, wɔn ꞌma-a ꞌwa klɛ ti tenyɩ ꞌle ʋn-ʋ nʋꞌo: -Ɩɩn! Nyʋ-ʋ ꞌma-a bobo, wa-a wlu-oꞌo. Topomʋ-ʋ na-oꞌo. ꞌꞌLɔmʋ ꞌye-e ti; ꞌle ʋn-ʋ ꞌbhɛɛꞌɛ *Izrayɛɛlɩꞌa -Lagɔꞌɔ ꞌnynɩ ꞌꞌyi.

ⅩⅩⅫ A -gblee, *Zezii -ke nyʋ ꞌmnʋ nʋ ꞌbho ꞌwɩ tan ʋn -see lɛ li, ꞌle ɔ ꞌye *ꞌɔ -namʋ ꞌla ꞌle ɔ na: -Yeee! Nyʋ -nʋʋ, ꞌwa dɩ ꞌbhle-e ngaze ꞌmʋ ꞌꞌsɛ, -ɛkedɩmaa, ꞌɩn -ke ʋn ꞌnʋ-o ꞌnɔɔ ꞌwɩ tan, ʋn -see li. ꞌWa -dadudu ꞌwlʋ-o nya. -Bho ʋn -sɔ ꞌmʋ, -bho ʋn -ka ʋ ꞌꞌbhli le-e mu, ʋn-ʋ ꞌye-e -jeyi ꞌkpna -nɩ -mʋ. ꞌƐ dɩ, -bho -a se ʋ lilia ꞌꞌnyɩ, -a se ꞌbhɛɛ -a ꞌke ʋ ꞌꞌyitiꞌꞌtayi ʋn ꞌke mu. ⅩⅩⅩⅢ ꞌLe ꞌɔ -namʋ na: Nyʋ-ʋ -dieꞌa -kaa ꞌmʋ, ꞌnɔɔ -tɛꞌɛ -kaa, ꞌnɔɔ gwlɔ seꞌa -nɩ, ꞌle, doo -a ꞌke lililɛ -za, -a ꞌke ʋ ꞌꞌnyɩꞌa? ⅩⅩⅩⅣ ꞌLe ɔ na: Ɛ -nmɔꞌɔ-ɔ ꞌꞌyrili. ꞌꞌFlɛɛ ꞌdiɛ a ꞌbhleꞌa? ꞌLe ʋn na: -A ꞌbhle-e ꞌꞌflɛɛ -mɛɛsɔn -ke zmiyɔ -gbɩ.

ⅩⅩⅩⅤ Ʋn ꞌlɛꞌɛ -kaa ꞌle ɔ na nyʋ ꞌwee bhla gbɔ ti, ꞌle ʋn ꞌye gbɔ tibhla, ⅩⅩⅩⅥ ɔ ꞌye ꞌꞌflɛɛ -mɛɛsɔn -ke zmiyɔ gbɩ ꞌmʋꞌꞌluo, ɔ ꞌye -Lagɔ ꞌsɛɛ po, ɔ ꞌye ɩ -jiɛ ꞌꞌyi ticɩcɛ -nɩ, ɔ ꞌye ɩ ꞌɔ -namʋ ꞌꞌnyɩ, ʋn ꞌye ɩ nyʋ ꞌꞌyitiꞌgblee. ⅩⅩⅩⅦ ꞌWa ꞌwee li-oꞌo, ʋn ꞌye lbho, lililɩ ꞌye ti-sie. ꞌYa kɔtɩ -sieꞌa ti, ʋn ꞌtɩtɛ ꞌnɩ ti, ɩ ꞌpo-o -cɩcɩ -mɛɛsɔn. ⅩⅩⅩⅧ Nyʋ-ʋ liꞌa a, -bho nyɔ -za ꞌbho ꞌnynʋkpakpɩ -ke ꞌꞌyreetɩ, ꞌwa ꞌꞌklumʋꞌa nyukpasiꞌa ꞌꞌsɛꞌɛ ꞌꞌdui -nɩ -bue. ⅩⅩⅩⅨ Ʋn liꞌa a, Zezii ꞌꞌtayi ꞌnʋ-ʋ ꞌꞌyiti, ʋn ꞌye le mu. Ʋn muꞌa a, ꞌle ɔ -ke ꞌɔ -namʋ ꞌye ꞌle gɔlʋ ꞌli le ꞌkpa, ʋn ꞌye Magadaabhlʋkpa ꞌꞌkpi mu.