1 Bʉle, ʉne ngaja mwabʉke? Bʉle, ʉne ngaja ntʉmigwa? Bʉle, ʉne ngaalɨmmbwene ʉNtwa gwɨtʉ Jesu? Bʉle, ngaja jo ʉne naalyandiisye ɨkɨpanga kyɨnu ɨkya Kyala kʉ maka agaa Ntwa Jesu? 2 Nalɨnga abandʉ abangɨ bikʉʉmbona ʉkʉtɨ ngaja ntʉmigwa, looli kʉmyɨnu ʉne ndɨ ntʉmigwa, paapo ɨkɨpanga kyɨnu ɨkya Kyala, kɨmanyilo ɨkɨ kikʉnangɨsya ʉkʉtɨ ʉne ndʉmiigwe nʉ Ntwa.

3 Po abandʉ aba bikʉʉsitaaka ʉne ʉkʉtɨ ngaja ntʉmigwa, nikʉbabʉʉla nikʉtɨ, 4 baatɨ, ʉswe twe batʉmigwa baa Kyala, tʉkabagɨsya ʉkʉpeeligwa ɨfya kʉlya nɨ fya kʉnwa kʉnongwa jaa mbombo ɨjɨ? 5 Bʉle, tʉkabagɨsya ʉkwenda ɨnjɨla na bakasi bɨɨtʉ abiitɨki, bo ʉlʉ bikwenda nabo ɨnjɨla Peeteli na batʉmigwa abangɨ, na banuguna baa Ntwa Jesu? 6 Baatɨ, jo ʉne na Balinaba twibeene, twe tukʉlondigwa ʉkʉbomba ɨmbombo ɨjɨngɨ ʉkʉtɨ tʉkabe ʉmfwalo? 7 Jo nsikali nki ʉjʉ ikʉbʉʉka kʉkʉlwa ʉbwite, ikwihomba ɨkyʉma kyake? Jo jwani ʉjʉ ikʉbyala mu ngʉnda gwake, looli atikʉsʉʉbɨla ʉkʉlya ɨfi aabyele? Kangɨ jo jwani ʉjʉ ikʉtiima ʉntiimo kɨsita kʉnwamo ʉlʉkama mu ntiimo gwake?

8 Ɨnyiinogono ɨsi sya bandʉ itolo. Looli nɨ ndagɨlo sya Moose sikʉlɨngaania bo lʉlʉʉlo. 9 Sisimbiigwe ʉmo ʉkʉtɨ, “Ʉlɨngajɨpinyaga ɨngʼombe kʉ kanwa, bo jɨlɨ pakʉpʉʉla ɨnganu.”*9:9 Bala kalata gwa Ʉkʉkʉmbʉka Ɨngomeelesyo 25:4. Ʉbʉjobi ʉbʉ kokʉtɨ Ɨngʼombe jɨbagiile ʉkʉlya ɨnganu bo jɨlɨ pakʉpʉʉla, ʉgo go mfwalo gwa mbombo jaake. Nkɨfwanikɨsyo ɨkɨ, bʉle, Kyala ikʉpaasya syene ɨsya ngʼombe? 10 Hɨmma! Bʉle, akaajobile ɨsyo kʉmyɨtʉ? Bo silɨ! Namanga ʉjʉ ikʉlɨma ʉngʉnda, na ʉjʉ ikʉtondola mu ngʉnda gʉla, boosa bikʉsʉʉbɨla ʉkʉtɨ bikʉfyaga ɨfya kʉjabana. 11 Ʉswe tʉlʉmbɨliile ɨNdʉmi ɨNunu kʉmyɨnu, bo ʉlwa mundʉ ʉjʉ ikʉbyala ɨmbeju. Bʉle, ko kʉkʉlʉmba ʉkʉsʉʉbɨla ʉtʉndʉ ʉkʉfuma kʉmyɨnu, ʉtwa kʉtʉtʉʉla mu mbɨlɨ, bo ʉlwa mundʉ ʉjʉ ikʉtondola?

12 Lɨnga abangɨ babagiisye ʉkʉpeeligwa ʉtʉndʉ ʉkʉfuma kʉmyɨnu, bʉle, ʉswe tʉkabagɨsya ʉkʉkɨndapo ʉkʉkaba?

Looli ʉswe tʉkaamelile ɨfi tʉbagiisye ʉkʉbombeligwa na nuumwe, leelo tʉlɨnkwikasya ndɨ syosa ʉkʉtɨ tʉlɨngabasigɨla abandʉ ʉkwitɨka ɨNdʉmi ɨNunu ɨjaa Kɨlɨsiti.

13 Bʉle, mukamanya ʉkʉtɨ aba bikʉbomba ɨmbombo mu tempeli bikʉkaba ɨfindʉ fyabo ʉkʉfuma mwi ikemo ɨlɨ bikʉtwala mu tempeli? Kokʉtɨ mukamanya ʉkʉtɨ aba bikʉbomba ɨmbombo pa kɨgemo, bikwambɨlɨla ɨfindʉ fyabo ʉkʉfuma mwi ikemo ɨlya pa kɨgemo? 14 Kangɨ ʉNtwa Jesu alagiile bʉbʉʉbo ʉkʉtɨ, aba bikʉlʉmbɨlɨla ɨNdʉmi ɨNunu bikʉlyaga ʉkʉfuma mu mbombo ɨjo.†9:14 Jesu aajobile ʉkʉtɨ, “Ʉmbombeli ikʉlondigwa ʉkʉpeeligwa ɨfi afumbilwe na bandʉ aba ikʉbabombela.” Bala kalata gwa Matai 10:10.

