Ⅰ Ɩ ziꞌa -kaa a, *Faliziɛɛn -ke *Sadiziɛɛn ꞌyi-e *Zezii -bodɩ ʋn ꞌye ɔ ꞌbhakʋplʋ le ꞌgbaa -nɩ, ʋn ꞌye ɔ tidede: -Bho ɛ ꞌꞌdu -Lagɔ lbho -ɩnmʋ -ziaka, ꞌɔ ꞌnynɩ ꞌmʋ, nʋ -daa -aꞌba ꞌꞌyigbeyi *wɔnkulɛ -lue -a ꞌke ɛ liꞌye. Ⅱ ꞌLe ɔ na: ꞌBho ꞌyrʋꞌa tiganamʋ, ꞌle a ꞌke yaku liꞌye, ꞌle ɛ ꞌke zaan a, a-a ꞌnʋ-o: -Vlii ꞌwla-oꞌo, Ⅲ ꞌle ɛ ꞌke -druma ꞌꞌdu a, -bho yayi -nɩ -tukuu, a-a ꞌnʋ-o: ꞌꞌNi-i ꞌye-e -lbha -mʋ. A yiboꞌo-o yaku ꞌꞌyiꞌa lɩ-ɩ ziꞌa ꞌꞌtibheli, ꞌle, -nɔɔ -ke ꞌmʋyibolɩꞌa dɩ a ꞌwɔnꞌɔ ꞌbɔ see, a se ɩ ꞌꞌyiyibo! Ⅳ ꞌTraamʋꞌa nyʋ-ʋ seꞌa -Lagɔ ꞌꞌyi-kpʋn, -ʋ seꞌa ꞌꞌyiꞌsrɛɛ ꞌbho ꞌɔ ꞌꞌyigbeyi, ʋn ꞌbɔ-ɔ ti ʋn ꞌke wɔnkulɩ liꞌye. ꞌLe ꞌɛ -lue ꞌtɩn -see -nʋ-ɛ yi, -bho ɛ -se *Zonaasɩꞌa ꞌꞌsɛꞌɛ nɛꞌɛ ꞌꞌyitigʋgɔlɛ ꞌyeꞌa -nʋ-ɛ mʋa ƆFa16 4 -Bho a ꞌke Zonaasɩꞌa wɔnkulɛ ꞌmʋtiꞌwɔn, a -gbʋ ꞌle Mt 12 40.

Ⅴ Ʋn cɛꞌɛ ꞌꞌni a, ꞌle *ꞌɔ -namʋ ꞌye ꞌgwlʋtipopo -ka ʋn -seeꞌa ꞌꞌyidieflɔɔ ꞌmʋꞌꞌluo. Ⅵ ꞌLe *Zezii na: ꞌBho *Faliziɛɛn -ke *Sadiziɛɛn ꞌꞌweꞌa ꞌꞌflɔɔꞌɔ ꞌꞌbuubuulɛꞌɛ damʋ a ꞌꞌdu aꞌba ꞌꞌbhi ꞌꞌyrili! Ⅶ ꞌƆ -namʋꞌa ꞌꞌsɛ nʋꞌa -kaa, ʋn-ʋ ꞌkabhaꞌo: -A -ke ꞌꞌyidieflɔɔ -see yiꞌa dɩ ɔ ꞌlɛꞌɛ -kaa lɛ-ɛ! Ⅷ Dɩ ʋn -zaꞌa ꞌmʋ, ɔ ꞌwɩn ꞌɩ ꞌbɔ ꞌle ɔ ꞌye ʋ -kaa ꞌꞌyiꞌlɛ: Leedɩ a nʋꞌo -a se ꞌꞌyidieflɔɔ ꞌbhle, ꞌɛ dɩ ɔ ꞌlɛꞌɛ ꞌnaꞌa? A -see -bhla ꞌɩnmʋ ꞌꞌgwlide ke! Ⅸ A -see -bhla tiꞌwɔn ke? ꞌꞌFlɛɛ -muu ꞌɩn cɩcɛꞌɛ ti, nyunyuꞌa ꞌꞌdui -bue ꞌꞌdui ꞌsɔn -gwlɩ -bue liꞌa -ɩ -sieꞌa ti, a -see ꞌya dɩ ꞌgwlʋtipopo? Ʋn liꞌa ꞌle, lililɩꞌa -cɩcɩ ꞌdiɛ -sieꞌe tiꞌa? Ⅹ ꞌLe ꞌꞌflɛɛ -mɛɛsɔn nyunyuꞌa ꞌꞌdui -bue liꞌa ꞌle ɩ ꞌyeꞌa ti-sie, a -see ꞌya dɩ ꞌgwlʋtipopo? Ʋn liꞌa ꞌle, lililɩꞌa -cɩcɩ ꞌdiɛ -sieꞌe tiꞌa? Ⅺ -Ka ꞌɩn -see amʋ ꞌꞌflɛɛꞌɛ dɩ -bodɩ ꞌmʋ-za, lɛ ꞌɩn -zaꞌa ꞌmʋ, aꞌba ꞌwɩn ɩ ꞌmʋti? ꞌBho Faliziɛɛn -ke Sadiziɛɛn ꞌꞌweꞌa ꞌꞌflɔɔꞌɔ ꞌꞌbuubuulɛꞌɛ damʋ, a ꞌꞌdu aꞌba ꞌꞌbhi ꞌꞌyrili! Ⅻ Ɔ muꞌa ꞌbho wlu ꞌmnɛꞌɛ da le a, -yrɔzaa! ꞌle ꞌɔ -namʋ ꞌye ɩ ꞌmʋtiꞌwɔn. -Ka ɔ -seeꞌa ka ꞌꞌflɔɔꞌɔ ꞌꞌbuubuulɛzɛgɛ ꞌnynɩ ꞌꞌsi, ꞌle ɔ ꞌꞌsiꞌa ka Faliziɛɛn -ke Sadiziɛɛn ꞌꞌweꞌa -tɔtɔlɩ ꞌnynɩ, ꞌle ʋn ꞌye ɩ yibo.

