Lihamba lya ubhili lya
YOHANE
Lihamba lya 2 lya Yohae likityekwa na Nndumilwa Yohane mu ngungwa ya 90 mbole ya kubhelekwa kwa Yesu Kilisto. Yohane kangulimanyiha ng'obhe ywombe kukita ndo ywakatyekite kitabho aki, peni kihyengo kyake kangulikema ywombe ndo nng'ohi kilongohi. Milando yiibheghite nkati ya lihamba lya 2 lya Yohane yingulihwana kiugheghela muno na yila yiibheghite nkati mwa Nhalo ghwa Maha handa mughutyekitwe na Yohane. Ali yingubhikwa pekupeku menyu kyanalumu bhula pakabhinilia ngwiliho ya Yesu ya kupalana, na bhula mwakalandaniha kumpala Yesu na mbaka ghutughile ngwilho hyake, kipalamande kya 2 Yohana 1:5-6, Yohane 15:9-10, yinguhyubhalika kukita Nhalo gha Maha handa ghukityekwa na Yohane, na mahamba ghake ghene mandatu ndo 1 Yohane na 2 Yohane na 3 Yohane. Yohane kakityeka lihamba ali manjubha pakabheghite kangutama ku kitami kya ku Efeso.
Yohane kakityeka lihamba ali kwa nndala ywakanhyubhalila Kilisito papamu na mwana ghwake. Yohane kakityeka lihamba kakipala kuayonjokeha mwoyo bhandu bhaanhyubhalila Kilisito na bhalindakile na bhahunda bha uhwangi. Mbole kakilongela kukita lihamba ali likibhegha kwakya bhandu bhoha bhanakuhyubhalila. Ningo ya Yohane ya kutyeka lihamba ali yikibhegha kubhayonjokeha mwoyo lingwemuko na bhubho kuandakila na hililimuho ahyubhalila bha uhwangi.
Ghaabheghite,
Yohane kanguyanda kwa kulubhulila lihamba ali kanguatyekela akina ghani na kungaajambuha asomaji bhake, kipalamande kya (2 Yohana 1:1-3).
Mbole kanguliyumuha ngwemuko kwakya kuapegha ngwiliho yiibheghite ngulu kupitingana hyoha kipalamande kya (2 Yohana 1:4-6).
Kangi kanguakinya bhalindakile na anda ahundea bhq uhwangi kipalamande kya (2 Yohana 1:7-11).
Yohane kanguyomolela lihamba lyake kualagha asomaji bhake, kipalamande kya 2 Yohana 1:12-13.
1
1 Nenga nanng'ohi kilongohi, nungukutyekela lihamba, ghwenga Nndala ghunhyubhalila Kilisto papamu na bhana bhako bhanoghelitwe muno. Chepa kwa nenga ghweka changu yunnoghelitwe, ngati bhubho kwa bhala bhoha bhaanoghelitwe na uhoto na bhanakubhapala mwenga, 2 kiyaha uhoto ghungutama mumwenga na ghungughendelela kutama kwa twenga manjubha ghoha.
3 Umaha na luhungu na uhihimilo na uhyubhalilo ghuuhuma kwa Tate Chapanga na kwa Mwana ghwake Yesu Kilisto, ghwabhegha papamu na twenga mu uhoto na upalo.
Uhoto na Upalo
4 Nikiyelelwa muno kubhabhona amoo bha bhana bhako bhangutama mu uhoto handa Tate ghwetu pakatukwilikihilite twenga. 5 Basi, Nndala mpalo, megha na liyupo limu kwa ghwenga, tutame kwa kupalana. Luyupo ali yibhegha ngwiliho ya hyono ng'obhe, ngati ngwiliho yiyila yitubheghite naywo kutandila patunhyubhalilite Yesu Kilisto. 6 Upalo mana yake ndo kutama kwa kuyitikila ngwilikiho ya Chapanga. Ngwilikiho yamuyiyihwite kutandila makachu ndo ayi, mungunoghwa ntame kwa kupalana.
7 Ahunda bha uhwangi atangala bhabwituka munnima, bhandu bhanga kunnyitikila kukita Yesu Kilisto kahika kwa twenga pakabhegha na mmonekano ghwa mmili ghwa mundu. Mundu yunakulongela malagho handa agho, aywo ndo nkubhuhi na npingika ghwa Kilisto. 8 Basi, mualolekehe maha abho, ili mahengo ghenu gha kuntumikila Chapanga ghakotoke kuhobha yaghi, ngati Chapanga kabhapeghe lilumbo lyenu lyoha. 9 Mundu ywohele ywanga kughayitikila na kughendelela kutama mumahundo agha gha Kilisto na kangi kangughakiluka, kabhegha ng'obhe na Chapanga. Peni ywoheli yunakutama mumahundo agho kulyaghila kabhegha na hilibhi hyoha, na kabhegha na Tate na kabhegha na Mwana ghwake bhubho. 10 Nkotoke kunkingama mundu ywoheli ywene ywangakughayitikila mahundo agho, nkotoke kunkingama ukaya lwenu, kangi nkotoke kunjambuha handa nhyubhalila nnyenu. 11 Kiyaha ywoheli yunakunjambuha mundu aywo, kangulilunga na mundu aywo mumandendelo ghake gha uhokelo.
Malaghilo gha kuyomolela
12 Megha na milando matangala ya kubhaghombela, peni mbala ng'obhe kutenda habhu kwa kubhatyekela kwa kutumila mahamba, kihyengo kyake, ndalopokeha kuhika kwa mwenga na tuyobhela kibhungi kwa kibhungi, ngati tuhotole kuyelelwa. 13 Kunu kumeghite nenga bhana bha nhacha bhako bhangukujambuha.