2
Paulus isima na Sou Iake rerihon Yesus tau sou mainae tewa.
2:1-16
1 Wea kakau, wea waniu, hutu nohue. Tau uhokaku mai tanumo na uatuhetemo rerihoni Anahatana ne sou wan mansia oaneiki tewasi. Unina tewa na omi oata kani au uanei panesi reiso uanamana osimo tau sou mainae mo, tewa. Te uanamana sani au mo, anoku repiri, areimo tewa oi. 2 Tea mo, ruaku uapamata sou nea oni pusita ikata umau asi, areimo au we maunaune osa man. Hasae nanie usima rerihon Yesus Kristus wain sio ohunui roe hini osita. 3 Oni urue ukatamo mo, uahana kua tewa upusu Kristus ne maue. Uata kani upusui iake tewa reiso ukaitau rotu-tu ukana-kananunu hunu ruaku. 4 Tau uanamana na usima runa Anahatana ne maunauna osimo mo, uanamana tau sou mainae tewa. Uanamana tau sou mainae tewa na uapamanumo na oparisaa tau sae waron usima nnare rei mo, tewa. Te uanamana sani au mo, anoku repiri, arei iae tewa oi. Ne Anahatana ne Inaha ne kawasa sahoro iatuhetemo ata sae waron usima nnare rai mo, pusire manisata. 5 Uanamana tau sou mainae tewa na oparisaa rei mo, na pene oparisaa tau mansia anoo rapiri. Ne omi oparisaa rei mo, noso Anahatana ne kawasa.
Anahatana ne Inaha sahoro iuna anori rapiri
6 Sani ami anamana osi sio wason oparisaa ia-ia tau Anahatana mo, ami anamana anoma rapiri. Ne ami anamana anoma rapiri reimo, nooi tewa sani sae waron sio mai tuniai wason oparisaa tau Anahatana tewa oata kani anoo rapiri. Ami anamana rerihoni sae waron sio wasoni orime kawasa mai tuniai reini oata kani anoo rapiri. Sio wason orime kawasa rei mo, potuina tewa oi mka no kawasa tewa nea. 7 Ne sae wan ami asima runai, areimo sae waron Anahatana ruai iheu runare potuina nea. Iheu runare tau Ia mo, anoi repiri. Iatuhetere osi mansiau tewasi reiso ita mansiau ianeire tewasi. Iheu runare oni ihaye tau tuniai reini tewasi. Iheu runare san rei mo, nanie tau ita isupu iake.
8 Ia osa-sa arihon sio wason ouna sio mainaya na orime mansia mai tuniai reini iae ianei sae waron Anahatana ruai iheu runare nea mo, tewa. Sinana oanei, mka ororu Yesus Kristus wain ita iainisi iainaa runai rei roe hini tewa. 9 Areimo noo sani Yesaya ikanu tau Anahatana ne anamanaya ata,
“Anahatana iheu runa sae waron iake matane osi sio wason anoo runai.
Iheu runa sae waron ia seia man inoore tewasi, iatinure tewasi. Te iariniire pan anoi tewasi.”2:9 Yesaya 64:4
10 Ne muie reini Anahatana ne Inaha iatuhete pusire waron iheu runare osita nea. Tea mo, ne Inaha mo, ianei sae man. Rotu-tu ianei sae man waron pan Anahatana anoi oi. Ne Inaha iae ianei sae man waron isima runare osi ia isa tewasi. 11 Tea mo, sae waron pan ia isa anoi mo, hasae ia rei ruai man sahoro ianeire. Anahatana iae san rei oi. Ia wain ianei Anahatana anoi mo, hasae Ia ruai ne Inaha.
12 Iararuma sae waron sio mai tuniai reini oatuhetere mo, tewa. Ne iararuma Anahatana ne Inaha. Irui ne Inaha osita na ianei sae man waron ruai iruire osita nea. 13 Reiso sani asima runa Anahatana, ami anamana tewa rerihoni sae waron rahoka arihoni mansiau mai tuniai reini anoo. Ne ami anamana rerihoni sae waron Anahatana ne Inaha iatuhetema tanre. Asima runa sae waron ne Inaha iaisosima asima osi sio wason ne Inaha rei iruei pani anoo. 14 Ne sio wason Anahatana ne Inaha iruei pani anoo tewa mo, oatinu tau sae waron Anahatana ne Inaha iasau runare rei tewa. Tea mo, oatinure sani sou rirunene. Hasae Anahatana ne Inaha sahoro iakahaiso oanei sae waron iasau runare rei. 15 Hasae sio wason Anahatana ne Inaha iruei pani anoo sahoro oanei sae man. Ne sio wason Anahatana ne Inaha irue pan anoo tewa mo, oarinii sio wason Anahatana ne Inaha iruei pan anoo mo, iake tewa. 16 Tea mo, Yesaya ikanu tau Anahatana ne anamanaya ata,
“Ia sia man ianei kua sae wapan Anahatana anoi tewa.
Ia sia man iatuhete kua Anahatana tewa.”
Ne ita wani iparisaa tau Yesus mo, anori osa runa Kristus.