ⅩⅢ *Zezii poꞌa wlu ꞌmnɛ ti a, ɔ -ke *ꞌɔ -namʋ -sɔꞌɔ ꞌmʋ-ɛ, ʋn ꞌye -gwlɔklagba ʋn-ʋ ꞌlaꞌa Filiipʋꞌa Sezalee -bhoga mu. ꞌBho-o Zezii dede -nɩꞌe ꞌɔ -namʋ ti: ꞌAn -namʋ-a, -bho nyʋ -ka ꞌɩnmɔ *Nyunyɔꞌɔ ꞌꞌYuꞌa ꞌꞌkpidɩ ꞌmʋ-ʋza ꞌle, ʋn na ꞌyɔɔ ꞌɩn ꞌꞌduꞌa? ⅩⅣ ꞌLe ʋn na: Nyʋ na -ɩnmɔ ꞌmo-o *ꞌZaan Batiisɩ, -lrʋʋ na -Lagɔꞌɔ wluꞌa ꞌmʋtizamʋ -nɩꞌa ti -bɛnyɩ, ꞌwa -lue -ɩn ꞌꞌduꞌo, -lrʋʋ na -Lagɔꞌɔ wluꞌa ꞌmʋtizayi *Elii -ɩn ꞌꞌduꞌo, ꞌle -lrʋʋ na -Lagɔꞌɔ wluꞌa ꞌmʋtizayi *Zelemii -ɩn ꞌꞌduꞌo. ⅩⅤ ꞌLe ɔ na: -Bho ɛ ꞌꞌdu aꞌba ꞌꞌbhi -bodɩ ꞌle, ꞌyɔɔ ꞌɩn ꞌꞌduꞌa? ⅩⅥ ꞌLe Simɔɔ *ꞌPiɛlɩ na: -Ɩnmɔ ꞌmo-o *-Lagɔꞌɔ ꞌBhozayi -ɔ ꞌpʋʋnꞌa nyʋ, Tinɩlagɔꞌɔ ꞌꞌyu.