15 Looli ʉne ngasʉʉmamo nafimo ndɨ ɨfyo ɨfi mbagiisye ʉkʉpeeligwa. Kangɨ ndikʉbasimbɨla ʉkʉtɨ mumbepo ɨfyo. Kʉmyangʉ paakipo ʉkʉfwa, ʉkʉkɨnda ʉmundʉ ʉkʉʉsigɨla ʉkwituufya ʉkʉlʉmbɨlɨla ɨNdʉmi ɨNunu kɨsita kʉhombigwa. 16 Ʉne ngabagɨsya ʉkwituufya kʉnongwa jaa kʉlʉmbɨlɨla ɨNdʉmi ɨNunu, namanga ɨjo jo mbombo ɨjɨ mpaka njɨbombe, paapo Kyala aandagiile ʉkʉjɨbomba. Kangɨ ahɨɨli kʉmyangʉ, lɨnga ndikʉlʉmbɨlɨla ɨNdʉmi ɨNunu ɨjo! 17 Lɨnga naabombaga ɨmbombo ɨjɨ kʉ bwigane bwangʉ, ngalɨ ngʉsʉʉbɨla ɨfya kʉhombigwa. Looli lɨnga jo Kyala ʉjʉ ambeele ɨmbombo ɨjɨ kʉ bwigane bwake, bʉkaja bwigane bwangʉ, 18 po ɨfihombigwa fyangʉ fyo filɨkʉ? Ɨfihombigwa fyangʉ ko kʉbapa abandʉ ɨNdʉmi ɨNunu kɨsita kʉhombigwa, kɨsita kʉmela ɨfi mbagiisye ʉkʉpeeligwa, kʉnongwa jaa mbombo ɨjɨ.

19 Ʉne ngaja ntʉmwa gwa mundʉ, ndɨ mwabʉke, looli niibɨɨkile ʉkʉja ntʉmwa gwa bandʉ boosa, ʉkʉtɨ mbatwale abandʉ abingi kwa Kɨlɨsiti. 20 Kʉ Bajuuta naabombaga ʉlwa Bajuuta, ʉkʉtɨ mbatwale aBajuuta kwa Kɨlɨsiti. Kʉlɨ bala bikʉsikonga ɨndagɨlo syabo, naalɨ bo ʉlwa aba bikʉsikonga, nalɨnga ngaja ntʉmwa gwa ndagɨlo syabo, ʉkʉtɨ mbatwale aba bikʉsikonga ɨndagɨlo ɨsyo kwa Kɨlɨsiti. 21 Kangɨ kʉlɨ bala bakasimanya ɨndagɨlo sya Bajuuta, naalɨ bo ʉlwa mundʉ ʉjʉ akasimanya ɨndagɨlo ɨsyo, ʉkʉtɨ mbatwale kwa Kɨlɨsiti. Sitikʉnangɨsya ʉkʉtɨ ngaja nɨ ndagɨlo nkyeni mwa Kyala, looli ndɨ nasyo paapo ngʉsikonga ɨndagɨlo sya Kɨlɨsiti. 22 Kʉ bandʉ aboonywa, niibɨɨkile ʉkʉja moonywa, ʉkʉtɨ mbatwale kwa Kɨlɨsiti. Kʉ bandʉ boosa niipelile ʉkʉja mwinaabo, ʉkʉtɨ kʉ njɨla syosa mbapoke bamo. 23 Ngʉbomba ɨsi syosa kʉnongwa jaa Ndʉmi ɨNunu, ʉkʉtɨ nje ndɨɨlanisi na bangɨ ɨsajo syake.

24 Abandʉ bo bikʉtolana ʉkʉbopa ʉlʉbɨlo, boosa bikʉbopa. Bʉle, mukamanya ʉkʉtɨ jʉmojwene jo ʉjʉ ikʉtola? Lɨɨlɨno mubopege fiijo ʉkʉtɨ mutole. 25 Aba bikʉtolana mu ngino, bikwitiima fiijo nʉ kwitendekesya ɨmibɨlɨ gyabo, ʉkʉtɨ batole. Ʉjʉ ikʉtola, ikwambɨlɨla ɨngɨga ɨjɨ jikoonangɨka. Looli ʉswe tukʉbomba bo ʉlo, ʉkʉtɨ twambɨlɨle ɨngɨga ɨjɨ jɨtikoonangɨka sikʉ. 26 Bʉbʉʉbo na niine ndikʉbopa bo ʉlwa mundʉ ʉjʉ ikʉbopa kɨsita nyango, kangɨ ndikʉlwa bo ʉlwa mundʉ ʉjʉ ikʉkoma itolo ɨkɨbuli mu mpaalanga. 27 Looli ngʉgʉtaamya nʉ kʉgwisibɨsya ʉmbɨlɨ gwangʉ ʉkwitiima, ʉkʉtɨ bo mbalʉmbɨliile abandʉ abangɨ ɨNdʉmi ɨNunu, ndɨngiisa kʉkaanigwa na Kyala.