2
1 Reiso Anahatana ihaye tau tuniai reini pusiki. 2 Nene onona nome rai ihaye tau pusire oyo nene onona itu mo, iaranahai nea, na pene ipakarian. 3 Rania hataya rotu-tu mai nene onona itu rai mo, monne. Anahatana irui iake tau onone wani iamuira Anahatana. Tea mo, ranie hatae rei Anahatana ruai iaranahai. Ihaye tau tuniai reini pusi oyo iaranahai.
Anahatana ihaye tau nisi osi mansiau
4 Areini sahoro sou monae rerihoni Anahatana ihaye tau tuniai reini pusiki. Anahatana ihaye tau tuniai reini pusiki mo, 5 aiu raruhu mai tuniai reini tewasi, atuhu iae raruhu sui nisiu tewasi. Tea mo, Anahatana irati uane tewasi. Ihaye tau mansia na orahuso tewasi. 6 Hasae wae huhuna rania reiso rauna tuamana hahaya rampeta pusire.
7 Taa san rei, oyo Anahatana inana tuamane mkane samatoro iposoi na nanie ereuna mansia. Iposoi pusi oyo, iauhona ne nusete osiki na ikarihuru iamahai. Iauhona ne nusete pusu okoi, oyo ia mansia rei iamahaiki.
8 Ita iuna nisi iake ria ranie matae eresaa ria otoe Eden. Iunai pusi, oyo iautue ia mansia rei ria nisi rei. 9 Oyo iuna aiu waron inoore iaka raruhu ria nisi rei. Aiu waron nene huaya iaire mo, iake. Ria nisi tihue rei aiu ua honu raruhu oi. Ai isa, nene huaya rauna mansiau okarihuru oamahai. Ai isa honu, nene huaya rauna mansiau oanei sae sahoro no hali iake, sae sahoro no hali kahatene.
10 Waene isa erenia pusu Eden. Rempeta nisi rei. Erenia rotu-tu erehokai nau mui, oyo eresamai tau sanana ate. 11-12 Waene sanae wani mataanoe nanae Pison. Erenia erehori tuama Hawila. Pan rei, osupu hunahane isie wani iake tunne runa kama hau rihue. Osupu hatu waron ita-itana oi. 13 Waene sanae isa honu nanae Gihon. Erenia erehori tuama Kus. 14 Waene sanae isa honu nanae Tigris. Erenia pan Asyur napi ranie matae eresaa. Sanane isa honu nanae Efrat.
15 Reiso Anahatana iautue ia mansia wain iposoi arihoni tuamane rei na isaka nisi rei na irahui. 16 Anahatana iasau osi ia mansia rei. Iahata, “Utapia aai ai huae sae man mai nisi anoe reini. 17 Hasae ai wani nene huaya rauna mansiau oanei sae sahoro no hali iake, sae sahoro no hali kahatene mo, pene aiki. Tea mo, sani aiki ranie hatae reini oyo, mka amataya rei sirinia.”
18 Oyo Anahatana iasau pan anoi. Iahata, “Ia mansia reini mo, ruai man mka iake tewa. Kahurae au una ne neta isa wain pannuhu runai na iakahaiki oi.”
19 Reiso inana tuamane mkane samatoro iposo tuamane rei samatoro iunai tau binatang pusire uture runa manua pusire uture. Iposoi samatoro irorire osi ia manisa rei nanie inoore. Inoore na ihete nanaya. 20 Arai sahoro ia mansia rei isima runa binatang runa manua pusire nene nanaya sakakau. Ne binatang rai pusire uture pannuhu runa ia mansia rei tewa. Pannuhu runai tewa na ioi ne neta tanui na iakahaiki tewa.
21 Reiso Anahatana iuna ia mansia hanaie rei inekei munui. Inekei munui oyo, ihoka nusui anae isa. Ihokai samatoro isou nusui anae nahae rei tau ne henate. 22 Nusui anae rei, iunai tau ia pina isa oyo iroriki osi ia hanaie rei. 23 Oyo ia mansia rei iasau iahata,
“Ira oe! Ia rei sahoro unina-ninai reini tea!
Ia sahoro pannuhu runa au.
Ne unia arihoni au we unia.
Ne henate arihoni au we henate.
Reiso uhete nanai tau ia pina.
Tea mo, Anahatana inanai arihoni au hanaie.”*2:23 Tau sou Ibrani mo, anamanae ereoi sio hanaia mo, ish ne sio pinau mo, ishshah. Reiso sou ua rai, uare haineke osa.
24 Ia pina pannuhu runa ia hanaie reiso, sio hanaia oeu oarihoni no mansia mainaya na orue okata no pinau. Nooso sani sio tumata osa man.
25 Ia pina rei runa ia hanaie rei sanakuso ne oaumaa tewa.
*2:23 2:23 Tau sou Ibrani mo, anamanae ereoi sio hanaia mo, ish ne sio pinau mo, ishshah. Reiso sou ua rai, uare haineke osa.