1-2 Osi omi wan oparisaa tau Yesus pan kota Korintus. Anahatana iromamo nea na ouna ne mansiau. Tea mo, anomo osa runa Yesus Kristus. Ia iae iromamo nea oi na okata ne mansia tamena wason oparisaa tau Yesus nea oi sui supan-supan man. Okata sio wason oparisaa tau Upuri Yesus Kristus wain pusita iainisi iainaa nnai.

Au, Paulus, wan ukanu surate reini. Anahatana ne maue reiso ioiku na au una Yesus Kristus ne maisosie. Sostenes mo, re kaka wani wain iparisaa tau Yesus, wain ikataku oi.

3 Uama ainisi osimo san rei, “Mani Ama Anahatana. Mani Upu Yesus Kristus. Masike sio Korintus opalalosa iae, orui iake mainae osiso sinia. Unaso okarihuru oamahai.”

4 Au saka uainisi iake arihon Anahatana sui osa tau Anahatana mo, masike opalalosa iae, irui iake mainae osimo sinia tau anomo osa runa Yesus Kristus. 5 Areimo irui kawasa na pusire uture waron iaka osimo nea tau omi anomo osa runa Kristus. Irui pusire osimo, areimo oanei osima rerihon Anahatana ne maunauna osi mansiau runa oanei sae waron Anahatana iatuhetere osimo. 6 Irui pusire uture osimo, areimo iatuhete ata sae wan ami asima runai rerihon Kristus mo, manisate. 7 Reiso onapa-napa Upuri Yesus Kristus ihokai mai tuniai honu mo, Anahatana ne Inaha irui kawasa sae man osimo nea, reiso omi mo, mka osupu sae man na oanori nnai. 8 Mka Anahatana iunamo oparisaa tanui ia-ia rotu-tu Upuri Yesus Kristus ihokai mai tuniai reini honu. Reiso, sani ihokai mai tuniai reini honu mo, ia isa mka iasau tewa, ata me isanae isa. 9 Anahatana mo, iuna sui ne anamanaya sui osa. Ia sahoro ioimo na anomo osa runa Anai Upuri Yesus Kristus.

10 Wea kakau, wea waniu, hutu nohue. Uainisi arihonimo tau Upuri Yesus Kristus ne kawasa. Pene otuntana runa umau. Na pene owena-wenamo nea. Ne kahurae hutuamo anomo osa. 11 Wea kakau, wea waniu, hutu nohue. Kloe ne mansiau umau osima osiku ata omi wan otuntana runa umau rerihoni ia sia sahoro mka opusui. 12 Uatinu ata sio umau oasau ata, “Au upusu Paulus.” Sio umau honu oasau ata, “Au upusu Apolos.” Ita sio umau honu oasau ata, “Au upusu Petrus.” Ne sio umau mo, oahata, “Au upusu Kristus.”

13 Ne ia isa mka isama-sama Kristus tewa, tea! Ororu au, Paulus, roe hini ukatimo tewa, tea! Hasae Kristus sahoro sio ororui roe hini ikatimo, tea! Sio osohumo na mansiau oanei ata oarihoni mo rosau nea mo, ohete au nanaku, Paulus, tewa, tea! 14 Uainisi iake arihon Anahatana noso au sahoro usohumo tewa. Ne hasae usohu Krispus runa Gayus uaso man. 15 Reiso ia seia man mka iasau tewa ata, “Au mo, Paulus isohuku reiso au una ne mampusue.” 16 Io! Anoku kanihue. Usohu Stepanus runa ne numa taue oi. Na kani usohu sio umau oi, ne anoku kanihue nea. 17 Areimo tau Kristus iaisosiku usohu sio panesi mo, tewa. Ne iaisosiku usima na Sou Iake rerihoni Yesus Kristus. Ne usima nnai sani au mansia wain anoi repiri mo, tewa. Uaunau sani au mansiau wain anoku repiri, areimo noo sani uasau ata Kristus imatai roe hini nene sae isa tewa.

