19
Kutumbiza Mulungu kwa kudzulu
1 Bzatapita bzimwebzi, ndidabva kudzulu cinthu ninga ciwowo ca mthithi ukulu wa wanthu omwe ukhati:
“Aleruya!
Cipulumuso, mbiri na mphambvu
ni bza Mulungu wathu,
2 nakuti kwacadidi na kwakulungama
ni kutonga kwace.
Iye adapasa nyathwa
puta mkulu,
omwe akhapumpsa dziko la pantsi
na uputa bwace.
Mulungu adasunda mulopa
wa anyagirinya wace kuna putayo”.
3 Mthithi udakuwa pomwe uciti:
“Aleruya!
Utsi bomwe buli kucoka kuna mzindawo,
bulikukwira kwakusaya kumala”.
4 Akulu-akulu makumi mawiri na anai (24) na bzamoyo bzinai (4) adagodama acitumbiza Mulungu, omwe akhadakhala pampando wa umambo, ndipo adakuwa aciti:
“Ameni, Aleruya!”
5 Pamwepo fala lidabwera kucokera kumpando wa umambo, lakuti:
“Tumbizani Mulungu wathu,
imwe mwentse, anyagirinya wace,
imwepo omwe munimugopa,
ang'ono na akulu!”
6 Pamwepo ndidabva cinthu ca muwira wakulingana na wa mthithi ukulu, ninga kukukuma kwa madzi mazinji *Eze 1:24na kugunda kwamphambvu cikhati:
“Aleruya!
Nakuti alikutonga
Mbuya, Mulungu wathu,
Wamphambvu-zentse.
7 Mbatikondwere! Tisekerere
ndipo tim'pase mbiri!
Nakuti yafika nthawe
ya malowozi ya Bira,
ndipo wakulowodwa wace wakondzekera kale,
8 wapasidwa
bzakubvala bza mbveru-mbveru, bzakuyetimira ndipo bzicena”.
Bzakubvalabzo bza mbveru-mbveru ni mabasa yakulungama ya wakucena.
9 Anju adandiuza kuti: “Nemba kuti: Wakudalisidwa ni wale adacemeredwa kuphwandu la malowozi †Mat 22:2-3ya Bira!” Ndipo adathimizira aciti: “Yamweya ni mafala yacadidi ya Mulungu”.
10 Pamwepo ndidagwera muminyendo mwace kuti ndim'tumbize, tsono iye adandiuza kuti: “Leka kucita bzimwebzi! Ndine nyagirinya ninga iwe, ndipo ninga abale wako omwe ni wakukhulupirika pa umboni bwa Jezu. Mulungu ndiye omwe an'funika kuti um'tumbize! Kucitira Jezu umboni ni mzimu wa cipolofita”.‡Ayai kuti: Pemba Mulungu! Umboni bwa Jesu ni mzimu wa cipolofita.
Wakupakira pa kavalo mcena
11 Ndidawona kudzulu kudafunguka§Eze 1:1 ndipo patsogolo pangu pakhana kavalo mcena, wakupakira wace akhacemeredwa Wakukhulupirika ndipo Wacadidi. Iye ambatonga na kucita nkhondo mwakulungama. 12 Maso yace yali ninga bzirambi-rambi bza moto**Dan 10:6, ndipo pamsolo pace pana ntsinga-msolo za umambo zizinji na dzina lomwe lin'dziwika na Iye yekha, palibe winango. 13 Adabvala cakubvala cakubvikidwa m'mulopa, ndipo ambacemeredwa kuti Fala la Mulungu. 14 Gulu likulu la acikunda wa kudzulu likhamutewera, likhadabvala nguwo za mbveru-mbveru, zakuyetima ndipo zicena, akhadapakira pamakavalo yacena. 15 Pamulomo pace pakhacoka cisenga cakuthwa, comwe an'dzapweteka naco madziko. “Iye adzayatonga na mpsimbo ya utale.”††Mas 2:9 Iye an'dzaponda uva mucakupsinyira vinyu‡‡Iza 63:3; Jow 3:13; Cid 14:20 ya ukali bwakugosva bwa Mulungu Wamphambvu-zentse. 16 Mubzakufinikira bzace ndipo munchafu mwace mudanembedwa dzina lakuti:
Mambo wa azimambo
ndipo Mbuya wa azimbuya.
17 Ndidawona anju m'bodzi akhadaimirira padzuwa ndipo akhakuwa na fala lamphambvu kwa mbalame zentse zomwe zikhambuluka mudzulu akhati: “Bwerani, tsonkhanani pa uzokoto bukulu bwa Mulungu, 18 kuti mudzadye nyama ya azimambo, akulu wa nkhondo na wamphambvu, ya makavalo na wakupakira wayene, ya wentse, ampfulu na anyagirinya, ang'ono na akulu”.
19 Pamwepo ndidawona cirombo§§Cid 13:1-18, azimambo wa padziko la pantsi na acikunda wawo akhadatsonkhana kuti acite nkhondo na ule omwe akhadapakira pa kavalo ndipo na gulu la acikunda wace. 20 Tsono cirombo cidamangidwa, pabodzi na mpolofita wakunama omwe akhadacita bzizindikiro bzakudabwisa mudzina la ciromboco, bzomwe iye akhadapumpsa nabzo omwe akhadatambira cizindikiro ca ciromboco ndipo akhadapemba cifanikizo cace. Awiriwo adathusidwa wamoyo muthawale la moto lomwe limbagaka na enxofre. 21 Anango wentse adaphedwa na cisenga comwe cikhacoka pa mulomo pa ule omwe akhadapakira pa kavalo. Ndipo mbalame zentse zidakodwa na nyama zawo.