Lihamba lya ndatu lya
YOHANE
Ulongoleho
Lihamba lya 3 lya Yohane likityekwa na Nndumilwa Yohane mu u ngungwa ya 90 mbole ya kubhelekwa kwa Yesu Kilisito. Yohane kangulimanyiha ng'obhe handa ndo ywakatyekite lihamba ali, peni kihyengo kyake kangulikema nng'ohi kilongohi kipalamande kya 3 Yohana 1:1. Kangulongela hilahila mu kitabho kya 2 Yohane kipalamande kya 1:1. Yinguhwachilwa kukita Yohane kakityeka mahamba mandatu gha Nhalo ghwa Maha handa 1 Yohane na 2 Yohane na 3 Yohane manjubha Yohane pakabheghite kangutama ku kitami kya ku Efeso.
Yohane kakityeka lihamba ali kwa Gayo mundu ywakabheghite kangunhyubhalila Kilisto ywakakemitwe Gayo, kangummanyiha Gayo handa ghanja ghwake na kunnaghila Gayo kabhatekulo maha bhandu bhaanhyubhalila Kilisito, bhaabheghite mu mwanja kupitila kitami kyakatamite Gayo.
Ghaabheghite.
Yohane kangulikambuha lihamba lyake kipalamande kya 1:1.
Mbole kangunnyonjokeha mwoyo Gayo pakannubhulila kabhonehe utekulo kwa bhandu bhaanhyubhalila Kilisito kipalamande kya 1:2-8.
Kangi, kanguaaghombela bhandu abhili, bhene ndo Diotelefe na Demetilio kipalamande kya 1:9-12.
Kuuhiko kanguyomolela lihamba lyake kipalamande kya 1:13-14.
1
1 Lihamba ali linguhuma kwa nenga nng'ohi kilongohi ghwa bhandu bha anhyubhalilite Kilisito.
Kwa ghanja ghwa nenga Gayo, ghunughupalite mu hoto.
2 Ghanja ghwangu mpalo, nunguyupa kukita ghughendelele maha kwa ghoha mu ubhumi ghwako, Nungukuyupila mmili ghwako ghubhegha maha handa paghughenelela maha mu kubhegha papamu na Chapanga. 3 Nikiyelelwa munu pala amoo bha alongo paahikite apa na kutulubhulila yakya bhula ghungughendelela kuyitikila hoto na bhula paghughendelela kutama mu hoto ahyo. 4 Kahone kilibhi kindendite nnyelelwi munu handa kuyihwa kukita bhana bhangu bhangutama mu hoto.
Yohane kanguntika Gayo
5 Ghanja ghwangu, ghwenga ghunguhyubhalika munu kubhukana na kuatendela gha maha alongo bhako ahyubhalila, hata handa abhegha ahenja kwa ghwenga. 6 Bhakinongela nhalo ghwa upalo ghwa ghwenga muulongolo ghwa ngwemuko lya apa lya bhandu bha anhyubhalilite Kilisito. Peni chonde ghubhatangatile ngati aghendelele na mwanja ghwabhe handa payinnoghela Chapanga. 7 Kiyaha anguyanda mwanja ghwabhe kwakya lihengo lya Yesu kyangali kupeghwa kyohele kuhuma kwa bhandu bhaanhyubhalilite ng'obhe Kilisito. 8 Hinu twenga bhatunhyubhalila Kilisto, tungunoghwa kuaatanga bhandu abho, ili na twenga tumokole kulilunga mu kutenda lihenga kwakya hoto.
Deotelefe na Demetilio
9 Nikiatyekela lihamba ali, ngwemuko lya bhandu bha anhyubhalilite Kilisito mihalo michoko, peni deotelefe, peni Deotelefe yunakilyakalyaka kya kubhegha kilongohi, kakilema kunnyihwa. 10 Hinu, panhika ndaghalongela milando yoha yakayitenda, malagho mahakata gha uhwangi ghakatughombela twenga. Hilahila mwene ghulema kuakingama alongo ahyubhalila abheghite mu mwanja, na kangi kanguakanikiha bhandu bhangi bhaapala kubhakingama na kuabhingabhinga panji ya ngwemuko ya bhandu bhaanhyubhalilite Kilisito.
11 Ghanja ghwangu, ghukotoke kughutughila nhwano nhakata, ngati lila liibheghite lya maha. Ywohele ywaatenda lya maha ndo ghwa Chapanga, na ywakatenda mahakata kakimmona ng'obhe Chapanga.
12 Bhandu bhoha bhanguntika Demetilio kwa ghala ghakaghatenda, na kangi hoto yene yinguntika. Na twenga tunguyobhela gha maha kunninga mwene, na ghwenga ghungumanya kukita kila kiitulongela ndo hoto.
Majambuho gha kuyomolela
13 Ngali megha na matangalo gha kuaghombela peni mbala ng'obhe kughatyeka kwa kutumila lihamba. 14 Mbole yaki, ninguhyubhalila ndakubhona mbole ya manjubha machoko na twaalongela kibhungi kwa kibhungi.
15 Ningukuyupila uhihimilo.
Aghanja bhako bha apa bhangukujambuha. Na ghwenga ghubhajambuhe aghanja bhetu bha akwo kila yumo kwa lihina lyaki.