18
Kugwa kwa Babilonya
1 Bzatapita bzimwebzi, ndidawona anju winango akhabuluka kucokera kudzulu. Akhana utongi bukulu, ndipo dziko la pantsi lidabvunikiridwa na kuyetima kwace. 2 Ndipo iye adakuwa na fala lamphambvu kuti:
“Wagwa! Wagwa*Iza 21:9 Babilonya mkulu!
Mzindawo udasanduka mwakukhala
ndipo mwakukhala mizimu yakuipa,
mwakukhala mbalame zakusvipizidwa zentse
na zakunyantsa,
3 nakuti madziko yentse yadamwa
vinyu ya ukali
yomwe idabweresedwa na uputa bwace.
Azimambo wa dziko la pantsi
adacita upombo naye.
Kudzera kwa kubzidekesa kwace kwakupitiriza,
wamalonda wa padziko la pantsi
adadala”.
4 Pamwepo ndidabva fala linango likhacokera kudzulu likhati:
“Coka kuna iye, imwe, mbumba yangu,
kuti imwe muleke kucita cipande ca bzitazo bzawo,
kuti cisi
comwe cin'dzagwa kuna iye
cireke kukufikirani!
5 Nakuti bzitazo bza Babilonya
bzatsandzikidzana mpaka kudzulu,
ndipo Mulungu wakumbukira
bzakuipa bzace.
6 Mum'bwezere
bzibodzi-bodzibzo,
mubwezere mwakufunya kawiri
pa bzomwe adacita,
mum'sanganizire cipande cakufunya kawiri
mum'kombo omwe iye adamwesera anango.
7 Bzibodzi-bodzi ninga iye akhana ukulu,
ndipo akhabzidekesa kwakupitiriza,
tsapano mum'citise kuti abonere na kuwawidwa caiko
ndipo mabvuto mazinji.
Mum'tima mwace mkaziyo
akhambabzikuza aciti:
‘Ndidakhala ninga mambo wacikazi.
Ndine lini masiwa,
ndipo nin'dzatsukwala lini pomwe’.
8 Ndipopo, pantsiku ibodzi yokha
bzin'dzamufikira bzisi ibzi:
Kufa, kutsukwala na njala.
Ndipo moto un'dzamudzonga,
nakuti Mbuya Mulungu omwe an'dzamutonga, ndiye ana mphambvu.
9 “Pomwe azimambo wa dziko la pantsi, omwe adacita upombo naye ndipo adacita cipande pa bzakudekesa bzace, akadzawona utsi buli tolotolo kucoka pakupsa kwa mzindawo, an'dzalira ndipo an'dzadandaula thangwe ra mzindawo. 10 An'dzakhala kutali thangwe ra mantha na kuboneresedwa kwawene ndipo an'dzakuwa kuti:
“ ‘Tsoka! Mzinda ukulu!
Babilonya, mzinda wamphambvu!
Munthawe ibodzi yokha
yafika nyathwa yawene!‡Eze 26:16-17’
11 “Wamalonda wa padziko la pantsi an'dzalira ndipo an'dzadandaula thangwe ra mzinda ule, nakuti palibe an'dzagula pomwe malonda yawo§Eze 27:31,36. 12 Malondayo ni: Oro, parata, minyala ya phindu, misanga, nguwo za mbveru-mbveru na zakucemeredwa purupura, seda na nguwo zifuira, na mtundu uli-wentse wa miti yakucemeredwa seduro na nyanga za ndzou na miti ya phindu, burondze, utale na minyala yakudeka, 13 na bzakununcirisa cakudya bza muti wakucemeredwa kanela na bza mtundu winango, ntsembe zakununchira, mira na bzakununchira, vinyu na azete, ufa bwakunyodoka na tirigu, ng'ombe na mabira, makavalo na ngolo, ndipo na anyagirinya na wanthu anango.
14 “Wamalondawo an'dzati: ‘Bzisapo bzomwe ukhafuna kwene-kwene bzacoka kuna iwe! Udali bwako bwentse na kuyetima kwako kwentse bzakumalira. Un'dzabziwona lini pomwe’. 15 Wamalonda wa bzinthu bzimwebzi, omwe adadala kudzera kwa mzindawo, an'dzakhala kutali na mantha thangwe ra kubonera kwawene, ndipo an'dzalira na kudandaula, 16 acimbakuwa kuti:
“ ‘Tsoka kwa mzinda ukulu,
wakubvala nguwo za mbveru-mbveru,
bzakubvala bza purupura
ndipo na bzakubvala bzifuira,
kubzidekesa na bzinthu bza oro,
minyala ya phindu na misanga!
17 Munthawe ibodzi yokha,
udali ukulu bwentse
bwamala!’
“Wentse wakufambisa xitima za m'madzi, wentse wakunyamulidwa, wakuphata basa muxitima ndipo na wentse omwe ambacita phindu na nyandza, adaima kutali**Iza 23:14; Eze 27:30-35. 18 Pakuwona utsi bwa moto wa mzindawo, an'dzakuwa kuti: ‘Ni mzinda uponi unango omwe unilingana na mzinda ukuluyu?’ 19 An'dzathusa pfumbi m'misolo, acimbadzadandaula ndipo an'dzalira mwakukuwa aciti:
“ ‘Tsoka kwa mzinda ukulu!
Kudala kwa mzindawo kudakhala mwai,
kudzera mwa iwo adadala
wentse omwe akhana
xitima za m'nyandza!
Munthawe ibodzi yokha
udamala!††Eze 27:25-36
20 Kudzulu kondwani na bzomwe bzacitika kwa mzindayo!‡‡Jer 51:48
Kondwani, nandi wakucena, atumiki
na apolofita!
Nakuti Mulungu adautonga, aciupasa nyathwa
thangwe la bzomwe iwo udacita kuna imwe’ ”.
21 Pamwepo anju wamphambvu adadzusa cimwala cikulu kwene-kwene ninga mpheyo, adacithusa panyandza aciti:
“Mwa mphambvu ibodzi-bodziyi
un'dzathusidwa padziko la pantsi,
mzinda ukulu
wa Babilonya§§Jer 51:63-64,
kuti uleke
kudzawoneka pomwe cipo***Eze 26:21.
22 Un'dzabveka lini pomwe mum'zindayo
muwira wa wakuliza santsi, wakuimba nyimbo,
wakuliza bzitoliro na wakuliza
bzimbututu cipo.
An'dzawoneka lini pomwe mukati mwa mzinda ule
azimisiri na m'bodziyo, ngakhale wakudziwa basa liri-lentse cipo.
Mumzindawo mun'dzabveka lini pomwe
muwira wa mpheyo cipo.
23 Mkati mwa mzindawo mun'dzawoneka lini pomwe ceza
ca ciphani-phani cipo.
Mun'dzabveka lini pomwe
fala la wakulowola na la wakulowodwa cipo†††Jer 25:10.
Wakugulisa wawo akhali
wa mbiri pa basa limweri padziko la pantsi.
Madziko yentse
yadapumpsidwa
na matsenga yace.
24 Mwa mzindawo mudagumanidwa mulopa
wa apolofita na wa wakucena,
ndipo na wa wentse omwe adaphedwa
pa dziko la pantsi”.