18 Sio umau oata kani Sou Iake rerihoni Yesus imatai roe hini mo, sou rirunene. Sio wasoni oasau san rei mo, mka Anahatana ipesiso poe usa mainae wani hainau arihoniki. Ne ita wan Anahatana wain iapuheuta reini mo, ianei ata Sou Iake rei mo, retuhete Anahatana ne kawasa. Iapuheuta runa ne kawasa rei. 19 Noo sani sae wan ia mamsima runa Anahatana ne maunauna wain nanai Yesaya ikanu tau Anahatana ne anamanaya. Ikanu ata,

20 Anahatana inoo sio wason anoo rapiri osa na mansia pusiki. Inoo sio wason isikola mainae osa na mansia pusiki. Inoo sio mai tuniai reini wason oanamana osi umau nanie osupu an manisate osa na mansia pusiki. Anahatana iatuhete nea ata sio wason oata kani sio mo, anoo rapiri mai tuniai, aikee sae mo, oariruneso. 21 Tea mo, Anahatana anoi repiri. Reiso masike mansia mai tuniai oata kani anoo rapiri sapan oi iae, mka oationai tewa noso anoo rapiri rei. Ne Ia ne maue na iapuheu sio wasoni oparisaa tau Sou Iake wan ami asima nnai osimo reini. Aikee sio umau oata kani sou reimo sou rirunene.

22 Sio Yahudiu onina na onoo sima-simana tau matao samatoro oparisaa. Sio wason sio Yahudiu tewa hasae nanie oatinu sio wason oata kani anoo rapiri no maunauna samatoro oparisaa. 23 Ne ami reini mo, hasae asima na Kristus waini imatai roe hini na iapuheuta. Sio Yahudiu oatinu san rei, oreti. Oo sio wasoni sio Yahudiu tewa mo, oata kani sou rirunene. 24 Ne Anahatana iroma sio umau nea na ouna ne mansiau. Sio wason iromaso mo, sio umau sio Yahudiu, sio umau sio Yahudiu tewa. Tau sio oatinu Sou Iake rerihoni Kristus mo, oparisaa ata Anahatana irati Kristus na imatai ikatita. Areimo, iatuhete ne kawasa na iatuhete ata anoi repiri. 25 Mansiau oata kani Anahatana iuna sae isa wan rirunene. Aikee sae mo, sae wani Anahatana iunai rei mo, anooi repiri renesi mansia pusiki. Masike mansiau onoo sana ata Anahatana ne kawasa tewa, aikee sae mo, Ia mo, ne kawasa mainae renesi mansia pusiki.

26 We kakau, we waniu, hutu nohue. Masi anomo rapeka runa naone oni Anahatana ioimo tewasi. Mansiau oata kani omi panesi tewa wason anomo rapiri. Omi mkana man sahoro omi mainaya. Omi mkana man oamrai noi numa matae wan mo kupan kaya. 27 Ne, Anahatana iroma sio wason sio mansiau mai tuniai reini onooso sani sio mo, sio rirunena. Iromaso na ouna pumaa sio wason ouna ruao sani sio mo, anoo rapiri. Anahatana iroma sio wason sio iki honua na ouna pumaa sio wason sio mainaya rei. 28 Anahatana iroma sio ikina honua wason mansiau openeso tanso. Iroma sio wason oanei sae isa tewa. Iromaso na sio wason ouna ruao ata sio mo, sio mainaya rei, sio mainaya tewa nea. 29 Anahatana iuna san rei na ia sia man mai tuniai reini pene iasau osi Anahatana ata, “Anoku repiri” te “Au mainae.” 30 Anahatana ruai sahoro iunamo na anomo osa runa Yesus Kristus. Yesus ruai sahoro anoi repiri. Iunata iamanisa, iunata tau ne mansiau, na isiru heu re rosau. 31 Reiso araimo noo sani Yeremia ikanu tau Anahatana ne anamanaya, “Pene ainaa na ruamo ne oainaa na Upuri tau sae waron iunare osimo nea rei.”1:31 Yeremia 9:24