ⅩⅦ Ɔ poꞌa wlu ꞌmnɛ ti a, ꞌbho-o ɔ -nʋ -nɩꞌe: Zonaasɩꞌa Simɔɔ, -ɩn ꞌwa-a ti, wlu -nɛɛ, ꞌan -tɩta -Lagɔ -nɩꞌa ꞌle yaku ꞌli, ꞌɩnnɔ po ꞌɛ -ɩnmʋ wɔn ꞌmʋ, nyunyɔ -see -ɩnmʋ -ziadɩ wɔn ꞌmʋ po. ⅩⅧ ꞌɩnmɔ -yɔɔ, ꞌɩn-ɩ ꞌwɩ -ɩ -ɩnmʋ ꞌꞌyiti, trɩ -ke ꞌꞌkpi nyʋ-ʋ -poꞌa -budu a, -ɩn -ke ɛ gʋgɔꞌɔ-ɔ ꞌꞌyiti. -Ka -lue ꞌmnɔ ꞌka-a ꞌɩn ꞌꞌluoꞌo -ɩnmʋ ꞌmʋ -aꞌa lbhʋ ꞌmʋ nyunyuꞌa -dadudu ꞌke ꞌɩnmʋ -bodɩ yi, ꞌle -ɩn ꞌke ꞌwa nyamna ꞌꞌdu. ꞌꞌNyinynidɩꞌa tiyayiꞌa wɔnkuɛ -ke ꞌmɛmɛɛꞌɛ ꞌꞌbhuo -see nyʋ ꞌmnʋ ꞌꞌyi-pa yi. ⅩⅨ Nyʋ -Lagɔ-ɔ ꞌyeꞌa -kɔ mʋ, -ɩnmɔ ꞌye ꞌwa nyamna ꞌꞌdu mʋ ꞌle ꞌɩn ꞌke -ɩnmʋ ꞌan wɔnkuɛ ꞌꞌnyɩ. -Lagɔꞌɔ wɔnkuɛ -ke -ɩn -naꞌa a, ꞌle ɛ ꞌmʋ lɛꞌꞌo lɛ -a ꞌyeꞌa ꞌmʋꞌkaa mʋ ꞌnɔɔ ꞌbhlʋkpa ꞌꞌkpi, -Lagɔ -nɩꞌa ꞌle yaku ꞌli-i ꞌye -ɛ ꞌmʋꞌkaa -mʋ -lrɛɛ. Lɛꞌꞌo lɛ -a ꞌyeꞌa wɔn ꞌꞌkpiti-cɛ mʋ ꞌnɔɔ ꞌbhlʋkpa ꞌꞌkpi, -Lagɔ -nɩꞌa ꞌle yaku ꞌli-i ꞌye -ɛ wɔn ꞌꞌkpiti-cɛ -mʋ -lrɛɛ. ⅩⅩ ꞌLe ɔ ꞌye ꞌɔ -namʋ ꞌꞌdɩ ꞌmʋ ꞌꞌdu ꞌle ɔ na: -Ka ꞌɩn ꞌꞌduꞌa -Lagɔꞌɔ ꞌBhozayi -ɔ ꞌpʋʋnꞌa nyʋ, nyɔꞌɔ ꞌwɔɔn nɩ amʋ wɔn ꞌꞌyi ꞌbɔ -leꞌꞌa!

ⅩⅪ A -gblee, ɛ-bɛ -nɔɔ -lue ꞌmnɛ ꞌli, *Zezii ꞌkpa-a ꞌbho, lɩ -Lagɔ ꞌwɔnꞌɔ -ɩ ꞌye ꞌɔ -bodɩ -yi mʋ, ꞌɩnnɩ ɔ-ɔ ꞌtmʋʋꞌo *ꞌɔ -namʋ. Ɔ na: ꞌƖn-ɩ ꞌye-e ꞌle Zelizalɛɛmʋ -mu -mʋ ꞌle *-Lagɔꞌɔ ꞌsragazamʋklɩgbɩ-e, *ꞌɔ gbaꞌa yibomʋ -ke ꞌZuifʋꞌa -zigletumʋ -lrʋʋ-ʋ -nɩꞌa ꞌbho-o ꞌye ꞌɩnmʋ ꞌkleyeɛɛ ꞌꞌkpi -ya mʋ ꞌle ʋn ꞌke ꞌɩnmʋ ꞌlbha ꞌɩn ꞌke ꞌmɛ. -Bho ʋn nmaze ꞌɩnmʋ ti, ꞌan ꞌmɛmɛɛꞌɛ ꞌwɩ ꞌsɔn, ꞌɛ tanzɔ, ꞌle -Lagɔ ꞌke ꞌɩnmʋ glu -za ꞌle ꞌɩn ꞌke ti-nɩ -lrɛɛ. ꞌƖnnɩ ɔ -zaꞌa ꞌmʋ. ⅩⅫ ꞌƆ ꞌꞌyitiflɔwlu ꞌmnɛ -see *ꞌPiɛlɩꞌa -pɔlʋ -bhlua, ꞌɛ dɩ ɔ -ke ɔ -jri-ɛꞌɛ gbɔ ꞌle ɔ na: -Woofoa! ꞌAn -Kɔyi, ꞌya lɛtu -see -ɩnmʋ -bodɩ -yi yi. ⅩⅩⅢ ꞌPiɛlɩ ꞌlɛꞌɛ -kaa a, Zezii ꞌꞌbhitiꞌe-e ꞌꞌyiti ꞌle ɔ-ɔ wlu ꞌnɔ ꞌꞌlruli, ɔ na: *Sataan! po ꞌɩnmʋ le! Lɩ -ke -Lagɔ seꞌa -ybhɛ, ꞌɩnnɩ -a popoꞌo ꞌgwlʋti. -Ɩn ꞌbɔ-ɔ ti -ɩn ꞌke ꞌɩnmʋ ꞌꞌnyinynidɩ ꞌmʋ po, ꞌle, lɛ -Lagɔ ꞌbɔꞌɔ ti, ꞌɩn ꞌke nʋ, -ɩn ꞌke ɛ ꞌɩnmʋ -pɔlʋ ꞌꞌyi -za, -ɛkedɩmaa, -aꞌa popo -Lagɔꞌɔ ka ꞌgwlʋti, nyunyɔnaagɩ -ɩn ꞌbhleꞌe ꞌmʋ.

