1 Anahatana iasau osi Nuh, iahata, “Hasae ano sahoro atinu tanuku. Hasae ano sahoro anom manisate. Ne sio pusiso mai tuniai reini oatinu tanuku tewa. Reiso anusua pan arupae anoe. Anusua akata saham, me hehuka tonso runa no pinau. 2 Rerihoni binatang nitaya pusire uture waron oaire iake oakanupure osiku iake, arori pina runa hanaie unua itu. Ne rerihoni waron oamaonre mo, arori unue osa man. 3 Rerihoni manua nitaya pusire uture waron oaire iake, oakanupure osiku iake arori unua itu oi. Ne rerihoni waron oamaonre mo, arori unue osa man. Arorire pan arupae anoe na ramahaiso. 4 Nesie itu rei, una uane mainae rotu-tu onona hutu ate. Au mka uhunu pusi mansiau runa binatang waron uhaye tau pusire rei.” 5 Reiso Nuh iuna sae waron Anahatana iasau osiki rei.

6 Waene eresaa mai tuniai reini mo, Nuh ne musum utuni nome. 7 Nuh runa sahai, ne hehuka tonso, runa no pinau onususo pan arupae anoe rei. Onususo na pene omokoso tau waene eresaa rei. 8-9 Manua runa binatang nitaya pusire uture ranusu pusire rakata Nuh sio. Ranusu unue erepusu unue. Waroni oaire iake, oakanupure osi Anahatana iake runa waron oamaonre. Ranusu pusu Anahatana iasau rei. 10 Ereruma onona itu nau oyo, waene eresaa. Eresou tuniai reini pusiki.

11 Nuh ne musum utuni nome pannuhu hunana ua umetene wani onona hutusa rahana itu. Oyo wae huhuna rasaa pusire mai tuniai reini. Sira tau waene erenia eresaa suru ria suru nau noo sani waene sanane. On roe nante mo, sira tau waene erenia san rei oi. Noo sani sio ohuka mitanunue wani erenete waene roe nante. 12 Uane rotu-tu onona hutu ate.

13 Tau ranie hatae rei Nuh sio pusiso onususo pan arupae rei anoe. 14-15 Binatang runa manua pusire uture ranusu oi 16 sani Anahatana iasau rei. Onusu pusiso san rei oyo, Anahatana iraru arupae rei nene mitanunue.

17-18 Waene eresaa rei rotu-tu onona hutu ate. Waene eresaa mainae reiso arupae rei remamanui. 19 Waene eresaa rotu-tu noo mosa tinetaya tewa nea. Masike tinetaya waron mainaya nai osa iae, noo mosa nene hahaya tewa nea. 20 Waene eresaa sui osa reiso ereniku tinetaya waron mainaya rotu-tu meter itu. 21-23 Anahatana ihunu pusire waron rakarihuru ramahai mai tuniai reini. Ihunu mansia, manua, binatang pusire uture. Wasoni ihunuso tewa mo, hasae Nuh runa pusire waron ikatare pan arupae anoe rei. 24 Waene rei erekaisunu tewa rotu-tu onona utuni hutu nima.