1 Sio mansiau osusu haha, reiso orue ohori pusi tuniai reini. Reiso osusu no sio iki pinau panesi. 2 Sio on roe noiyaha onoo sio pina hehuka rei, sio iaka. Reiso onana sio pina hehuka wason okaumin runaso rei.

3 Anahatana inoo ata sio mansiau no kahatena panesi reiso iahata, “Mka utapi sio mansiau oamahaiso rotu-tu ria supan tewa tau sio opalalosa panesi. Utapiso rotu-tu orue rotu-tu musum utuni hutu ua nesi tewa. Kahurae pannuhu musum san rei oyo omataso.” 4 Tau napisi rei runa ereeu sio mansiau, sio noa-noaya mai tuniai reini. Sio reini sahoro rerihoni sio pina hehuka wason onana sio on roe noiyaha rei. Sio noa-noaya rei mo, sio panesi oationaso tau no kawasa mainae tau napisi reini.

5 Anahatana inoo sio mai tuniai no kahatena panesi. Hasae anoo ranoo kahatena man. 6 Anahatana iatamisi ata ihaye tau mansiau mai tuniai reini nea. Iahana iake pan anoi tewa. 7 Reiso iahata, “Uatamisi ata uhaye tau mansiau runa manua, binatang pusire uture reiso mka uhunu pusiso.” 8 Ne Nuh mo, iuna Anahatana anoi iake.

9 Areini sou monae rerihoni Nuh. Nuh anoi manisate. Rerihoni ia ne naene ia sahoro sio mka oasau tewa ata ne isanae. Tea mo, ia ne isanae isa tewa. Anoi osa runa Anahatana. 10 Isusu ne hehuka hanaia tonu. Ia manaonete nanai Sem, ia autihue nanai Yafet, runa ia muie nanai Ham. 11 Ne Anahatana inoo sui supan man sio tamena mai tuniai reini ouna kahatena. Oturuhaka, oakakapa. 12 Anahatana inoo mai tuniai reini mo, hasae inoo kahatena ruae man.

13 Reiso iasau osi Nuh. Iahata, “Uapamata sou nea. Nanie uhunu sio mansiau runa binatang pusire uture. Tuniai reini taue runa sio no kahatena rai. Reiso nanie uhunu pusire uture. Nanie uapumoko tuniai reini. 14 Reiso atuka me arupae isa arihoni ai gopir wani makae. Auna nene kakaranaya panesi pan anoe. Apunu aspal mai mui runa pan anoe. 15 Arupae rei kahurae nene naue meteri 133, hekani meteri 22, naue suru roe meteri 13. 16 Ainata me arupae rei. Arenu kasunepene hahae ereeu roe ainataya na karate senti 44. Atuka arupae rei, nene napisi tonu. Atuka nene mitanunue isa mai nusue. 17 Mka au una waene eresaa rotu-tu eresau-sau tuamane pusiki. Waene eresau-sau tuamane na erehunu pusi mansiau, manua, binatang pusire uture. Mka ramata pusiso. 18 Ne ano mo, mka utotoe runaya. Anusua pan arupae anoe rei akata saham, me hehuka runa no pinau pusiso. 19 Rerihoni manua nitaya pusire, arori manu inae isa runa manu hanaie isa. Rerihoni binatang pusire, arori binatang inae isa runa binatang hanaie isa. 20 Mka pusire uture rahokaso mai tanua na arorire pan arupae anoe na ramahaiso. 21 Arori muaina nitaya pusire na osi ruamo runa binatang runa manua rai pusire uture.” 22 Nuh inana pusire pusu Anahatana iasau osiki rei.