ⅩⅩⅣ ꞌLe ɔ na ꞌɔ -namʋ -bodɩ: Nyɔ -yɔ ꞌbɔꞌɔ ti ɔ ꞌke ꞌɩnmʋ ꞌꞌsrii ꞌle ꞌɩn -ke ɔ ꞌke -na ꞌꞌkɔmʋkɔmʋ, -yɩ ꞌma-a ꞌɔ ꞌꞌbhuoꞌa ꞌgwlʋdɩ, ɔ po ɩ ti ꞌle ɔ ꞌke -Lagɔꞌɔ ꞌgwlʋdɩ nʋ. Ɔ ꞌwɔn ɔ ꞌke ꞌkle ꞌye kplokplo, ꞌle ɛ-bɛ ꞌkleyeɛɛ ꞌmʋ ɛ ꞌbhɛɛꞌo nyʋ ꞌke ɔ ꞌlbha ɔ ꞌke ꞌmɛ ꞌle ɛ ꞌke ngazemɛmɛɛꞌɛ ꞌꞌbhuoka ꞌꞌdu. ⅩⅩⅤ Nyɔ -yɔꞌɔ ziꞌa ꞌɔ ꞌꞌbhuoꞌa tinɩɛꞌɛ dɩ, -ɔ sɩaꞌa ꞌan dɩ kplokplo ꞌle ɛ ꞌke ꞌɔ ꞌmɛnamʋ nyni, ꞌɔ nyɔtu ꞌke ꞌpʋn ꞌbho -Lagɔꞌɔ ꞌꞌyigbeyi. Nyɔ -yɔ ziꞌa ꞌɔ ꞌꞌbhuoꞌa tinɩɛꞌɛ dɩ ꞌle ꞌkmʋ ꞌmʋꞌa lɩ ꞌli, ꞌɔ nyɔtu ꞌke ꞌmɛ ꞌbho -Lagɔꞌɔ ꞌꞌyigbeyi. ⅩⅩⅥ -Gblee, -bho -ɩn ꞌꞌdu ꞌnɔɔ ꞌkmʋ ꞌmʋꞌa ꞌgagalɩ ꞌweeꞌa ꞌyeyedɩ ꞌle -ɩn ꞌke ꞌmɛ ꞌbho -Lagɔꞌɔ ꞌꞌyigbeyi ꞌle, leelɛ -ɩn ꞌyeꞌe ꞌtɔ ꞌbhoꞌa? ꞌYa ꞌwee ꞌmo-o bhubhulɩ, -ɛkedɩmaa, ꞌya lɛtu se ꞌbhɛɛ ɩ ꞌke nyɔ ꞌpʋʋn ꞌbho -Lagɔꞌɔ ꞌꞌyigbeyi. ⅩⅩⅦ -Ziaka, ꞌɩnmɔ *Nyunyɔꞌɔ ꞌꞌYu, ꞌɩn-ɩ ꞌye-e ꞌle ꞌan -tɩta -Lagɔ gbo ꞌwlʋ -mʋ ꞌle ꞌɩn -ke ɔ gboꞌa -dalbhomʋ ꞌke ꞌnɔɔ ꞌbhlʋkpa ꞌꞌkpi yi. ꞌLe ꞌɔ ꞌnynɩꞌa ꞌꞌyibhɛɛɛ ꞌmʋ ꞌɩn-ɩ ꞌye -yi -nɩ mʋ. ꞌBho ꞌmnɔ, nyɔꞌꞌo nyɔꞌɔ dɩ ɔ nʋꞌa ꞌle ɔ ꞌke ꞌya ꞌpɛlʋ ꞌye. ⅩⅩⅧ -Ziadɩ ꞌɩn-ɩ zaꞌa amʋ -bodɩ ꞌmʋ, ꞌɩnmɔ *Nyunyɔꞌɔ ꞌꞌYu-u ꞌye-e -yi -mʋ ꞌle nyʋ ꞌke ꞌan nyʋꞌa -kɔkɔɔꞌɔ da ꞌye. A-bʋ -nɩꞌa -laa, aꞌba ꞌꞌklumʋꞌa nyʋ -lrʋʋ -see ꞌmɛ yi, a-a ꞌye-e ꞌɛ da ꞌye -mʋ. ꞌKa-a Zezii ꞌlɛꞌo.