9
Anahatana itotoe osi Nuh
1 Anahatana irui iake osi Nuh runa ne hehuka. Iahata, “Asusu haha na moa upu momou panesi. Mka moa upu momou orue sui tuniai reini pusiki. 2 Manua, ikaya runa binatang pusire uture, mka omi mo kawasa tau pusire. Mka rakaitaumo. 3 Rai pusire tau mo muaina sani ai huaya ai totua pusire. Rai pusire uruire osimo tau mo muaina. 4 Hasae usopo na pene oai henate wani nasie asi. Tea mo, inaha mo, wamo nasi rei. 5 Sio mansiau runa binatang wason ohunu mansia mo, kahurae oapasanai. Mka uhunui oi. 6 Tea mo, uhaye tau mansia pusu nitaku. Reiso ia seia ihunu mansia mo, mka mansia ihunui oi. 7 Ne omi mo, osusu haha na moa upu momou orue sui tuniai reini pusiki.
8-9 Atinu. Au nanie utotoe osimo runa moa upu momou. 10 Nanie utotoe runa manua runa binatang pusire uture waron rakatamo pan arupae anoe rei. 11 Nanie utotoe san rei: Utotoe na uhunu omi mansiau runa binatang pusire uture pusu waene eresaa sani mato-mato rei tewa nea. 12 Nanie urui kakinate osimo. Kakinate na anori rapeka runa sae wani utotoe osimo rei. Utotoe osi omi mansiau runa binatang pusimo utumo. Utotoe rotu-tu ria supan. 13 Reiso kakinate rei, mka uautue tihana roe nante na anori rapeka ata utotoe osimo nea. 14 Sani onoo onoe oyo mka tihana rei, onooi 15-17 mka anoku erepeka runa sae wani utotoe osimo rei. Reiso mka waene eresaa erehunu pusimo utumo san rei tewa nea.”
Nuh runa ne Hehuka
18 Nuh ne hehuka wason osipuso arihoni arupae rei mo: Sem, Yafet, runa Ham. Ham mo, ia Kanaan amai. 19 Nuh ne hehuka tonu rei sahoro ouna numa upua tau sio pusiso mai tuniai reini.
20 Nuh mo, ia mamrahu nisi. Ia sahoro irahu nisi anggur mataanoe. 21 Taue isa Nuh ininu tihu anggur. Reiso imukei. Imukei oyo, inosu pusi ne apia oyo inekei sanakui pan ne numa unte anoe. Ne numa wani sio onanai arihoni makapana unte rei. 22 Inekei isanakui oyo Ham inusu pan numa anoe inoo amai isanakui. Reiso ihokai pan mui isima osi nea kakau uaso. 23 Uaso oatinu san rei oyo, onana papi naue. Onana papite rei, samatoro uaso oaunutui mai manao. Oyo oeu orike totu onusu pan numa rei. Nanie osou noa ama tau papite rei. Uaso orike totu na pene onoo noa ama wain isanakui rei. 24 Imukei suka oyo ianei ata anai hanaie muie ituruhaka iakakapa tanui. 25 Oyo iahata,
“Masi amataya! Uainisi na Anahatana irui kahatene osi Kanaan!
Mka iuna maniane mainae tau nea kakau uaso.
26 Uainisi uainaa runa Anahatana wain Sem iainisi iainaa runai.
Kanaan mka iuna maniane tau Sem.
27 Uainisi na Anahatana iuna Yafet isusu haha.
Uainisi na nea upu momou orueso okata Sem nea upu momou.
Kanaan mka iuna maniane tau Yafet.”
28 Waene erekaisunu suka, Nuh ikarihuru iamahai asi rotu-tu musum 350 honu. 29 Rotu-tu ne musum 950 oyo imatai.