1 Anahatana anoi kanihue runa Nuh tewa. Anoi kanihue runa binatang waron rakatai pan arupae anoe rei tewa. Reiso iuna ihute reuhona pusu tuniai reini. Iuna ihute reuhona na waene erekaisunu. 2 Inete wae huhuna hunaya poe tuamane. Inete waena pusire roe nante. Uane ereminai 3 oyo waene erekai-kaisunu. Waene erekaisunu rotu-tu onona utuni hutu nima oimo, waene nekete mkane nea. 4 Tau hunana itu onona hutusa rahana itu arupae rei erekokiee. Erekokiee roe tinetae hahae pan tinetaya Ararat. 5 Waene erekaisunu sui osa rotu-tu hunana hutusa onone osa, oyo noo mosa tinetaya hahaya nea. Rahotuso nea.

6 Ereeu rotu-tu onona hutu ate samatoro Nuh ihuka arupae rei nene sasamata. 7 Ihukai nanie ihoka manu gagak. Ihoka manue rei, ne erenuniki mai arupae tewa nea. Ne ererihu suru ria suru nau sui osa rotu-tu waene rei erekaimeniki nai osa.

8 Ita Nuh ihoka manu puane, nanie ianei ata kani waene erekaimeniki nea te tewasi. 9 Ne waene eresou pusi tuniai reini pusiki reiso manue rei eresupu naniae na retasohoi tewa. Eresupu naniae tewa reiso erenuniki mai arupae rei honu. Erenuniki oyo Nuh iasasona hanai na inotai. Inotai samatoro inusu iroriki mai arupae anoe rei. 10 Inapa rotu-tu onona itu honu, ita ihoka manue rei honu. Ihokai oyo ialapasiki honu. 11 Tau nene ranie manne manue rei erenuniki mai Nuh honu. Erenuniki ererori ai saitun totue isa wani matae asi. Ereroriki tau hohae. Tau rei samatoro Nuh ianei ata waene erekaimeniki nea. 12 Ita inapa rotu-tu onona itu honu. Ita ialapasi manue rei honu. Ialapasiki rei oimo, erenuni mai tanui tewa nea.

13 Nuh ne musum utuni nome nesi osa, tau hunane osa, onone osa samatoro waene erekaimeniki ia-ia, Nuh ihuka arupae rei nene ainatae isa oyo inoo sui tihue rei. Ne inoo tihue rei erekaimeniki nea. 14 Tau hunana ua onona hutu ua rahana itu tuniai mo, erekaimeniki nai osa nea.

15 Oyo Anahatana iasau osi Nuh. 16 Iahata, “Ahokaya arihoni arupae rei runa saham na me hehuka na no pinau. 17 Ohoka orori manua runa binatang pusire uture. Ohokare na rasusu haha mai tuniai reini.”

18 Reiso Nuh sio ohokaso arihoni arupae anoe rei. 19 Manua runa binatang pusire rahokaso arihoni arupae rei. Rahokaso sakakau. Manu inae erekata manu hanaie. Une-une inae erekata une-une hanaie oi.

20 Nuh sio ohokaso oyo irane hatu noore sani anau. Iranere nanie iainisi iainaa runa Anahatana. Oyo inana manu hatae isa runa binatang hatae isa rerihoni manua runa binatang pusire waron iaire iake, iakanupure osi Anahatana iake. Inanare oyo iakanupure roe hatu hahaya rai. 21 Iakanupure oyo Anahatana anoi iake runa hau rihue rei. Reiso iahata, “Au mka urui kahatene osi sio mansiau pusu no kahatena rai tewa nea. Uanei ata on sio honua mo, anoo ranoa kahatena. Au mka uhunu mansiau runa binatang wason okarihuru oamahai sani mato una osiso rei tewa nea. 22 Mka musum mamrahue runa mapahia nisi sui osa. Musum mahatane musum titie sui osa. Ihate runa runne sui osa. Pumono runa manahane sui osa rotu-tu tuniai reini erepena.”